Misee 5 - LAWA A BOO SONBORE 2011

Kii mɛn bɛ́ re Izirayeli kirisibiɛ

¹ Dɛnaa Lawa pɛ: Kasɛn Bɛtlehɛmu Efrataa minin lɛn, Zudaa tɔrɔn kiwi damata kɛ bii, ka dinin kiwi lɛ n kiɛɛrɛ sɛn. Sɛnɛ, min nə die boe bɛ lɛ nɛ maa wɔ lɛa, a giã Izirayeli minin kɛn mìi la. A boo tá bii-a, á belebɔ, haalɛ bibi sii ni.

² Bɛ lɛ na á toa, Lawa á re n gɔn boe a zaman ganaa, yǎa nɔnaa kɛ nɛ yii. Bɛa biikoo li, ǹ dɔɔ̃nɔn lɛn mɛnɛn bɛ́ re n sɔlɛɛ a nɛ, bɛn tá re die kiɛ kun ka Izirayeli minin gialakunun kɛn nɛ.

³ A din lɛ n die n doɛ, a na a minin lɛn nyɛɛnaan bɔ, ka Dɛnaa Lawa pàã nɛ, ka a Dɛnaa Lawa kɛa kiibaa nɛ. A minin lɛn tá re goɛ̃ là nyantoro la. A giala, a kũ sisia ganaa, a tɔ á re gole koe, yǎa kanaa paǹ tumaa nɛ.

⁴ A din lɛ n die die ka là nyantoro ne. Bɛ̀ Asiirii minin nə́ daa kɔ wɔa gána kɛ lɛ ǹ mɛn pinaa, bɛ̀ ǹ gòã mɛ wɔa pàãman kɛn kion ǹ mɛn pinaa, wɔ á die zia-baali damata kiɛ ǹ ganaa.

⁵ Ǹ tá re Asiirii gána kɛ lɛduĩ ka ziabaa ǹ gɔya nɛ, Nimɔrɔdi a gána kɛ lɛ, ǹ tá re a minin lui ka sɛmiɛ̃ nɛ, bɛ̀ ǹ wo ǹ koa ǹ kiɛnlɛ-a. Bɛ̀ Asiirii minin lɛn nə́ wɔ wɔa wɔ lɛ nɛ, bɛ̀ ǹ nə́ wɔ wɔa gána nɛ, a din lɛ á re wɔ sii ǹ la.

Izirayeli minin man tɔrɔ kɔsɔn bii

⁶ Zakɔba tɔrɔn mɛnɛn yii goã koo, bɛn tá re giɛ̃ tɔrɔ gigiã kɔsɔn bii. Ǹ tá re ǹ biɛ ka pele bɛ́ lɔn boe Dɛnaa Lawa li, ka la mu bɛ́ lɔn buu ganaa. Bɛn ba giɛ minbuiin nɛ a màn kɔn li wa, ǹ ba n foo doɛ minbuiinin ganaa ka sii kɔn nɛ wa.

⁷ Zakɔba tɔrɔn mɛnɛn yii goã koo, ǹ tá re giɛ̃ gána kɔsɔn minin bii, ǹ tá re giɛ̃ tɔrɔ gigiã kɔsɔn bii, kaka ka yàra bɛ́ lɔn don mànan bii, ka yàra ten bɛ́ lɔn sèren bii. Bɛ̀ á bɔ bǎã mɛn nɛ, a n màn kuĩ a wɔwoɛ̃ kɔn, min dɔ a boe la á sii la wa.

⁸ N gɔn saa n baa zɔ́ɔbaa wolen lɛn li miɛ̃, toa n zɔ́ɔn lɛn tumaa papaã.

⁹ Dɛnaa Lawa a da ǹ boo á ke: «Bɛa pinaa kɛ lɛ nɛ, ma á die kaa sùin kɛn wɛɛ ma ǹ bɔ ka bii, ma á die kaa wotoron kɛn papaɛ̃ ma ǹ bɔ ka bii.

¹⁰ Ma á die kaa gána lɛ a kiwin yui, kungɔnɔn mɛnɛn bɛ́ ǹ lɛnpɛnɛ, ma á die bɛn tumaa wurii.

¹¹ Ma á die kɔnkoãbaa kɛ niɛ̃ ma bɔ ka gɔn lɛ-a, wɔ-kũli á die goɛ̃ ka bii doo wa.

¹² Kaa dìn laanka kaa tíĩn kɛn, ma á die bɛn wurii ma ǹ bɔ ka bii. Ka dinin nə mànan mɛnɛn zɛnaa ka ka gɔn nɛ, ka a die kiɛ tán bɛn giulun doo wa.

¹³ Kaa bìbìn kɛn, ka á wúlu boe ǹ ganaa, ma á re bɛn wɔwoɛ̃, ma á die kaa kiwin kɛn yui.

¹⁴ Tɔrɔn mɛnɛn bɛ́ ǹ maa boo si wa, ma foo á die yui bɛn li parsiini, ma á die dɔlɔ boe ǹ ganaa.»