Ozee 7 - LAWA A BOO SONBORE 2011

¹ Ma bɛ́ li ǹ mɛn waáraa, máa ma wusoo ma Izirayeli minin kaka kɔ, bɛa biikoo lɛ nɛ Efrayimu minin sii kɔkɔrɔn laanka Samarii minin sii baraan nə yɛ fúlu-a. Maǹ soɛn boboe kɔn nɛ, wurumunun man kiɛ kionən ne, kanaa, wurumu kurun ba nɛn wa.

² Ǹ bɛ́ sii baraa mɛn tumaa zɛnɛɛ, ma yiri a boe-n wa, sɛnɛ, ǹ ba bɛa taasiɛ we wa. Sisia dinin, ǹ zɛnaa ǹ sii baraan lɛn nə́ ǹ da bii. Maǹ ma yɔrɔ-a miɛ̃ duduu.

Izirayeli minin manə n piɛ̃ ka Lawa nɛ

³ Maǹ kii foo kɔɔ̃n koe ǹ sii baraan taman yii, ǹ goledɛnan foo kɔɔ̃n koe ka ǹ soɛn nɛ.

⁴ Ǹ tumaa n naarɛbaa zɛnɛɛ. Maǹ ka kùsì bɛ́ lɔn, pàã ná a tɛ lon, a laadoo ná a ba zoɛ̃ ganaa wa.

⁵ Ǹ kii a zɔ́n pinaa, ǹ kiodɛnan man duvɛ̃ gigiã mii, bɛ̀ ǹ na a busu kɔ. Yaa wɔ minin ganaa wolen kɛn, kii dɔ na a wɔ kiɛ kun ka bɛn nɛ.

⁶ Ǹ bɛ́ re sii ti mɛn zɛnɛɛ, maǹ bɛ yɔrɔ boe. Maǹ ka kùsì tɛ bɛ́ lɔn. Tèlò-n, ǹ foo n wɛɛ, baayɛlɛ, a n yui, ka tɛ gole bɛ́ lɔn.

⁷ Ǹ tumaa n kakaarɛ ka kùsì fuu bɛ́ lɔn. Maǹ nə́ ǹ sii yɔrɔ-bɔlen dii, ǹ kiin tumaa n kiɛ. Sɛnɛ, ǹ kiin lɛn bii, min goon din yɛ, á ma bii wɔ wa.

⁸ Efrayimu minin nə́ n lɔlɔ kɔn ka tɔrɔ kɔsɔn nɛ, Efrayimu minin lɛn man ka mɔ̀mɔ bɛ́ lɔn ǹ nə́ ǹ tɔn bɔyaa wa.

⁹ Tiin manə ǹ kakabaa a là bii, sɛnɛ, ǹ ba doɛ̃ wa. Ǹ mìi ka na á fulu sɛnɛ, ǹ dinin ba doɛ̃ wa.

¹⁰ Izirayeli tɔrɔn din gole kɔ kɛ lɛ n toɛ min nə ǹ dɔ̃. Sɛnɛ, ǹ lɛ kɔ ǹ nə́ wusoo ǹ nə́ daa Dɛnaa Lawa, ǹ Lawa li wa. A laanɛ siin kɛn lɛn tumaa nə́ ǹ yɛ, ǹ ga ma li wa.

¹¹ Efrayimu minin lɛn man ka zɛrɛkantoan bɛ́ lɔn, ǹ ba n sii bebelee la wa, a giala ǹ ba n taasɛ wa. Ǹ nə́ Ezipti minin bii wɔ maǹ da n dɔ ǹsɛn lɛ, ǹ nə́ woo Asiirii gána nɛ.

¹² Bɛ̀ ǹ tá woe lɔn, man die biɛ koɛ ǹ nɛ. Ma á die ǹ boe lon ka bàanan bɛ́ lɔn, ma dɔlɔ bɔ ǹ ganaa, ka ma goã ma pɛ ǹ zaman nɛ lɔn.

¹³ Ǹ wɔ n ka bɔ̀n nɛ! A giala maǹ baa sii ma nyɛɛnɛ. Ǹ wɔ na á ziziɛ̃! A giala, ǹ nə́ n gòãn dii masɛ ganaa. Bɛ̀ ma doamaa-n ma ǹ si ma ǹ kaa, sɛnɛ, ǹ ba taãn pii maa wɔ paǹ li wa!

¹⁴ Ǹ bɛ́ n lɛ mɛn dii ma li ke, bɛ̀ ǹ nə n duduwəə ǹ piìn la, taãn bie wa. Maǹ nə́ n kiɛ kun, màn mɛn bɛ́ toɛ ǹ *belee laanka duvɛ̃ yɛ. Sɛnɛ ǹ nə́ wusoo ǹ nə́ n bɔ ma kio.

¹⁵ A da yaa, ma din nə má ǹ doroo, ma din nə má pàã kɔ ǹ la. Sɛnɛ, maǹ taasiɛ baraa dinsɔɔ̃ we maa wɔ paǹ li.

¹⁶ Ta kɛn tá wusii ka ǹ kio ne, ǹ bie wusii die masɛ lon a Lawa li wa. Maǹ ka sa bɛ́ lɔn, a nɛ basã. Ǹ goledɛnan kɛn tá re giɛ̃ zia la, ǹ din gole kɔ ǹ boon kɛn taman yii. Bɛ lɛ taman yii Ezipti minin kɛn tá re ǹ diɛ yaa lɛa.