Matiə 22 - LAWA A BOO SONBORE 2011

Yezu boo giməə mɛn da kɔn wɔ ǹ màn-bii wɔ paǹ li

¹ Yezu wusoo á boo giməə da a kialandɛnan laanka zaman nɛ, á pɛ:

² – Lon a kiibaa lɛ a kɔnboe n ke: Kii goon ne, a ná a nɛgiĩ a kɔn wɔ ǹ màn-bii zɛnaa.

³ A ná a dí-nyalin dia mà ǹ wo minin bíi ǹ da kɔn wɔ ǹ màn bii. Sɛnɛ, bɛn nə́ n piã mà ǹsɛn ba die wa.

⁴ Á wusoo á dí-nyali kɔsɔn dia, mà ǹ wo pɛ ǹ nɛ: «Á ke, man má màn-bii gole zɛnaa, má maa dii gɔ̀lɔ̀n laanka maa tɔɔ nyɔɔnaan dɛ, sii din tumaa nə́ n yɔrɔ bɔ á nya. Ka da kɔn wɔ ǹ màn bii.»

⁵ Sɛnɛ, ǹ wo min mɛnɛn bíi, bɛn nə da sii li wa, ǹ nə́ kiɛ̃ ǹ nə́ woo ǹ laadoo dín nya. Goon nə́ woo a wurun, goon nə́ woo a pii kɔ ǹ bǎã nɛ,

⁶ gialakunun lɛn nə́ kii lɛ a dí-nyalin lɛn kũ, ǹ nə́ fuu nyaa ǹ yii ni, yǎa ǹ nə́ gã.

⁷ Kii lɛ foo yoo. A ná a sɔraasin dia, mà ǹ wo bɛa gɛ̀-dɛlen kɛn lɛn dɛ, ǹ tɛ da ǹ kiwi ganaa.

⁸ Bɛ kio, á tɔ́n pɛ a dí-nyalin lɛn manɛ: «Kɔn wɔ ǹ màn-bii lɛ yɔrɔ nə́ n bɔ á nya. Sɛnɛ, ka wo min mɛnɛn bíi a ganaa, bɛn doamaa bie wa.

⁹ Bɛ̀ á miɛ̃, ka wo ziin sawaa kɔn-a ǹ bǎã nɛ, ka bɛ́ re min mɛn tumaa yii, ka ǹ bíi ǹ da kɔn wɔ ǹ màn bii.»

¹⁰ Bɛa dí-nyalin lɛn nə́ woo golee ziin la, ǹ min mɛn tumaa yɛ, a baraan nɛ ka a bǐɛ̃n nɛ, ǹ nə́ ǹ tumaa kaa kun ǹ nə woo ǹ ne, yǎa kɔn wɔ ǹ kion lɛ pã ka minbuiin ni.

¹¹ Ǹ min mɛnɛn bíi, kii lɛ wɔ á ga ǹ ganaa. Á giĩ goon yɛ, wo kɔn wɔ ǹ bǎã nɛ ǹ mɔnaa ba a ganaa wa.

¹² Á tɔ́n pɛ nɛ: «Maa giaáragiĩ, a na á saa lɔn n wɔ kànaa, kɔn wɔ ǹ mɔnaa dɔ ná a ba n ganaa wa?» Giĩ lɛ nə n lɛ da boo-n wa.

¹³ Kii lɛ tɔ́n pɛ a dí-nyalin manɛ: «Ka kũ ka a gòã laanka a gɔnɔn yii, ka saa ka zũ kanaa wɔlɔ tì li. Á die wuu pii walan, a sɔ kere bɔ.»

¹⁴ Yezu tɔ́n pɛ: «Sonbore ne, Lawa min tumaa bíi, sɛnɛ, a min mɛnɛn bɔ, bɛn ba tɛ wa.»

Nyin giɔ̀mɔ saraa boo

¹⁵ *Fariziɛ̃n kɔnɔn nə́ woo kɔn yɛ màn mɛn bɛ́ toɛ, ǹ wo Yezu lɛ zulu, ǹ kũ ka a din lɛ gɔ́ɔ̃ ǹ boo ne.

¹⁶ Ǹ nə́ ǹ kialandɛnan dia, kun ka min mɛnɛn bɛ́ kii Erɔdi a pàã li, mà ǹ wo pɛ Yezu ni: «Mìinaa, wɔsɛn tá doɛ̃, n tá sonbore pii, n tá minin darɛɛ Lawa a zii ganaa ka a peperebaa nɛ, n ba nyɛ́ɛ biɛ minbuiinin taasiɛ-n wa, a giala n ba minin bɔkɔnlɛ we wa.

¹⁷ Á siĩni wɔ nyin giɔ̀mɔ saraa Rɔmun kii gole gole la hinlaa wɔ baran saraa la wa? N taasiɛ pɛ wɔsɛn manɛ bɛ wɔ paǹ li.»

¹⁸ Sɛnɛ, Yezu bɛ́ á ǹ gɔ́ɔ̃ a baraabaa dɔ̃, á tɔ́n pɛ ǹ nɛ: «Gɔ́ɔ̃ tì-an kɛn! Wàa na á baa ka tá ǹ diɛ masɛ gɔ́ɔ̃ li?

¹⁹ Ǹ bɛ́ nyin giɔ̀mɔ lɛ sarɛɛ ka wɔrɔ mɛn nɛ, ka nyaa masɛ nɛ ma ga a ganaa.» Ǹ bɛ́ ǹ nə́ kɔ la,

²⁰ á tɔ́n nɔ̀n da ǹ la: «Die mìi nyin laanka die tɔ n ke kiɛ̃-n la?»

²¹ Ǹ nə́ tɔ́n pɛ nɛ: «Kii Gole kɛ nɛ.» Yezu tɔ́n pɛ ǹ nɛ: «Màn mɛn bɛ́ kii wɔ lɛa, ka bɛ kɔ kii la. Màn mɛn dɔ bɛ́ Lawa wɔ lɛa, ka bɛ kɔ Lawa la.»

²² Ǹ bɛa boo lɛ ma lɔn, á kaãbaa da ǹ ganaa parsiini. Ǹ nə́ kiɛ̃ ǹ nə́ Yezu toa walan, ǹ nə́ woo.

Nɔ̀n mɛn nə n da geren yii kaa wɔ paǹ li

²³ *Sadusɛɛ̃n mà geren yii a re kiɛ wa. A din pinaa lɛ nɛ, bɛn kɔnɔn nə́ woo Yezu li ǹ nə́ nɔ̀n da la:

²⁴ «Mìinaa, Muizu na á pɛ Landa gɔ́ɔ̃ nɛ: bɛ̀ giĩ mɛn gã a ná a lɔ toa walan, a ná a nɛ yɛ a ganaa wa, ǹ dɔɔ̃n doamaa nɛ a lɔ giɔɔrɔ lɛ saa, a nɛnyaanan yɛ a ganaa, ǹ dɔɔ̃n papaã wole lɛ wɔn lɛa.

²⁵ A da yaa, dɔɔ̃ngiĩ sɔbaa kɔ́n na á goã wɔsɛn piɛ. Ǹ goledɛnaa mɛn nə lɔ saa, bɛ́ gã, a nɛ toa a kio wa. Min mɛn bɛ́ koɛ la, bɛ́ lɔ lɛ saa.

²⁶ Ǹ paabaa ǹ wɔ dɔ na á n baa miɛ̃, ka ǹ sɔɔbaa ǹ wɔ nɛ, yǎa a woo ǹ sɔbaamaa lɛ tumaa yaa.

²⁷ Ǹ dinin tumaa a gɛ̀ kio, lɔ lɛ dɔ́ gã.

²⁸ Haya! Geren yii kaa pinaa, lɔ lɛ n die ǹ sɔbaamaa lɛ goon mɛn wɔ biɛ? A da yaa, ǹ dinin tumaa dɔ́ saa lɔ lɛa.»

²⁹ Yezu tɔ́n pɛ ǹ nɛ: – Ka sã á la yii ni. A giala ka a Lawa a boo giala miɛ wa, ka a doɛ̃ dɔn mà pàã tá Lawa lon wa.

³⁰ Ka dɔ̃, mà bɛ̀ geren yii kaa ǹ mɛn waáraa, mà giĩ a re lɔ siɛ wa, lɔ dɔ a re we giĩ li wa, sɛnɛ, ǹ tumaa n die goɛ̃ ka Lawa a piɛ a dia dí-a wolen bɛ́ lɔn.

³¹ Màn mɛn bɛ́ kiɛ̃-n Lawa a boo-n geren yii kaa wɔ gɔn la, ka bɛ pɛ wa koɛ?

³² Lawa pɛ: «Man Abrahamu a Lawa lɛa, Izaaki a Lawa lɛa, Zakɔba a Lawa lɛa.» Yezu tɔ́n pɛ: «Lawa lɛ bie geren Lawa lɛa wa, a n yiikoonaan Lawa lɛa. Bɛ n nyɛɛ, mà bɛa minin kɛn lɛn ǹ nə́ gã lɛlɛ, mà ǹ yii á koo sisia.»

³³ Zaman lɛ bɛa boo lɛ ma lɔn, á kaãbaa da ǹ ganaa parsiini.

Dí-pɛ mɛn a sii bɛ́ kaka á la ǹ miãn manɛ

³⁴ Fariziɛ̃n bɛ́ ǹ nə́ ma mà Yezu Sadusɛɛ̃n naa ka boo ne, ǹ dɔn nə́ woo n lɛ sɔkɔn.

³⁵ Ǹ goon ne, a n landa sii-daraalin goledɛnaa lɛa, bɛ́ nɔ̀n goon da Yezu la, á n da a gɔ́ɔ̃ li ni:

³⁶ «Mìinaa, landa gɔ́ɔ̃ nɛ, dí-pɛ lɛ mɛn a sii n kaka á la ǹ miãn manɛ?»

³⁷ Yezu tɔ́n pɛ nɛ: «N Dɛnaa Lawa narɛ ka n foo din tumaa nɛ, ka n gɔ́ɔ̃ din tumaa nɛ, ka n pàã din tumaa nɛ.»

³⁸ Dí-pɛ bibinaa lɛ n ka bɛ nɛ, a din lɛ a sii n kaka.

³⁹ A paabaa ǹ wɔ mɛn a sii bɛ́ kaka ka bɛ bɛ́ lɔn, bɛ n ka kɛ nɛ: «N miã kɔsɔ narɛ ka n bɛ́ n din narɛ lɔn.»

⁴⁰ Muizu a Landa boon laanka Lawa a boo gii-dalin daraa nɛ, ǹ dinin tumaa mìi n doa-n bɛa dí màn paa kɛ lɛ ganaa.

Minin Nyin-sili lɛ laanka Davida a wàa n kɔn nɛ?

⁴¹ Yezu bɛ́ á Fariziɛ̃n yɛ, ǹ nə́ ǹ lɛ sɔkɔn, á woo nɔ̀n da ǹ la:

⁴² «Minin Nyin-sili lɛ, Lawa n die diɛ, kaa taasiɛ n ka wàa-n bɛ wɔ gɔn la? Die tɔrɔ nɛ?» Ǹ nə́ tɔ́n pɛ nɛ: «Kii Davida tɔrɔ nɛ.»

⁴³ Yezu tɔ́n pɛ ǹ nɛ: – Wàa na á baa, Davida dinmaa bíi, ka Lawa a Yiri Fu barka nɛ, mà asɛ a Dɛnaa? A na á pɛ kɛnɛn:

⁴⁴ Dɛnaa Lawa pɛ maa Dɛnaa nɛ: «Giã ma gusin, yǎa ma gɔ̀lɔ̀baa lɛ piɛ̃ koe n la, n zɔ́ɔn nə die kiɛ tán n gòãn giulun.»

⁴⁵ Bɛ̀ Davida dinmaa lɛ bíi, "maa Dɛnaa", a Davida tɔrɔ baa dinsɔɔ̃ giala na á saa lɔn?

⁴⁶ Min kɔ́n na a lɛ si ka boo kɔ́n nɛ wa. A kũ bɛ lɛ ganaa lɔn, min kɔ́n yii wɔ doo á nɔ̀n da la wa.