Samayeli1 1 - LAWA A BOO SONBORE 2011

Samayeli a yɛ laanka a nɛnyaanbaa

¹ Giĩ goon na á goã Ramaa kiwi, Efrayimu kele yii ni, a tɔ n Ɛlkaana. Yerahamu a nɛ nɛ, Yerahamu n Eliwu a nɛ lɛa, Eliwu n Towu a nɛ lɛa, Towu n Sufu a nɛ lɛa.

² Ɛlkaanaa a lɔ na á goã paa. Goon tɔ n Anɛɛ, kɛ dɔ tɔ n Peninaa. Peninaa a nɛnyaanan nə́ goã ǹ tan, sɛnɛ, nɛ goã Anɛɛ sɛ lon wa.

³ Lɛ̀ woo lɛ̀, Ɛlkaanaa nə n toɛ a kiwi bɛ̀ a wo Dɛnaa Lawa Pàãyiidɛnaa guguru kɔ Siiloo, bɛ̀ a *wúlu màn dɔ kɔ la. Elii a nɛgiĩ n min paa, Ɔfunii laanka Fineyasi ni, bɛn man nə́ goã Dɛnaa Lawa a wúlu-bɔlen lɛa walan.

⁴ Ɛlkaanaa na á goã, bɛ̀ a tá a wúlu màn koe ǹ mɛn pinaa, a na a lɔ Peninaa gìì boe ka Peninaa a nɛlɔn laanka a nɛgiĩn tumaa nɛ.

⁵ Sɛnɛ Ɛlkaanaa na á goã a laman paa koe Anɛɛ la, a giala, á goã asɛ lɛ narɛ, a laanɛ Dɛnaa Lawa nɛ kɔ la wa.

⁶ Ǹ miãgoã Peninaa dɔ na á goã a foo ziziɛ̃ ǹ sii zɛnɛɛ miɛ̃ duduu màn mɛn bɛ́ toɛ a foo yoo, a giala, Dɛnaa Lawa nɛ kɔ la wa.

⁷ A na á goã miɛ̃ lɛ̀ tumaa nɛ, Anɛɛ a wo Lawa a kion gogoonmaa, Peninaa na á goã a foo ziziɛ̃ miɛ̃. Bɛ lɛ nɛ, Anɛɛ goã wuu pii bɛ̀ a n piã, a màn bii wa.

⁸ Ǹ zuũ Ɛlkaana tɔ́n pɛ nɛ: «Anɛɛ, wàa na á baa n tá wuu pii, n nə n ba màn bii wa? Wàa na á baa n foo ziziɛ̃? Masɛ á soɛ nɛgiĩ fù ni n gɔn wa?»

⁹ Ǹ nə́ màn bii, ǹ nə́ màn mi Siiloo, bɛ kio, Anɛɛ nə́ n doa á yoo. Bɛa biikoo li, Lawa a wúlu-bɔle Elii na á goã giã-n tán a dankan nɛ, Dɛnaa Lawa a kion lɛ a kiɛnlɛ-a.

¹⁰ A Anɛɛ toa a yɔrɔ-kɔsiɛ gole gɔ́ɔ̃ nɛ, á Dɛnaa Lawa nyankɔ ka yii mu gole ne.

¹¹ Á n lɛ kɔ, á pɛ: «Dɛnaa Lawa Pàãyiidɛnaa, masɛ nə n bɛ̀rɛlɔ lɛa. Bɛ̀ ń lɛ kɔ, ń masɛ a nɔmaa kɛ dɔ̃ ma la, ń nə n yiri kɔ masɛ li, bɛ̀ n yiri bɔ ka ma-n wa, yǎa n nɛgiĩ kɔ ma la, masɛ n die bɛa nɛgiĩ kɛ lɛ koe Dɛnaa Lawa la duduu yǎa a n boe a wasa nɛ. Kùn ba re n diɛ a mii-n wa.»

¹² Anɛɛ Lawa nyankɔ á belebɔ nɛ Dɛnaa Lawa yɔrɔ-a. Bɛa biikoo li, Elii goã giɛ a lɛ ganaa.

¹³ Anɛɛ na á goã boo diɛ a din gɔ́ɔ̃ nɛ, a lɛ dinsɔɔ̃ na á goã bìn diɛ. Min nə goã a lɛ miɛ wa. Bɛ lɛ n ke, Elii goã taasɛ mà yɔ na a yii ganaa.

¹⁴ Elii pɛ nɛ: «Yɔ lɛ n die goɛ̃ n yii ganaa yǎa biĩ? Toa a toɛ̃ a n bɔ n yii ganaa.» Sɛnɛ Anɛɛ ná a lɛ si kɛnɛn:

¹⁵ «Haayii, maa dɛnaagiĩ, masɛ n lɔ lɛa, lɔ mɛn foo á ke ziziɛ̃ nɛ. Ma yɔ mi wa, ma yɔ kakaarɛ kɔn mi wa. Man má goã ǹ gɔ́ɔ̃ dinsɔɔ̃ pii Dɛnaa Lawa yɔrɔ-a.

¹⁶ N baran ma kũ min kɔrɔ lɛa wa, a giala, là-paparɛɛ a la yii-n laanka foo-busii a la yii-n na á ma da boo diɛ ganaa á daa dɔ sisia ganaa.»

¹⁷ Elii ná a lɛ si: «Wo ka là nyantoro ne, n màn mɛn nyankɔ Izirayeli a Lawa lon, a die a bɛ kɔ n la.»

¹⁸ Anɛɛ tɔ́n pɛ: «Lawa die a n bɔlɔ si.» Bɛ kio, lɔ lɛ kiɛ̃ ka a zii ni. Á lɛ kɔ á màn bii, a yɔrɔ gɔ́ɔ̃ dɔ́ kaa.

¹⁹ Ɛlkaanaa laanka a kion minin nə́ yoo baayɛlɛ yiisoone, ǹ nə́ Lawa guguru kɔ, bɛ kio, ǹ nə́ n bɔyaa ǹ nə́ woo ǹ piɛ Ramaa. Ɛlkaana giã kun ka a lɔ Anɛɛ nɛ. Dɛnaa Lawa nə́ n yiri koa Anɛɛ li.

²⁰ Biikoo kɔn daa á dɔ, Anɛɛ min gugurubaa á nɛgiĩ yɛ a ná a tɔ kɔ Samayeli, bɛ giala, mà asɛ ná a nyankɔ Dɛnaa Lawa Lon.

²¹ Ǹ zuũ Ɛlkaana woo kun ka a kion minin tumaa nɛ Siiloo. Ǹ bɛ́ wúlu màn mɛn koe Lawa la lɛ̀ woo lɛ̀, Ɛlkaanaa nə n lɛ kɔ ka màn mɛn dɔ nɛ, á bɛn bɔ á n kɔ Dɛnaa Lawa la.

²² Sɛnɛ Anɛɛ wo kunun ǹ ni wa, a giala, a na á goã pii ǹ zuũ lɛ nɛ, mà a toa, bɛ̀ asɛ nɛ lɛ lɛ na nyɔ ganaa, asɛ tɔn wo ne, a kɔ Dɛnaa Lawa la, a goã walan duduu.

²³ Ǹ zuũ Ɛlkaanaa pɛ nɛ: «N din dùũ! Golee kànaa yǎa n nɛ lɛ lɛ niɛ nyɔ ganaa. Yǎa Lawa na a boo lɛ pã koɛ.» Lɔ lɛ golee á nyɔ kɔ a nɛginin lɛ la, yǎa á ná a lɛ na nyɔ ganaa.

²⁴ Ǹ dan lɛ bɛ́ a ná a lɛ lɛ na nyɔ ganaa, a laanɛ á tɔn ten, á kũ, á woo ne Siiloo. A bɛ́ woe, á dii gɔ̀lɔ̀ sɔɔ kũ, á wùsu góngo yii goon saa, ka yɔ bɔnaa goon ne. Á wɔ ka Samayeli ni Lawa a kion Siiloo.

²⁵ Ǹ nə́ dii sɔɔ lɛ dɛ, ǹ nə́ nɛ lɛ kũ, ǹ nə́ woo ne Elii li.

²⁶ Bɛ kio, Anɛɛ pɛ: «Maa dɛnaagiĩ ganaa. Nɔ̀n-diɛ din ba a-n wa, lɔ mɛn nə́ goã giɛ̃ n genli kànaa bɛ̀ a Dɛnaa Lawa nyankɔ masɛ din ni.

²⁷ Man má goã Lawa nyankoe nɛ kɛ lɛ taman yii. Ma màn mɛn nyankɔ Dɛnaa Lawa lon, á bɛ kɔ ma la.

²⁸ Ma dɔ n wusii bɛ siɛ koe Dɛnaa Lawa la. Maa yiikoonaabaa tumaa gɔ́ɔ̃ nɛ, a n die goɛ̃ Dɛnaa Lawa wɔ lɛa.» Bɛa bǎã kɛ lɛ nɛ, ǹ nə́ Dɛnaa Lawa guguru kɔ.