Minin nimi 1 - LAWA A BOO SONBORE 2011

Izirayeli minin nimii bibinaa

¹ Izirayeli minin lɛn soo a bɔ Ezipti gána nɛ a lɛ̀ paabaa ǹ wɔ, a mui paabaa ǹ wɔ a lɛawaa bibinaa pinaa, Dɛnaa Lawa boo da ka Muizu ni, Sinayii diə gole ne, kɔn yɛ ka Lawa nɛ ǹ kion kɛ nɛ, á pɛ:

² «N din laanka Aarɔn nɛ, ka Izirayeli a zaman lɛ tumaa nimi tanlɛ yii li, sumu lɛ yii li, ka giĩn tumaa saa a giala-a gogoon ka ǹ nimi.

³ Giĩn mɛnɛn tumaa lɛ̀ fuə bɛ́ nɛ, ka lɛ̀ fuə ka kio ne, ǹ mɛnɛn tumaa bɛ́ Izirayeli minin lɛa, ǹ nə́ boe sɔraasibaa la, ka bɛn nimi zia-baali kuru lɛ yii li.

⁴ Ka tɔrɔ gogoonmaa a giĩ goon kũ, giĩ mɛn nə́ ke kɛdɛnaa lɛa, ka ti ka dinin ganaa.

⁵ Giĩn mɛnɛn lɛn bɛ́ re n doe ka lɛ, bɛn tɔn nə́ ke: Urubɛn tɔrɔn bii: Sedewuru a nɛgiĩ Elisuuru;

⁶ Simiɔn tɔrɔn bii: Kurisadayii a nɛgiĩ Selumiyeli;

⁷ Zudaa tɔrɔn bii: Aminaadaabu a nɛgiĩ Naasɔn;

⁸ Isakaara tɔrɔn bii: Sowaara a nɛgiĩ Netaneli;

⁹ Zabulɔn tɔrɔn bii: Elɔn a nɛgiĩ Eliabu;

¹⁰ Zozɛfu a nɛgiĩ Efrayimu tɔrɔn bii: Amiwudu a nɛgiĩ Elisamaa; Zozɛfu a nɛgiĩ Manaasee tɔrɔn bii: Pedsuuru a nɛgiĩ Gamulieli;

¹¹ Bɛnzamɛn tɔrɔn bii: Gideonii a nɛgiĩ Abidan;

¹² Dan tɔrɔn bii: Amisadayi a nɛgiĩ Ayiezɛɛrɛ;

¹³ Asɛɛrɛ tɔrɔn bii: Okran a nɛgiĩ Pagiyeli;

¹⁴ Gaadi tɔrɔn bii: Dewɛli a nɛgiĩ Eliasaafu;

¹⁵ Nɛfutalii tɔrɔn bii: Eyinan a nɛgiĩ Ayiraa.»

¹⁶ Ǹ zaman lɛ a min mɛnɛn bii wɔ, ǹ dinin man ka kɛn nɛ. Maǹ nə ǹ tɔrɔn goledɛnan lɛa, ǹ nə́ Izirayeli gána a sɔraasin nyɛɛnaandɛnan dɔn lɛa.

¹⁷ Bɛa giĩn kɛn lɛn ǹ nə́ ǹ bɔ, Muizu laanka Aarɔn nə́ ǹ kũ ǹ nə́ ǹ baa ǹ kiodɛnan lɛa.

¹⁸ Bɛ kio, ǹ nə́ zaman lɛ tumaa sɔkɔn mui paabaa ǹ wɔ a lɛawaa bibinaa pinaa. Izirayeli minin lɛn nə́ n tɔrɔ basan pɛ tanlɛ yii li, sumu lɛ yii li. Giĩn mɛnɛn lɛ̀ fuə bɛ́ nɛ, ka lɛ̀ fuə ka kio ne, ǹ nə́ goã bɛn siɛ a giala-a gogoon ǹ tá ǹ tɔn kiɛ̃.

¹⁹ Muizu Izirayeli minin lɛn nimi Sinayii diə gole kɛ nɛ, ka Dɛnaa Lawa goã á wɔ a too-n lɔn.

^20-43 Ǹ nə́ Izirayeli tɔrɔn lɛn gogoonmaa a minin nimi tanlɛ yii li, sumu lɛ yii li. Giĩn mɛnɛn tumaa lɛ̀ fuə bɛ́ nɛ, ka lɛ̀ fuə ka kio ne, ǹ nə́ boe sɔraasibaa la, ǹ nə́ bɛn tɔn goa. Maǹ nə́ minin nimii lɛ giala kɔ Zakɔbu a nɛgiĩ bibinaa Urubɛn tɔrɔn ganaa. Ǹ minbuiin lɛ mɛn yɛ, bɛa kaa kun: Urubɛn tɔrɔn: min duu pusiwensɔrɔ ka biɛsooro (46 500) Simiɔn tɔrɔn: min duu posoorowenmanangɔrɔ ka biɛsɔɔ (59 300) Gaadi tɔrɔn: min duu pusiwensooro ka biɛsɔrɔ ka posooro (45 650) Zudaa tɔrɔn: min duu pɔsɔbaawensii ka biɛsɔrɔ (74 600) Isakaara tɔrɔn: min duu posoorowensii ka biɛsii (54 400) Zabulɔn tɔrɔn: min duu posoorowensɔbaa ka biɛsii (57 400) Zozɛfu a nɛgiĩ Efrayimu tɔrɔn: min duu pusi ka biɛsooro (40 500) Zozɛfu a nɛgiĩ Manaasee tɔrɔn: min duu pɔsɔɔwenpaa ka biɛpaa (32 200) Bɛnzamɛn tɔrɔn: min duu pɔsɔɔwensooro ka biɛsii (35 400) Dan tɔrɔn: min duu pɔsɔrɔwenpaa ka biɛsɔbaa (62 700) Asɛɛrɛ tɔrɔn: min duu pusiwengoon ka biɛsooro (41 500) Nɛfutalii tɔrɔn: min duu posoorowensɔɔ ka biɛsii (53 400).

⁴⁴ Muizu laanka Aarɔn nɛ, ka Izirayeli gána a nyɛɛnaandɛnaa fulupaa kɛ nɛ, tɔrɔ lɛ a gogoon wɔ lɛa, bɛn nə zaman lɛ nimi ǹ nə́ minbuiin lɛ mɛn yɛ, bɛn man ka kɛn nɛ.

⁴⁵ Ǹ Izirayeli minin mɛnɛn tumaa nimi, ǹ lɛ̀ ń lɛ̀ fuə, ka lɛ̀ fuə ka kio ne, ǹ nə́ boe sɔraasi baa dɔ la,

⁴⁶ bɛn tumaa a kaa kun na á kɔnpɛ ka min duu biɛ sɔrɔ ka duu sɔɔ ka biɛsooro ka posooro (603 550).

⁴⁷ Sɛnɛ, ǹ goã ǹ nə́ *Levii tɔrɔn nimi kun ka Izirayeli min gialakunun lɛn nɛ wa.

⁴⁸ A giala, Dɛnaa Lawaa na á goã á pɛ Muizu ni:

⁴⁹ «N baran Levii tɔrɔn lɛn nimi kun ka Izirayeli min gialakunun lɛn nɛ wa.

⁵⁰ Lɛ kɔ kɔn la ǹ boon kɛn bɛ́ kion sonbore mɛn nɛ, bɛa sii wɔ Levii tɔrɔn lɛn sɛn gɔn, ka zìã kion sonbore lɛ a màn baaran tumaa laanka a dí nya ǹ mànan nɛ. Levii tɔrɔn lɛn dinin man die kion sonbore lɛ guĩ, kun ka a màn baaran tumaa nɛ, ǹ na a dí nya. Ǹ tá re ǹ giã ǹ bǎãn dɔdoɛ, bɛ̀ ǹ kion sonbore lɛ da bii ni.

⁵¹ Bɛ̀ bɛa mɔnaa zìã lɛ tá re n siɛ ǹ mɛn waáraa, Levii tɔrɔn lɛn nə bɔbɔkɔnlɛ. Bɛ̀ mɔnaa zìã lɛ tá n doɛ giã ǹ bǎã kɔsɔ-n doo, Levii tɔrɔn lɛn die ǹ wɔkɔnlɛ. Bɛ̀ min kɔsɔ tɔrɔ nə́ n mɔrɔ mɔnaa zìã lɛ ganaa, ǹ dɛnaa nyin nə n boe.

⁵² Izirayeli minin lɛn didie die a giã a giã ǹ bǎã nɛ, didie giã kunu a zanzan ganaa, a kɔnpɛ ka a sɔraasi kuru ni.

⁵³ Sɛnɛ, Levii tɔrɔn kɛn, bɛn die ǹ nə ǹ giã ǹ bǎãn dɔdoa, ǹ lɛ kɔ kɔn la ǹ boon koa ǹ mɔnaa zìã lɛ da bii ni, màn mɛn bɛ́ toɛ masɛ foo baran yoo Izirayeli zaman lɛ li wa. Levii tɔrɔn man die lɛ kɔ kɔn la ǹ boon koa ǹ mɔnaa zìã lɛ a dí nyɛɛ.»

⁵⁴ Izirayeli minin lɛn man nə́ bɛ lɛ zɛnaa. Dɛnaa Lawa goã á màn mɛn pɛ Muizu ni, ǹ nə́ zɛnaa á kɔnpɛ ka bɛ-n ka te.