Samayeli1 24 - LAWA A BOO SONBORE 2011

Davida a Sayulu toa walan

¹ Davida kiɛ̃ á n bɔ walan, á woo Ɛn-Gedii a duru ǹ bǎãn kɛn nɛ, á giã walan.

² Sayulu bɛ́ á Filisiti minin lɛn kio loo á n bɔyaa, ǹ nə́ gũ ǹ nə́ pɛ nɛ mà Davida tá giã Ɛn-Gedii don, kànaa.

³ Sayulu min duu sɔɔ (3 000) gɔgɔɔ̃, Izirayeli kuturu gɔ́ɔ̃ nɛ, á woo ga Davida laanka a minin li, don butumun gɛ̀fun bǎã yɔrɔ-a.

⁴ Sèren kaa ǹ bǎãn mɛnɛn bɛ́ zii genli, á dɔ walan. Yala goon tan bɛa bǎã lɛ nɛ. Sayulu wɔ a nɛ, mà a na a gòɛrɛ koe. Bɛ́ daa yaa, bɛ̀ Davida laanka a minin tá giã-n tán yala lɛ a kə́rən li.

⁵ Davida a minin nə́ pɛ-n kɛnɛn: «Dɛnaa Lawa mɛn boo da n nɛ, mà á ke, mà asɛ n die n zɔ́ɔ we n gɔn, bɛ̀ sii mɛn kɔɔ̃n kɔ n ganaa, mà n bɛ zɛnaa, bɛa lɛawaa lɛ n ke.» Davida yoo á Sayulu a dɔnkɛ gole lɛkoro kuru ka durii ni.

⁶ Sɛnɛ bɛ kio, Davida foo ná a din zɛ̀rɛ baa, a giala, a na á Sayulu a dɔnkɛ lɛkoro kuru.

⁷ Á pɛ a minin lɛn manɛ: «Dɛnaa Lawa die a ma kanbaa bɛa sii baraa kɛ miã zɛnaa ganaa, maa dɛnaagiĩ ni, Dɛnaa Lawa min mɛn lɛ bɔ á koa. Ma ba re n gɔn diɛ a ganaa wa, a giala, Dɛnaa Lawa na á bɔ.»

⁸ Davida bɛa boon lɛn da, á ná a minin kurəə ne, a lɛ kɔ mà ǹ yoo Sayulu gialaa wa. Bɛ kio, Sayulu yoo á n tele lon, á soo á n bɔ yala lɛ nɛ, á kiɛ̃ ka a zii ni.

⁹ Davida yoo bɛ kio, á soo á n bɔ yala lɛ nɛ, á n lɛ dɛ Sayulu kio á pɛ: «Maa dɛnaa, kii wee!» Sayulu nə́ n yii bɔyaa á ga a kio. Davida nə́ n zuməə tán a lɛ la, á n musin kurumaa tán.

¹⁰ Davida pɛ Sayulu ni: – Min mɛnɛn bɛ́ pii, mà á ke, mà Davida n giɛ li a sii baraa zɛnaa n nɛ, wàa na á baa, n tá n too koe ǹ lon?

¹¹ N yii yɛ pelo dinin, Dɛnaa Lawa nə n wɔ ma gɔn, yala lɛ nɛ. Ǹ nə́ pɛ mà man dɛ, sɛnɛ, n makara na á ma kũ, ma tɔ́n nə n toa: «Ma ba re n gɔn diɛ maa dɛnaagiĩ ganaa wa, a giala, Dɛnaa Lawa na á n bɔ, á n koa.»

¹² Maa díi, ga koɛ, ga n dɔnkɛ lɛkoro ganaa ma gɔn. Màn mɛn toa, má boo la má n dɔnkɛ lɛkoro kuru, má n ma n dɛ dɔn wa, a yɛ n dɔ̃ foaãnɛ, piã laanka sii baraa zɛnaa ba masɛ gɔ́ɔ̃-n wa. A yɛ n dɔ̃ dɔn, mà masɛ sii la n la wa. N din ni zoɛ̃ masɛ nyin li, mà n bɔ.

¹³ Dɛnaa Lawa die a sii lɛ kuru wɔ biin ni! Dɛnaa Lawa die a masɛ a dòo bɔ n ganaa! Sɛnɛ, masɛ gɔn ba re miɛ n ganaa wa.

¹⁴ Ka lɛlɛ suusu lɛ bɛ́ pii lɔn: «baraabaa lɛ n boe min baraan nɛ!» Bɛ lɛ-n ke masɛ gɔn ba re miɛ n ganaa wa.

¹⁵ Nsɛ, Izirayeli a kii, ma nə n soo woe die gialaa? Ma n die kio lui? Masɛ din kooro kɛ lɛ. Ma a soɛ gin gere-n wa, ma a soɛ dìwi dɔ-n wa.

¹⁶ Dɛnaa Lawa á die bɛa kiri kuri. Dɛnaa Lawa die a wɔ waa kɔn. Dɛnaa Lawa die a n yii wɔ maa sii ni, a yɔ bɔ maa lɛa. A die a sonbore kɔ masɛ la, a ma si Sayulu la, a ma da.

¹⁷ Davida bɛ́ á bɛa boo lɛ da Sayulu ni, á nya ǹ mɛn waáraa, Sayulu pɛ: «Maa nɛgiĩ Davida, kɛ nə n din sɔ yala lɛa?» Sayulu nə́ n lɛ da wuu ni kɔsɛkɔsɛ.

¹⁸ Á pɛ Davida nɛ: «N tá pepere ń la masɛ nɛ, a giala, ń bǐɛ̃ zɛnaa ma nɛ, a da yaa, masɛ sii baraa zɛnaa n nɛ.

¹⁹ N bǐɛ̃ mɛn zɛnaa masɛ-n pelo, ma bɛ yɛ. A giala, Dɛnaa Lawa goã á ma wɔ n gɔn, sɛnɛ, n ma dɛ wa.

²⁰ Bɛ̀ min nə́ n da a zɔ́ɔ lɛ, a tá toɛ a wo zɔzɔnɔ? N màn mɛn zɛnaa masɛ nɛ bɛa pinaa kɛ lɛ nɛ, Dɛnaa Lawa die a n saraa bɛ taman yii.

²¹ Bɛ̀ Izirayeli a kiibaa lɛ nɛ, má waa la sisia, mà á die goɛ̃ n gɔn.

²² Kanna kəni, n liɛ masɛ nɛ ka Dɛnaa Lawa tɔ nɛ, mà n ba re masɛ a nɛnyaanan dii ma kio wa, mà n ba re ma tɔ papaɛ̃ n bɔ masɛ a díi a kion minin bii wa.»

²³ Davida bɛa liɛ lɛ wɔ Sayulu ni. Bɛ kio, Sayulu woo piɛ, Davida laanka a minin nə́ wusoo ǹ nə́ woo ǹ duru ǹ bǎã nɛ.