Rɔmu minin 2 - LAWA A BOO SONBORE 2011

Lawa a dí-pɛn lɛn man min tumaa wɔ lɛa

¹ Nsɛ min ke, nsɛ mɛn bɛ́ n miãn zɛ̀rɛ biɛ, sonbore yɛ ǹ bǎã goon ba n lon wa. N bɛ́ n miãn zɛ̀rɛ biɛ, ma nə n din dɔ zɛ̀rɛ biɛ, a giala, nsɛ mɛn bɛ́ n miãn zɛ̀rɛ biɛ, n din dɔ n bɛa siin lɛn zɛnɛɛ.

² Wɔ́ dɔ̃ mà min mɛnɛn bɛ́ bɛa siin kɛn zɛnɛɛ, mà á pepere, Lawa kiri kuru ǹ la.

³ Nsɛ mɛn bɛ́ bɛa siin kɛn zɛnaali zɛ̀rɛ biɛ, n din dɔ nə ǹ zɛnɛɛ, ma n taasɛ mà n tá re n sii Lawa a kiri la?

⁴ Lawa bɛ́ a ba dɔlɔ boe ka ganaa fufuu wa, á n kaa sii sii a ganaa, bɛ lɛ nɛ, n tá a bǐɛ̃baa gole kɛ puusə koe? N ba doɛ̃ mà Lawa a bǐɛ̃baa kɛ lɛ nə n nyanɛɛ, mà n wusoo n sii baraan kio wa?

⁵ N too á kaka koe! N nə́ n piã ka Lawa a bǐɛ̃baa kɛ nɛ. Bɛ lɛ taman yii, n doamaa bɛ-n ka dɔlɔ mɛn nɛ, n ná a yɔrɔ boe koɛ n din ni, Lawa a kiri-kurii pinaa, bɛ á re gole koe doo a la yii ni. Bɛa pinaa kɛ nɛ, Lawa á re a kiri kɛ a peperebaa nyɛɛ min tumaa yɔrɔ-a, ka foo-busii gole ne.

⁶ Lawa n die min gogoonmaa sarɛɛ, a kɔnpɛ a nya ǹ dí ni.

⁷ A n die nyin nyabaã koe ǹ tɛnɛn la, min mɛnɛn bɛ́, ǹ nə́ n dinin kɔ sii bǐɛ̃ zɛnaa la biikoo tumaa waáraa, mà Lawa gugurubaa laanka tɔ sonbore kɔ ǹsɛn la, ǹ yii goã koo miɛ̃ yǎa duduu.

⁸ Sɛnɛ, min gialakunun kɛn, Lawa á re a foo-busii gole kɛ nyɛɛ bɛn manɛ, min mɛnɛn bɛ́ n taasɛ ka ǹ dinin sii dinsɔɔ̃ nɛ, ǹ ba koe sonbore lɛ wa yǎa kɔkɔrɔbaa.

⁹ Lawa n die nɔmaa baraa gisĩ sii baraa-zɛnaalin tumaa la, Zuifun man bɔrɔ, ka min mɛnɛn dɔn bɛ́, ǹ ba Zuifun lɛa wa.

¹⁰ Sɛnɛ, min woo min tá sii bǐɛ̃ zɛnɛɛ, Zuifu ni ka min mɛn dɔ bɛ́ a ba Zuifu lɛa wa, Lawa á re gugurubaa laanka tɔ sonbore koe bɛa dɛnaa la, ka là nyantoro ne.

¹¹ Lawa a bɔkɔnlɛ we wa.

¹² Min mɛnɛn nə sii baraa zɛnaa, bɛ̀ ǹ nə́ ǹ ba Lawa a dí-pɛn lɛn siére-a wa, kiri n die n kuri bɛn la, ǹ gã bɛ̀ dí-pɛn gòɛ̃ ná a ba a-n wa. Sɛnɛ, Zuifun mɛnɛn bɛ́ Lawa a dí-pɛn kɛn doɛ̃, ǹ nə́ n tã la ǹ nə́ sii baraa zɛnaa, kiri n die n kuri bɛn la ka dí-pɛn lɛn nɛ.

¹³ Bɛ̀ min tá giɛ li a boo la, a n baa min pepere lɛa Lawa yɔrɔ-a, dí-pɛn kɛn doɛ̃ dinsɔɔ̃ bie boe wa, yǎa a tɔ we a kɔnpii ka Lawa a zii kɛ nɛ.

¹⁴ Lawa a dí-pɛn ba tɔrɔ kɔsɔn kɛn li wa, sɛnɛ, minin tá ǹ bii ǹ nə́ tɔ we, a n kɔnpii ka bɛa dí-pɛn kɛn lɛn nɛ. A laanɛ ǹ ba dí-pɛn lɛn siére-a wa, manə ǹ bɔlɔ sii dɔn ǹ dinin ganaa.

¹⁵ Ǹ dinin tɔ wɔ ǹ gɔn nə nyɛɛ kɛnɛn, mà dí-pɛn bɛ́ giɛ màn mɛn li, mà bɛ n kiɛ̃ nɛ ǹ gɔ́ɔ̃ nɛ. Ǹ dinin foo n bɛa siére pii, ǹ taasiɛn manə ǹ zɛ̀rɛ biɛ biikoo tɛn li, ǹ sonbore kɔ ǹ la biikoo tɛn dɔ li.

¹⁶ Bɛ̀ Lawa kiri kuru minbuiinin la ǹ mɛn pinaa, ka ǹ taasiɛ duriin ni, bɛ tumaa á re soe wɔlɔ fúlu ganaa. Yezu *Krita Boo Tii Kɔɔ̃n mɛn kɔ ma la mà ma pɛ, bɛ n pii miɛ̃.

Zuifun dɔn Lawa bɔlɔ tii boo

¹⁷ A n lɔn kəni, nsɛ kɛ lɛ Zuifu tɔ nə n ganaa? Lawa a dí-pɛn tá ka li, n tá n gòãn koɛ bɛ la, n tá n din dɔ gole koe n Lawa a lɛa.

¹⁸ N tá Lawa lɛ foo sii doɛ̃, n doamaa bɛ nɛ n màn mɛn zɛnaa, a dí-pɛn nə́ bɛ nyaa n nɛ.

¹⁹ Nsɛ n pii, mà nsɛ n yii tere-an nyɛɛnaan sabɔle lɛa, mà nsɛ n wɔlɔ tìdɛnan wɔlɔ fúlu lɛa,

²⁰ mà nsɛ n sii doɛ̃baãnaan-daraali lɛa, ka nɛnyaanan mìinaa nɛ. Ma n bɛ pii, a giala, minbuiin nɛ doamaa bɛ́ nɛ, a Lawa laanka a sonbore kɛ dɔ̃ lɔn, ma nə n bɛ yii yɛ dí-pɛn lɛn nɛ.

²¹ Haya kəni! Nsɛ mɛn bɛ́ min kɔsɔn darɛɛ, wàa na á baa n ba n din darɛɛ wa? Ma n minin darɛɛ, mà ǹ baran wurumu baa wa, n din dɔ n biɛ.

²² N mà ǹ baran naarɛbaa zɛnaa wa, n din nə zɛnɛɛ. N ba giɛ li n dì gìĩ ma wa, sɛnɛ, ma na a *wúlu bɔ ǹ bǎã mànan goɛ.

²³ Ma nə n din gole koe Lawa a dí-pɛn kɛn lɛa, sɛnɛ, ma n dí-pɛn lɛn bɔlɔ tii, n nə́ Lawa tɔ ziziɛ̃.

²⁴ Sonbore, a kiɛ̃maa tá Lawa a boo-n kɛnɛn: «Ka dinin kɛn lɛn lɛa nɛ, tɔrɔ kɔsɔn tá Lawa tɔ ziziɛ̃.»

²⁵ Liere ba a-n wa, là tá kurii ganaa bɛ̀ n tá koe dí-pɛn lɛn lɛ. Sɛnɛ, bɛ̀ n tá ǹ bɔlɔ tii, ta n nə́ n kuru, ma n ka *soroma bɛ́ lɔn Lawa yɔrɔ-a.

²⁶ Tɔrɔ kɔsɔn soroman kɛn, bɛ̀ bɛn min tá koe dí-pɛn lɛ, a nə́ ǹ zɛnɛɛ, a soromabaa lɛ bie re goɛ̃ ka kurii bɛ́ lɔn Lawa yɔrɔ-a wa?

²⁷ Bɛa soroma kɛ lɛ gɔ̀nɔn siĩ wɔ gɔn la, bɛ lɛ n die kiri kuri nsɛ Zuifu lɛ la. A laanɛ n tá kurii ni, n nə́ Lawa a dí-pɛn doɛ̃, n bɛ́ n nə́ ǹ bɔlɔ tii. A da yaa soroma kɛ lɛ n koe ǹ lɛ a tá ǹ zɛnɛɛ.

²⁸ Gɔ̀nɔn ganaa wɔ a Zuifubaa kɛ bie min biɛ Zuifu taãn lɛa wa, gɔ̀nɔn ki a kurii wolebaa kɛ a màn kɔ́n lɛa wa.

²⁹ Gɔ́ɔ̃ wɔ n min biɛ Zuifu taãn lɛa, kurii n boe foo li, Lawa a Yiri Fu barka nɛ, sɛnɛ Lawa a boo kiɛ̃ kɛ dinsɔɔ̃ barka bie wa. Bɛa Zuifu taãn kɛ a tɔ bɔ bie boe minbuiinin li wa sɛnɛ, a n boe Lawa li.