Samayeli1 14 - LAWA A BOO SONBORE 2011

Zonaatan boo Filisiti minin la

¹ Ǹ kɔn pinaa, Sayulu a nɛgiĩ Zonaatan pɛ a ziabaa ǹ mànan-gũli ni: Kiɛ̃ n daa wɔ wo yǎa Filisiti minin sɔraasin giã ǹ bǎã kɛ nɛ, bǎã kɔsɔ nɛ, kɛnɛn li. Sɛnɛ, a goã á pɛ ǹ di-n wa.

² Sayulu na á goã giã-n tán Gibeya gèlè la, Mikrɔn a grenadie da sonbore kɛ giulun. Min biɛsɔrɔ (600) kɛ miã na á goã kun ni.

³ Ayia na á goã Dɛnaa Lawa a wúlu-bɔle lɛa Siiloo. A na á goã Lawa a dí nya ǹ mɔnaa we. Ikabodi ǹ dɔɔ̃ngiĩ, Ayitubu a nɛ n ka Ayia nɛ. Ikabodi n Fineyasi a nɛ lɛa. Fineyasi dɔ n Elii a nɛ lɛa. Zaman lɛ goã doɛ̃ mà Zonaatan woo wa.

⁴ Zonaatan goã kiɛ̃ bǎãn mɛnɛn nɛ, woe Filisiti minin giã ǹ bǎã lɛ nɛ, bɛa bǎã lɛ a goon nə kɔlɔ sɔsɔrɔ màn paa biin ni. Maǹ nə́ goã kɔlɔ lɛ goon bíi mà Booseki, ǹ nə́ goã goon kɛ dɔ bíi mà Sene.

⁵ Goon na á goã gɔsɛ a lɛ̀gɔn la kɔn pìã zii-a ka Mikmaasi kiwi ni. Goon kɛ dɔ na á goã gusin a lɛ̀gɔn la, kɔn pìã zii-a ka Gebaa nɛ.

⁶ Zonaatan pɛ a ziabaa ǹ mànan-gũli lɛ nɛ: «Kiɛ̃ n daa, wɔ wo yǎa soroman kɛn bǎã nɛ. Bɛ̀ a n doa wa, Dɛnaa Lawa á re n doe wɔ lɛ. A giala, ta minin man mɔnaa nɛ hinlaa ta manə ǹ ba tɛ wa, màn kɔn ba Dɛnaa Lawa kurii gɔ̀lɔ̀baa kɔ ganaa wa.»

⁷ A ziabaa ǹ mànan-gũli lɛ pɛ nɛ: «Bɛ̀ sii mɛn tumaa kɔɔ̃n kɔ n din ganaa, bɛ zɛnaa. N bɛ́ re màn mɛn zɛnɛɛ, ma tá n kio.»

⁸ Zonaatan pɛ: «Á ke, Filisiti minin lɛn bɛ́ paǹ mɛn li, toa wɔ woo wɔ dɔ walan sisia, wɔ n dinin nyaa ǹ nɛ.

⁹ Bɛ̀ ǹ nə́ pɛ wɔ nɛ, mà wɔ baran n gòã woɛ̃ wa, yǎa ǹ die doe wɔ li, wɔ á re golee bǎã goon ne, wɔ a re woe ǹ ganaa wa.

¹⁰ Sɛnɛ bɛ̀ ǹ nə́ pɛ mà wɔ da ǹsɛn ganaa, wɔ n woe, a giala, bɛ n nyɛɛ mà Dɛnaa Lawa na á ǹ wɔ wɔ gɔn.»

¹¹ Ǹ dinin min paamaa woo ǹ dinin nyaa Filisiti minin lɛn bǎã nɛ. Filisiti minin lɛn nə́ tɔ́n pɛ mà *Ebrəən lɛn nə́ ke soe yalan nɛ, ǹ goã ǹ nə́ n duru yalan mɛnɛn lɛn nɛ.

¹² Min mɛnɛn bɛ́ bǎã lɛ nɛ, ǹ nə́ n toa Zonaatan laanka a ziabaa ǹ mànan-gũli lɛ ganaa: «Ka kiɛ̃ ka da wɔ ganaa, wɔ sii kɔn nyaa ka nɛ.» Zonaatan pɛ a ziabaa ǹ mànan-gũli lɛ nɛ: «Kɔ ma kio lɛ: Dɛnaa Lawa na á ǹ wɔ Izirayeli minin gɔn.»

¹³ Zonaatan nə́ n doa a gòãn laanka a gɔnɔn ganaa, á kiɛ̃ á woo ka a ziabaa ǹ màna-gũli ni a kio. Zonaatan Filisiti minin lɛn dɛ á ǹ kaa tán. A ziabaa ǹ mànan-gũli lɛ na á goã ǹ gɔn nyɔɔmiɛ̃ tán a kio.

¹⁴ Zonaatan laanka a ziabaa ǹ mànan-gũli lɛ nà a giala kɔ, ǹ nə́ min mɛnɛn dɛ á dɔ giĩ fuə kɛ miã. Ǹ bɛ́ ǹ nə́ ǹ dɛ bǎã mɛn nɛ, a kànaa laanka kànaa niɛ wa.

¹⁵ Nyɛ́ɛ wɔ Filisiti minin sɔraasin giã ǹ bǎã nɛ ka ǹ kiwin ni. Nyɛ́ɛ zaman lɛ tumaa kũ. Sɔraasin mɛnɛn nə goã giã-n bǎã lɛ nɛ ka ǹ mɛnɛn dɔn nə soo ǹ nə́ woo basaã kɔ, nyɛ́ɛ nə́ ǹ tumaa kũ. Tán bìn da. Lawa na á nyɛ́ɛ gole da ǹ ganaa.

¹⁶ Gibeya kiwi, Bɛnzamɛn tɔrɔn tán la, Sayulu a bǎã-lɛduə̃lin lɛn kɔnɔn nə́ goã walan. Ǹ bɛ́ giɛ, bɛ̀ Filisiti minin lɛn bɛ́ sawɛɛ n lɛ koe bǎã yii ni.

¹⁷ Zaman mɛn bɛ́ kun ka Sayulu ni, Sayulu pɛ ǹ nɛ: «Ka tɔn bíi, ka ga a ganaa min mɛn bɛ́ á soo wɔsɛn bii.» Ǹ nə́ tɔn bii, Zonaatan laanka a ziabaa ǹ mànan-guli goã ǹ tan wa.

¹⁸ Sayulu pɛ Ayia nɛ: «Dɛnaa Lawa a goo lɛ wɔlɔ kunu kɔ.» A giala, bɛa biikoo lɛ li, Dɛnaa Lawa a goo lɛ goã a tan Izirayeli nɛnyaanan lɛn li.

¹⁹ A Sayulu toa boo diɛ ka Lawa a wúlu-bɔle Ayia nɛ, màn na á goã miɛ Filisiti minin lɛn sɛ̀-pɛ li ǹ giã ǹ bǎã nɛ. Sayulu pɛ Lawa a wúlu-bɔle lɛ nɛ: «N susu.»

²⁰ Sayulu din laanka zaman lɛ mɛn tumaa goã kun, ǹ nə́ n sɔkɔn, ǹ nə́ woo dɔ zia bǎã lɛ nɛ, bɛ̀ Filisiti minin lɛn nə́ ke kɔn dii ka gɔyan nɛ, ǹ nə́ ǹ ba boe la ǹ tá bɔkɔnlɛ goon din we doɛ̃ wa.

²¹ Ebrəə minin mɛnɛn nə́ goã ǹ nə́ kaa kun ka Filisiti minin lɛn nɛ lɛlɛ, ǹ nə́ woo n bibiə̃ ǹ giã ǹ bǎã nɛ, bɛn dɔn nə́ wusoo ǹ nə́ ǹ wɔ kaa kun ka Sayulu laanka Zonaatan nɛ, Izirayeli kio.

²² Izirayeli minin mɛnɛn tumaa goã ǹ nə́ n duru Efrayimu kele yii ni, bɛn bɛ́ ǹ nə́ ma mà Filisiti minin lɛn nə́ n gòã da baa nɛ, ǹ dɔn nə́ yoo ka zia nɛ ǹ nə́ ǹ kio loo.

²³ Bɛa pinaa kɛ lɛ nɛ, Dɛnaa Lawa gɔ̀lɔ̀baa kɔ Izirayeli minin la. Ǹ nə́ zia lɛ baa yǎa ǹ nə́ woo Bɛti-Avɛn da ǹ kio.

Sayulu liɛ gere mɛn wɔ

²⁴ Izirayeli minin lɛn nə́ nɔmaa bɛa pinaa kɛ lɛ nɛ, a giala, Sayulu nə́ n liɛ á da ǹ bɔlɔ-a kɛnɛn: «Min mɛn bɛ́ re màn-bii we a lɛ-n, wasa ná a tɔn mɛn wa, masɛ n ma tɔn dòo bɔ maa zɔ́ɔn ganaa wa, koe die a bɔ bɛa dɛnaa ganaa.» A bɛ miɛ̃, min kɔn nə yɛ kun ka zaman lɛ nɛ, á màn boɛɛn wɔ a lɛ-n wa.

²⁵ Zaman lɛ tumaa dɔ daã kɔn nɛ, zoo nyɔɔ goã tán bǎã yii ni.

²⁶ Sɔraasin lɛn bɛ́ ǹ nə́ wɔ daã lɛ nɛ ǹ mɛn waáraa, bɛ̀ zoo nyɔɔ lɛ á ke baa si tán a nɛ. Sɛnɛ, min kɔn gɔn wo a lɛ-a wa, a giala, zaman lɛ na á goã nyɛ́ɛ biɛ Sayulu a liɛ lɛ nɛ.

²⁷ Sɛnɛ, Zonaatan ǹ di liɛ mɛn wɔ á da zaman lɛ bɔlɔ-a, Zonaatan sɛ goã á bɛ ma wa. Bàlà mɛn goã a gɔn, á saa, a ná a mui sã zoo nyɔɔ lɛ li, á tele ne a lɛ-a á bii, bɛ dɔ nə́ n baa a yii a toɛ̃ lɛa.

²⁸ Zaman lɛ a min goon nə́ n toa Zonaatan ganaa kɛnɛn: «Táa n di na á liɛ wɔ, á da zaman lɛ bɔlɔ-a mà min mɛn bɛ́ re màn bii pelo, mà koe die a bɔ bɛa dɛnaa ganaa. A da yaa zaman lɛ dɔ n ke á goã nɔmaa nɛ.»

²⁹ Zonaatan tɔ́n na a lɛ si: «Maa díi na á bɔ̀n da gána lɛ ganaa. Ma zoo kɛ lɛ a boɛɛn nɛ̀n da lɔn, ka ga ma yii toɛ̃ lɔn dɛ.

³⁰ Sanparɛ, zaman lɛ mànan mɛnɛn si ǹ zɔ́ɔn la, bɛ̀ maǹ nə́ bɛn bii, bɛ̀ ǹ nə́ Filisiti minin kɛn dɛ á la kɛ nɛ.»

³¹ Bɛa pinaa kɛ lɛ nɛ, a kũ Mikmaasi ganaa a wo Ayaalɔn yaa, Izirayeli minin lɛn nə́ zia da Filisiti minin lɛn ganaa ǹ nə́ boo ǹ la. Zaman lɛ bɛ́ á nɔmaa taãn-taãnɛ,

³² ǹ mànan mɛnɛn si ǹ zɔ́ɔn la, ǹ nə́ yiɛ, ǹ nə́ kaa bɛn la. Ǹ nə́ tɔɔ bisinin kũ, ka dii dadaran laanka a tenən ne, ǹ nə́ ǹ naa tán, ǹ nə́ ǹ bɔlɔ kuru. Ǹ nə́ siĩ lɛ sɔ̃ kɔnlɛ ka a mà nɛ.

³³ Ǹ nə́ bɛa boo lɛ pɛ Sayulu ni: «Á ke, zaman lɛ tá a gialaa sii liɛ Dɛnaa Lawa la, a giala, maǹ siĩ soɛ̃ kɔnlɛ ka a mà nɛ.» Sayulu pɛ: «Ka a bɔlɔ goon pii wa! Ka kɔlɔ gole birikəə̃, ka da nɛ masɛ li sisia.»

³⁴ Sayulu wusoo á pɛ: «Ka wo zaman lɛ bii ka pɛ ǹ nɛ kɛnɛn: Didie da ka a dii laanka a sère ne masɛ li kànaa a dɛ. Bɛ kio, ǹ tɔn siĩ lɛ sɔ̃: Ǹ baran sɔ̃ kɔnlɛ ka mà nɛ, ǹ sii la Dɛnaa Lawa la wa.» Bɛa tèlò lɛ nɛ, zaman lɛ a min gogoonmaa daa ka a gɔn gunun dii ni, ǹ nə́ ǹ dɛ bǎã lɛ nɛ.

³⁵ Sayulu *wúlu bɔ ǹ bǎã dɔ Dɛnaa Lawa nɛ. Bɛ na á n baa Sayulu a wúlu bɔ ǹ bǎã bibinaa dɔ lɛa Dɛnaa Lawa nɛ.

³⁶ Sayulu pɛ: «Tèlò-n, ka daa wɔ Filisiti minin lɛn kio loo. Wɔ n die ǹ mànan kokoe yǎa lɛ̀ wɛɛ. Wɔ n die ǹ tumaa lɛ naɛ.» Ǹ nə́ pɛ Sayulu ni: «Màn mɛn bɛ́ siĩni n yii li, bɛ zɛnaa.» Lawa a wúlu-bɔle tɔ́n pɛ: «Toa wɔ nɔ̀n da Dɛnaa Lawa la kànaa dinin.»

³⁷ Sayulu nɔ̀n da Lawa la: «Ma doamaa nɛ ma Filisiti minin lɛn kio loo? N tá re ǹ we Izirayeli minin gɔn?» Sɛnɛ, bɛa pinaa kɛ lɛ nɛ, Lawa na a lɛ si wa.

³⁸ Sayulu pɛ zaman lɛ a goledɛnan manɛ: «Ka tumaa nə n mɔrɔ kànaa. Màn mɛn bɛ́ sii baraa lɛ lɛa pelo, ka ga bɛ li ka dɔ̃.

³⁹ Dɛnaa Lawa Yiikoonaa lɛ, Izirayeli kirisibaali lɛa, bɛ tɔ taman yii, ta ma din a nɛgiĩ Zonaatan a sã nɛ, gɛ̀ dɔlɔ nə n boe a ganaa, sàabaa ba bɛ la wa. Min kɔn nə yɛ zaman damata lɛ bii, á ná a lɛ si wa.»

⁴⁰ Sayulu tɔ́n pɛ Izirayeli minin tumaa nɛ: «Ka kaa wàã goon-a, masɛ dɔ laanka maa nɛgiĩ Zonaatan kaa wàã kɔsɔ-a.» Zaman lɛ pɛ Sayulu ni: «Sii mɛn bɛ́ siĩni n yii li, bɛ zɛnaa.»

⁴¹ Sayulu pɛ Dɛnaa Lawa nɛ: «Izirayeli a Lawa, boo lɛ a sonbore nyaa.» Boo lɛ na á goã Zonaatan laanka Sayulu la, zaman lɛ sɛ́ soo a nɛ.

⁴² Sayulu pɛ: «Ka n pã ma laanka maa nɛgiĩ Zonaatan ganaa.» Á tɔ́n mɛnaa Zonaatan la.

⁴³ Sayulu pɛ Zonaatan nɛ: «N sii mɛn zɛnaa, bɛ pɛ ma nɛ.» Zonaatan saa á pɛ nɛ kɛnɛn. «Taãn nɛ, bàlà mɛn goã ma gɔn, má bɛ giala wɔ zoo nyɔɔ lɛ li, má a nɛ̀n da. Á ke, man gɛ̀-wɔ dan la.»

⁴⁴ Sayulu pɛ: «Lawa die a dɔlɔ babaraa bɔ ma ganaa, bɛ̀ á daa yaa gɛ̀ dɔlɔ nə n bɔ Zonaatan ganaa wa.»

⁴⁵ Zaman lɛ pɛ Sayulu ni: «Zonaatan lɛ n die giɛ̃ koɛ, asɛ mɛn nə́ ke, á gɔ̀lɔ̀baa gole kɛ yɛ, Izirayeli a lɛa? Bɛ boo bie wa! Dɛnaa Lawa Yiikoonanaa tɔ taman yii, a mìi ka goon ba re papaɛ̃ wa. A giala, a màn mɛn din nya pelo dinin, Lawa a dɔmalɛ nɛ.» Zaman lɛ Zonaatan si bɛa gɔn kɛ lɛ la á da. A gã wa.

⁴⁶ Sayulu wusoo á n bɔ Filisiti minin lɛn kio. Filisiti minin lɛn nə́ woo ǹ gána nɛ.

Sayulu boo sii mɛn la á zɛnaa a kiibaa gɔ́ɔ̃ nɛ

⁴⁷ Sayulu bɛ́ á pàã saa Izirayeli gána nɛ, a goã zɔ́ɔn mɛnɛn tumaa bii, á zia da bɛn ganaa. Á zia da Moabu gána ganaa, á zia da Amɔn tɔrɔn ganaa. Á zia da Edɔmu ganaa. Á zia da Sobaa a kiin ganaa ka Filisiti minin ni. A goã n boyɛɛ bǎã mɛn din tumaa li ka zia nɛ, á goã boe ǹ la.

⁴⁸ Á daa, á pàã yɛ, á boo Amalɛki tɔrɔn la. Min mɛnɛn nə goã Izirayeli minin gɔn mànan kokoe, á Izirayeli minin si bɛn la, á ǹ kaa.

⁴⁹ Sayulu a nɛgiĩn man nə́ goã ka Zonaatan nɛ, ka Zisiwii laanka Malkisuwa nɛ. A nɛlɔn man min paa. A goledɛnaa lɛ tɔ n Meraabu, asɛ a zizi tɔ n Mikaali.

⁵⁰ Sayulu a lɔ tɔ na á goã Ayinoamu, Ayimaasi a nɛlɔ nɛ. A sɔraasin goledɛnaa tɔ na á goã Abnɛɛrɛ. Nɛɛrɛ a nɛ na á goã ka Abnɛɛrɛ nɛ. Nɛɛrɛ lɛ na á goã Sayulu ǹ di ǹ dɔɔ̃ngiĩ lɛa.

⁵¹ Sayulu ǹ di Kiisi lɛ laanka Abnɛɛrɛ ǹ di Nɛɛrɛ lɛn man nə́ goã Abiyeli a nɛgiĩn lɛa.

⁵² A Sayulu toa a yii n koo, zia lɛ na á goã woɛ̃ nɛ ka kasagaa Filisiti minin lɛn gialaa. Min mɛnɛn tumaa goã ǹ foo n tã, ǹ nɛgininbaa dɔ, bɛ̀ Sayulu bɛ mɛn yɛ, a n kuĩ a da kun ka a din ni.