Matiə 20 - LAWA A BOO SONBORE 2011

Yezu boo giməə mɛn da rezɛ̃ da wuru dí-nyalin wɔ paǹ li

¹ Lawa a dí lɛ a nya ǹ gɔn a kɔnboe n ka kɛ nɛ: Kɛdɛnaa goon na á da wuru bɔ, bɛa da lɛ tɔ n *rezɛ̃ da. Ǹ kɔ́n pinaa, á yoo baayɛlɛ yiisoone, a n giɛ dí-nyalin li ǹ kiɛ a nɛ.

² A laanka dí-nyalin lɛn nə́ lɛ kɔ kɔn la, ka pinin goon dí nya ǹ giɔ̀mɔ nɛ ǹ saraa lɛa. Bɛ kio, á ǹ dia a wuru lɛ nɛ.

³ Wasa bɛ́ á kaa, á wusoo á soo kanaa doo, á kɔsɔn yɛ golee-n bii-a, dí ba ǹ gɔn wa.

⁴ Á tɔ́n pɛ ǹ nɛ: «Ka dɔn nə wo dí nya maa wuru-n, màn mɛn bɛ́ kɔnpii kaa saraa nɛ, ma á die bɛ koe ka la.»

⁵ Ǹ nə́ woo. A bɛ́ á wusoo á soo kanaa penleen ne, bɛ kio doo, wasa lɛ kanaa-a, a dí-nyalin mɛnɛn yɛ, á bɛn dɔn dia miɛ̃.

⁶ Wasa miɛ-n lɛn li, á soo á kɔsɔn dɔn yɛ golee-n bii-a, á tɔ́n nɔ̀n da ǹ la: «Wàa na á baa ka lɛawaa kaara lɛ nya baãnbii-a kooro ka n ka a dí nyɛɛ wa?»

⁷ Ǹ nə́ tɔ́n pɛ nɛ: «A giala min na a wɔsɛn goa dí-n wa.» Á tɔ́n pɛ ǹ nɛ: «Ka dɔn nə wo maa wuru-n.»

⁸ Wasamiɛn nɛ, yoo waáraa bɛ́ á dɔ, á tɔ́n pɛ a dí sii yɔrɔ-bɔle ne: «Lɛ dia dí-nyalin lɛn la, n didie a saraa kɔ la, a saa da nyɔɔbaa wolen ganaa a wo bibinaa wolen yaa.»

⁹ Min mɛnɛn nə dí giala kɔ wasamiɛn lɛn li, bɛn nə́ daa ǹ nə́ pinin goon dí nya ǹ giɔ̀mɔ yɛ.

¹⁰ Min mɛn tumaa dí giala kɔ ǹsɛn nyɛɛnɛ, bɛn bɛ́ die, ǹ nə́ taasɛ mà ǹsɛn wɔ á die liɛ bɛ nɛ. Sɛnɛ, ǹ dɔn gogoonmaa na á pinin goon dí nya ǹ giɔ̀mɔ yɛ.

¹¹ Maǹ nə́ bɛa wɔrɔ lɛ si, bɛ̀ ǹ tá sɛ̀ bisin pii wurudɛnaa lɛ ganaa ǹ lɛ giulun:

¹² «Da nyɔɔbaa wolen kɛn, ǹ dí nya á kiɛ̃ biikoo goon la wa, maǹ bɛn saraa biɛ goon ka wɔsɛn wɔ nɛ, a da yaa wɔsɛn nə́ lɛawaa goon dí kɛ lɛ a nɔmaa si wɔ ganaa, wasa panpan kɛ giulun!»

¹³ Á tɔ́n pɛ ǹ goon ne: «Giaáragiĩ, masɛ bie mɛnɛɛ n la wa. Wɔ bie wɔ́ lɛ kɔ kɔn la ka pinin goon dí nya ǹ giɔ̀mɔ nɛ kaa saraa lɛa wa ya?

¹⁴ N wɔ si n woo. Ma màn mɛn kɔ n la, a na á kɔɔ̃n kɔ ma-a ma bɛ lɛ miã kɔ a dɔ la.

¹⁵ Bɛ̀ ma tá li ma sii mɛn zɛnaa ka ma din a wɔrɔ nɛ, ma a boe la ma bɛ zɛnaa-n wa? Ma nə n yii baraa boe ma li sii sonbore zɛnaa lɛ taman yii!»

¹⁶ Yezu tɔ́n pɛ: «A n miɛ̃, kiodɛnan tá re nyɛɛnaandɛnan biɛ, min mɛnɛn bɛ́ nyɛɛnaandɛnan lɛa, bɛn tá re kiodɛnan biɛ.»

Yezu a gɛ̀ laanka a yii kaa boo diɛ a gunyin sɔɔbaa ǹ wɔ

¹⁷ Yezu bɛ́ re woe Zeruzalɛmu, a ná a kialandɛnaa fulupaa lɛ kũ ǹ dininsɔɔ̃nɔn, ǹ bɛ́ zii la á pɛ ǹ nɛ:

¹⁸ «Haya, wɔsɛn nə́ ke woe Zeruzalɛmu. Ǹ tá re Min a Nɛgiĩ we Lawa a wúlu-bɔlen goledɛnan laanka landa sii-daraalin gɔn walan. Bɛn tá re ma zɛ̀rɛ biɛ mà ma doamaa-n ka gɛ̀ nɛ.

¹⁹ Ǹ tá re ma koe tɔrɔ kɔsɔn la. Bɛn tá re yaa we ma ganaa, ǹ ma duwəə ka sɛ̌n nɛ, ǹ ma dere gɔn ganaa. Ma a gɛ̀ lɛawaa sɔɔ, ma yii á die kiɛ.»

Zaaki laanka Zaã a náa màn mɛn nyankɔ Yezu la

²⁰ Zebedee a lɔ nə́ n zɔ̃ á dɔ Yezu li ka a nɛnyaan min paa nɛ, á kaa tán-a a giulun, a ná a nyankɔ mà a bǐɛ̃ kɔ asɛ ganaa.

²¹ Yezu tɔ́n nɔ̀n da la: «Ma n giɛ wàa li?» Á tɔ́n pɛ nɛ: «Bɛ̀ n dɔ n kiibaa lɛ nɛ ǹ mɛn waáraa, masɛ a nɛnyaan min paa ke bii-a, lɛ kɔ goon nə giã n gusin, goon nə giã n gɔsɛ.»

²² Yezu tɔ́n pɛ: «Ka bɛ́ màn mɛn nyankoe, ka a doɛ̃ wa. Masɛ bɛ́ re là-paparɛɛ mɛn yii, ka tá re boe la ka bɛ si ka ganaa?» Ǹ nə́ tɔ́n pɛ Yezu ni: «Wɔsɛn tá boe la.»

²³ Yezu tɔ́n pɛ ǹ nɛ: «Ka tá re masɛ a là-paparɛɛ kɛ tɔrɔ yii sɛn. Sɛnɛ, min mɛn bɛ́ re giɛ̃ ma gusin hinlaa ma gɔsɛ, masɛ bie bɛ yɔrɔ boe wa. Maa Díi Lawa bǎãn lɛn zɛnaa min mɛnɛn manɛ, bɛa dɛnan wɔn manɛ.»

²⁴ Kialandɛnaa fù gialakun lɛ bɛa boo lɛ ma lɔn, ǹ foo busu dɔɔ̃n min paa lɛ li.

²⁵ Yezu tɔ́n nə ǹ tumaa bíi, á pɛ ǹ nɛ: «Ka á doɛ̃, tɔrɔ kɔsɔn kiin man boe ǹ minin yii ni, ǹ pàãdɛnan man pàã nyɛɛ ǹ nɛ.

²⁶ Bɛ miã doamaa bie a n zɛnaa ka bii wa. Bɛ̀ min mɛn tá ka bii, a n giɛ goledɛnaabaa li, bɛa dɛnaa doamaa nɛ a n baa kaa dí-nyali lɛa.

²⁷ Bɛ̀ min mɛn dɔ tá ka bii, a n giɛ nyɛɛnaandɛnaabaa li, yǎa ǹ dɛnaa nə n din biɛ kaa bɛ̀rɛ lɛa.

²⁸ Min a Nɛgiĩ dinmaa kɛ lɛ na á daa miɛ̃, a bie á daa mà minin nə dí nya asɛ-n wa, sɛnɛ, a na á daa dí nya minin manɛ, á n din nyin kɔ minbuiin tumaa nyin si ǹ giɔ̀mɔ lɛa.»

Yii tere-a min paa yii buĩ

²⁹ Yezu laanka a kialandɛnan bɛ́ soe Zerikoo, zaman gole kɔ ǹ kio lɛ.

³⁰ Yii tere-a min paa kɔ́n nə́ goã giã-n tán-a zii para-a. Ǹ bɛ́ ǹ nə́ ma mà Yezu n kiɛ̃, ǹ nə́ yoo ǹ nə́ n lɛ dɛ a ganaa: «Dɛnaa, kii Davida tɔrɔ ganaa, makara bɔ wɔsɛn ganaa!»

³¹ Zaman lɛ yoo ǹ gialaa, màn mɛn bɛ́ toɛ, ǹ nə n lɛ tã. Sɛnɛ, ǹ nə́ wusoo ǹ nə́ màn da ǹ lɛ-dɛ li: «Dɛnaa, wɔsɛn kii Davida tɔrɔ lɛɛ, makara bɔ wɔ ganaa!»

³² Yezu golee, á lɛ dia ǹ la, á tɔ́n pɛ ǹ nɛ: «Ka n giɛ li ma wàa zɛnaa ka nɛ?»

³³ Ǹ nə́ tɔ́n pɛ Yezu ni: «Wɔ n giɛ li n wɔ yiin bũ.»

³⁴ Ǹ makara Yezu kũ, á nɔmaa á n gɔn da ǹ yiin ganaa. A din bǎã-n gɔrɔ, ǹ yiin nə́ n bũ, ǹ nə́ kɔ Yezu kio lɛ.