Misee 7 - LAWA A BOO SONBORE 2011

Misee a foo busu ǹ boo

¹ E, masɛ wɔ n ka bɔ̀n nɛ! A giala, man kɔnboe ka da nɛ-nali ni. Man woe giɛ rezɛ̃ da nɛ laanka gɔ́rɔ da nɛ lɛ binaa li. Kɔɔ̃n ma-a taãn-taãnɛ, sɛnɛ, ma màn kɔn yɛ wa.

² Min sonboren nə́ nya ǹ nə́ n bɔ gána lɛ nɛ, min pepere din ba minbuiinin bii doo wa, ǹ ba taasiɛ kɔsɔ we wa, yǎa gɛ̀-dɛ. Didie n kuu koe ǹ miã-a, mà asɛ gɔn dɔ-a.

³ Ǹ gɔn bɛ́ yui sii mɛn a zɛnaa li, baraa nɛ. Goledɛnaa a bǐɛ̃ zɛnɛɛ kooro wa, yǎa màn. Sii yɔrɔ-bɔle a sii yɔrɔ boe kooro wa, yǎa là. Min gole a boo diɛ kooro wa, yǎa a din dùũ sii. Maǹ nə́ n lɛ kiɛ kun ǹ sii baraa zɛnaa.

⁴ Min mɛn din bɛ́ soɛ ǹ bii, bɛ n ka koronkoron bɛ́ lɔn, ǹ min sonbore á baraa á la zama nyan nɛ. N wɔlɔ-lɛduə̃lin nə lɛawaa mɛn boo da, ǹ dɔlɔ bɔ ǹ lɛawaa mɛn boo da, bɛ á ke á dɔ. Sisia, ǹ gɔ́ɔ̃ woɛ̃maa nɛ.

⁵ Ka nyan nə n foo doa kaa tá-kun wolen ganaa doo wa, ka nyan nə n kaa kaa giaáran nɛ doo wa. Haalɛ n din gòã li ǹ lɔ ke, bɛ̀ n tá a yɔrɔ-a, toa n yiri yɛ n da ǹ boo li.

⁶ A giala, nɛgiĩ n die dii puusə koe, nɛlɔ n die yui ǹ dan gialaa, manaa n die yui ǹ zuũ dan gialaa, didie a zɔ́ɔn man die goɛ̃ ka a din a kion minin ni.

⁷ Sɛnɛ, masɛ, ma nə n yii diɛ Dɛnaa Lawa la. Man Lawa din duĩ, maa kirisibaali, maa Lawa á die maa lɛ-dia miɛ.

Foo-doa laanka Lawa nyankɔ

⁸ Wɔa zɔ́ɔn lɛn, ka nyan yaa wɔ wɔ ganaa wa koe! A giala, ta wɔ́ mɛnaa, wɔ á re wusii wɔ yoo. Ta wɔ n giã-n wɔlɔ tì li, Dɛnaa Lawa din nə wɔa tɛ fúlu lɛa.

⁹ Wɔ bɛ́ n wɔ́ sii la Dɛnaa Lawa la, bɛ lɛ n ke, a foo yoo wɔ li. Wɔ doamaa-n wɔ bɛ lɛ a dɔlɔ si wɔ ganaa. Sɛnɛ, a pinaa á die, á die n mìi koɛ wɔa sii li, á die sonbore koe wɔ la. Á die wɔ wɛɛ a wɔ kaa wɔlɔ fúlu li, wɔ á die giɛ a peperebaa ǹ dí kɛ ganaa.

¹⁰ Wɔa zɔ́ɔn lɛn dɔn dinin tá re yii, sìi á die ǹ kuĩ. A giala, ǹ dinin lɛn man nə́ goã pii wɔ-n kɛnɛn: «Dɛnaa Lawa, kaa Lawa lɛ á maa?» Bɛ̀ ǹ tá tɔtɔrɛ kɛn la tán ǹ gòãn giulun ǹ mɛn waáraa, ka zii gialaa ǹ bɛrɛɛ bɛ́ lɔn, wɔ bɛ́ re giɛ ǹ ganaa mɛnɛn!

¹¹ Kaa kiwi lɛ a kungɔnɔn lɛn bɛ́ re wusii ǹ nə n dɔ ǹ mɛn waáraa, bɛa pinaa kɛ lɛ nɛ, kaa gána lɛ giala á die n boe li.

¹² Bɛa pinaa kɛ lɛ nɛ, kaa minin tá re wusii ǹ da ka li. A saa Asiirii ganaa a wo Ezipti yaa, ǹ tɛn tá re boe walan. A saa Ezipti ganaa a wo Efrati tà kɛ yaa, ǹ gialakunun tá re boe walan. Ǹ tɛn tá re boe kɔ̀ mun lɛ-a ǹ tɛn dɔ á re boe kele yiin ni.

¹³ Sɛnɛ, kanaa lɛ gɔ́ɔ̃ kooro á die goɛ̃, kanaa minin lɛn dinin zɛnaa ǹ sii taman yii, ǹ nya ǹ dín lɛn saraa nɛ.

¹⁴ Dɛnaa Lawa, mɛ n zaman nyɛɛnɛ, n nə ǹ lɛduə̃ ka n din a bàlà kɛ nɛ. Bɛa zaman kɛ lɛ, n din wɔn manɛ. Ǹ bɛ́ ke ǹ gɔrɔn daã nɛ, ǹ nə́ giã-n da yii ni, wusoo n mɛ ǹ nyɛɛn doo ka lɛlɛ ǹ bɛ́ lɔn, n wo ǹ ne Basan a nyankɔrɔ basa kɛ nɛ, n wo ǹ ne Galaati gána nɛ.

¹⁵ N bɛ́ soe wɔ nɛ Ezipti gána nɛ ǹ mɛn pinaa, n kaãbaa ǹ siin mɛnɛn zɛnaa bɛa pinaa, wusoo n bɛn lɛn miãn zɛnaa, n nyaa wɔ nɛ.

¹⁶ Tɔrɔ kɔsɔn lɛn dɔn dinin tá re yii, sìi á die ǹ kuĩ, ǹ laanka ǹ pàãdɛnaabaa kɛ lɛ din tumaa nɛ. Ǹ tá re n kaãbiɛ, boo din ná a re n diɛ ǹ la wa. Ǹ tá re goɛ̃ ka too tere-an bɛ́ lɔn.

¹⁷ Ǹ tá re tii piɛ̃ ka miɛ̃ wɔ bɛ́ lɔn, màn nɔ̀ giɛɛraa tán wolen kɛn wɔbaa nɛ. Nyɛ́ɛ á die ǹ kuĩ, ǹ tá re nyɛ́ɛ biɛ n nɛ. Dɛnaa Lawa, wɔa Lawa, ǹ tá re soe ǹ duru ǹ bǎãn nɛ, bɛ̀ ǹ da n li, ǹ gɔ̀nɔn nə́ bìn diɛ.

¹⁸ N kɔnboe n ka wàa nɛ Lawa? N din nə minbuiinin sii baraa siɛ boe ǹ mìi ni. N din nə ǹ bɔlɔ-tii siin kɛn toɛ ǹ nɛ. N minin lɛn mɛnɛn yii goã koo, n din wɔn lɛn, n foo a die goɛ̃ yoo-n bɛn li miɛ̃ yǎa duduu wa. A giala, min makara doɛ̃ lɛ n kɔɔ̃nɛ n ganaa.

¹⁹ Á die wusii a makara bɔ wɔ-a doo. Á die wɔa sii baraan toɛ wɔ nɛ, á ǹ tuturu a ǹ bɔ wɔ-a lenlen.

²⁰ N tá re n sonborebaa nyɛɛ Zakɔba tɔrɔn kɛn manɛ, n tá re n giaárabaa nyɛɛ Abrahamu tɔrɔn kɛn manɛ. N lɛ kɔ wɔ digolon la ka sii mɛn nɛ haalɛ bibi, a din lɛ n ka bɛ nɛ.