Marki 13 - LAWA A BOO SONBORE 2011

Yezu boo mɛn da Lawa a kion a kaa wɔ paǹ li

¹ Yezu bɛ́ soe Lawa a kion, a kialandɛnaa goon pɛ nɛ: «Mìinaa, ga kion kɛa dɔ ǹ gɔn ganaa, ka kɔlɔ dadaran kɛn nɛ dɛ!»

² Yezu tɔ́n pɛ nɛ: «Táa n yii tá kion dadaran kɛn ganaa? Kɔlɔ kɔ́n ba re goɛ̃ ǹ miã lalan kànaa wa, a din tumaa á re kiɛ.»

Minin bɛ́ re nɔmaan mɛnɛn we

³ Yezu bɛ́ á giã tán *Olivie dan kele mìi ni, á n yɔrɔ dia Lawa a kion la, Piɛrɛ laanka Zaaki laanka Zaã laanka Andre daa ǹ dininsɔɔ̃nɔn,

⁴ ǹ nə́ nɔ̀n da la mà siin lɛn man die n zɛnɛɛ biĩ? Mà siin mɛnɛn man die nyɛɛ, mà a biikoo dɔ? Mà a bɛ pɛ ǹsɛn manɛ.

⁵ Yezu tɔ́n a giala kɔ á pɛ ǹ nɛ kɛnɛn: «Ka n dinin kũ, ka baran toa min kɔ́n ka yiri sã wa.

⁶ Min gigiã á re die ka masɛ tɔ nɛ, ǹ pɛ mà ǹsɛn man Minin Nyin-sili lɛ lɛa! Ǹ tá re min gigiã yiri siɛ̃.

⁷ Bɛ̀ ka ma mà zia á kunu ka ganaa, hinlaa mà á sɔsɔɔ, ka baran nyɛ́ɛ baa wa. Bɛ doamaa nɛ a n zɛnaa, sɛnɛ, kanaa a nya bie ka bɛ-n bɔrɔ wa.

⁸ Tɔrɔ á re zia biɛ tɔrɔ kɔsɔ ganaa, gána á re zia biɛ gána kɔsɔ ganaa. Tán tá re bìn diɛ bǎã gigiã nɛ, bòo dɔ á re we. A giala kɔ ǹ gɔn nɛ ka bɛ nɛ, ka lɔ a nɔɔ̀rɔ kɔ ǹ gɔn bɛ́ lɔn.

⁹ Sɛnɛ, kasɛn nə yiri bɔ ka dinin li. A giala, minin tá re ka kuĩ ǹ wo kiri wɔ ka ganaa Zuifun lɛsɔkɔn kionən gɔ́ɔ̃ nɛ, ǹ ka duduwəə. Ǹ tá re woe ka nɛ pàãdɛnan laanka kiin yɔrɔ-a masɛ tɔ taman yii, bɛ lɛ n die toɛ ka masɛ boo da ǹ yɔrɔ-a.

¹⁰ Lawa a Boo Tii Kɔɔ̃n doamaa nɛ a n pɛ tɔrɔ tumaa-n bɔrɔ, bɛ kio, bɛa siin lɛn nə tɔn nə n zɛnaa.

¹¹ Bɛ̀ ń yaa ǹ nə́ ka kũ mà maǹ woe kiri we ka ganaa, ka baran saa lɛlɛ ka n gɔ́ɔ̃ bii ka kaa da ǹ boo-n wa. Lawa bɛ́ re boo mɛn koe ka la bɛa biikoo lɛ gɔ́ɔ̃ nɛ, ka bɛ lɛ pɛ. A giala, a bie boe ka dinin ni wa, Yiri Fu n die kaa da ǹ boo we ka lɛ-n.

¹² Minin tá re ǹ dinin dɔɔ̃nɔn koe pàã gɛ̀ la, díin tá re zɛnɛɛ ǹ nɛnyaanan man miɛ̃. Nɛnyaanan tá re n bɔyɛɛ ǹ yɛ wolen li, ǹ nə ǹ kɔ pàã gɛ̀ la.

¹³ Ka tìĩ á re boe min tumaa nyin ni masɛ tɔ a lɛa. Sɛnɛ bɛ̀ min mɛn si a ganaa yǎa á woo kaa a giala-nyɔmiɛ lɛ, bɛa dɛnaa á die kirisibiɛ.

Sii bɔnɛɛ

¹⁴ "Sii bɔnɛɛ mɛn bɛ́ basaã kɔ ǹ sii lɛa", bɛ doamaa bɛ́ a bie a yɛ bǎã mɛn nɛ wa, ka á re yii walan. (Min mɛn bɛ́ sɛ́wɔ kɛ pii, ǹ dɛnaa nə n doa a na a giala ma). Bɛa biikoo li, min mɛnɛn bɛ́ re goɛ̃ Zudee gána nɛ bɛn doamaa nɛ ǹ baa si ǹ wo kelen la.

¹⁵ Min mɛn bɛ́ kala-n, bɛ̀ á gisĩ, a doamaa bie a wɔ kion mà asɛ na a mànan goɛ wa.

¹⁶ Min mɛn bɛ́ wuru-n, bɛ doamaa bie a wusoo a wo piɛ mà asɛ na a mɔnaa siɛ wa.

¹⁷ Bɔ̀n nə die goɛ̃ lɔ nɔnaan wɔ lɛa, ka min mɛnɛn dɔn bɛ́ nɛnyaanan nə́ ǹ gɔn, ǹ nə́ nyɔ koe ǹ la bɛa lɛawaan kɛn lɛn li.

¹⁸ Ka Lawa nyankɔ bɛa siin kɛn lɛn baran n zɛnaa bɔ̀nɔn ti-n wa!

¹⁹ A giala bɛa pinaa, nɔmaa lɛ á die gole koe parsiini, a kũ Lawa a kanaa zɛnaa biikoo ganaa a da pelo ǹ yaa, min tɔn nə ǹ miã yɛ ka a yii-n wa, min ba re ǹ miã kɔsɔ yii ka a yii-n doo duduu wa.

²⁰ Bɛ̀ wɔa Dɛnaa bie re màn boe bɛa lɛawaan kɛn lɛ wa, min kɔ́n ba boe la a la wa. Sɛnɛ, Lawa min mɛnɛn yii gɔgɔɔ̃ a din wɔn lɛa, a n die màn boe ǹ lɛ, bɛn lɛn taman yii.

²¹ Bɛ̀ min tá pii ka-n bɛa biikoo li mà ka ga, mà Minin Nyin-sili lɛ á kànaa, hinlaa mà ka ga, mà a tá kɛnɛn li, ka baran golee li wa.

²² A giala, min tɛn tá re die a soɛ kuru mà asɛ n Minin Nyin-sili lɛa, min tɛn dɔ á re die a soɛ kuru mà asɛ n Lawa a boo gii-dali lɛa. Ǹ tá re sii a kɔnbɔn laanka kaãbaa ǹ sii kakan zɛnɛɛ ǹ minin yiri sã nɛ. Bɛ̀ maǹ boe la dinin, maǹ Lawa a yii gɔgɔɔ̃ wolen kɛn lɛn yiri siɛ̃.

²³ Bɛ lɛ taman yii ka yiri bɔ dɛ! Ma na a din tumaa pii ka nɛ, bɛ̀ a biikoo baa doe.

Min a Nɛgiĩ a daa boo

²⁴ Bɛa pinaa, nɔmaa lɛ a nya kio, wasa á die n biɛ nuunaa nɛ, mui ba re a folon kiɛ doo wa,

²⁵ a leeren tá re boboe lon ǹ kaa, lon màn pàãdɛnan dinin tumaa á re n lɔlɛkɔn.

²⁶ Bɛa biikoo li, ka á re Min a Nɛgiĩ yii die labaran bii, ka pàã gole ne, ka gugurubaa nɛ.

²⁷ Á die lon a dia dí-a wolen diɛ kanaa gùrù sii din tumaa ganaa, ǹ Lawa a yii gɔgɔɔ̃ wolen lɛn lɛ sɔkɔn-a, a saa kanaa lɛkoro goon ganaa a wo a lɛkoro kɔsɔ yaa.

Daraa mɛn bɛ́ yii gɔ́rɔ da wɔ paǹ li

²⁸ Daraa mɛn bɛ́ yii gɔ́rɔ da wɔ gɔn la, ka too kɔ bɛ ganaa. Bɛ̀ a gùrùn nə́ sɔsɔrɔ kɔ, á luu pã lɔn gɔrɔ, a nə n doɛ̃ mà bɔ̀nɔn na á diri.

²⁹ Bɛa yɔrɔ kɛ lɛ la, bɛ̀ ka bɛa siin lɛn yɛ n zɛnɛɛ ǹ mɛn waáraa, ka dɔ̃ mà siin lɛn biikoo diri foɛɛ̃nɛ.

³⁰ Masɛ n pii ka nɛ, sonbore ne: Pelo minin kɛn lɛn ba re giɛ̃ ǹ nya, bɛ̀ bɛa sii kɛ tumaa ná a n zɛnaa wa.

³¹ Lon laanka tán tá re kiɛ̃, sɛnɛ, masɛ a boon kɛn ba re kiɛ̃ wa.

Die n Min a Nɛgiĩ a daa biikoo doɛ̃

³² Sɛnɛ, min kɔ́n ba Min a Nɛgiĩ a daa pinaa laanka a daa biikoo doɛ̃ wa, haalɛ lon a dia dí-a wolen dinin ba doɛ̃ wa, Lawa a Nɛgiĩ dɔ dinmaa ba doɛ̃ wa, yǎa Díi Lawa dinsɔɔ̃.

³³ Ka yiri bɔ ka dinin li, ka n mìi saa lon, a giala, ka a biikoo doɛ̃ wa.

³⁴ Min a Nɛgiĩ a daa pinaa n die n biɛ ka min bɛ́ woe zii-n lɔn. A laan bɛ̀ a soo, a na a kion koɛ a dí-nyalin li, a didie a nya ǹ dí kɔ la, a n gɔn waa a kiɛnlɛ-lɛduə̃li ni, mà a n yii dɔraa, bɛ̀ asɛ baa die.

³⁵ Ka dɔn nə n yii toa koo, a giala, ka a kiondɛnaa lɛ a daa biikoo doɛ̃ wa: wasamiɛn nɛ la, làan nɛ la, koonən wuu pɛ waáraa-n la, hinlaa baayɛlɛ, min ba doɛ̃ wa.

³⁶ Ka nyan toa a da ka tɔwaa tán nyuù-n wa.

³⁷ Masɛ bɛ́ boo mɛn pii ka-n ke lɛn, man bɛ lɛ pii min tumaa nɛ: Ka n yii toa koo!»