Luku 14 - LAWA A BOO SONBORE 2011

Giĩ goon a busu nya boo

¹ *Susu ǹ pii kɔ́n pinaa, Yezu woo *Fariziɛ̃n goledɛnaa goon a piɛ, màn bii ǹ bǎã nɛ. Min mɛnɛn bɛ́ walan bɛn man nə́ goã giɛ a gɔn li.

² Giĩ goon nə́ goã golee ne a yɔrɔ-a, busu kɔ́n ná a ganaa, a ná a gɔ̀nɔn yii yuyu.

³ Yezu boo saa á nɔ̀n da landa sii-daraalin laanka Fariziɛ̃n la mà ǹsɛn landa siin lɛn tá toɛ min nə busulə kaka kɔ *susu ǹ pii pinaa, hinlaa ǹ ba lɛ koe wa?

⁴ Sɛnɛ, minin mɛnɛn nə goã a li, bɛn na a lɛ si wa. Yezu tɔ́n busulə lɛ kũ, a ná a busu nya, á da á woo.

⁵ Bɛ kio á pɛ ǹ nɛ: «Bɛ̀ nɛgiĩ hinlaa dii tá ka goon lon, yǎa a mɛnaa tù ni, táa a n boe fufuu, haalɛ ta susu ǹ pii pinaa nɛ. A bie miɛ̃ wa?»

⁶ Ǹ boo la ǹ nə́ bɛa sii kɛ lɛ a boo binyəə kɔ la wa.

Giã kio bǎã-n boo

⁷ Minin mɛnɛn bɛ́, ǹ nə́ daa màn bii ǹ bǎã lɛ nɛ, Yezu boo giməə goon da bɛn manɛ, a giala, á n yiri kɔ li, mà maǹ nyɛɛnaan ǹ bǎãn boe ǹ nə́ giɛ̃ ǹ nɛ. Á pɛ ǹ nɛ:

⁸ – Bɛ̀ ǹ nə́ lɛ dia ka mɛn la lɔ tii kũ ǹ zɔ́n-a, n baran wo giã bǎã bibinaa nɛ wa. Bɛ bie wa bɛ̀ ǹ nə́ lɛ dia min kɔsɔ dɔ la, bɛ n guguru nsɛ nɛ,

⁹ min mɛn bɛ́ á lɛ dia ka dinin paanan la, bɛ tɔ́n kiɛ̃ a da pɛ nɛ mà n yoo n nə n bǎã kɔ. Haya, ma n die yui kəni ka sìi ni n wo giã kio.

¹⁰ Bɛ̀ ǹ nə́ lɛ dia n la, wo giã kio, màn mɛn bɛ́ toɛ, min mɛn bɛ́ á lɛ dia n la, bɛ̀ bɛ́ daa á pɛ n nɛ: «Maa giaára ganaa, n zɔ̃ n dɔ nyɛɛnɛ», sonbore, bɛ n die zín we n nɛ min tumaa yɔrɔ-a màn bii ǹ bǎã lɛ nɛ.

¹¹ A giala min woo min, a tá n din siɛ lon, Lawa á re bɛ gisĩ, min mɛn bɛ́, n din boɛɛn koe, Lawa á re bɛ siɛ lon.

Doobaan bíi màn-bii ganaa boo

¹² Giĩ mɛn bɛ́ á lɛ dia la màn-bii-a ke, Yezu pɛ a dɔ nɛ: «Bɛ̀ n tá re màn-bii koe minin la penleen hinlaa tèlò-n, n baran lɛ dia n giaáran la wa, ka n dɔɔ̃nɔn nɛ, ka n tɔrɔn nɛ, ka n miãkɛn pàãman nɛ wa. Bɛ bie wa bɛn man die wusii ǹ lɛ dia n dɔ la màn-bii-a, a saraa lɛ dɔ-n ka bɛ-n gɔrɔ.

¹³ Bɛ̀ ń minin bíi zɔ́n màn-bii ganaa, lɛ dia doobaan la ka bɔlɔkan nɛ ka siməə wolen ne ka yii tere-an nɛ.

¹⁴ A laan màn kɔ́n ba bɛn lon ǹ tá re n bǐɛ̃ lɛ dòo sarɛɛ-n wa, barka tá bɛ nɛ, a giala, Lawa din nə die n bǐɛ̃ lɛ dòo sarɛɛ min peperen yii kaa pinaa.»

Yezu màn-bii gole mɛn boo da

¹⁵ Bɛa boon kɛn lɛn ma kio, giĩ goon kɔ́n dɔ n màn bii ǹ bǎã lɛ nɛ, bɛ́ pɛ Yezu ni mà min mɛn bɛ́ re goɛ̃ *Lawa a kiibaa ǹ bǎã a màn bii ǹ bǎã kɛ nɛ, barka á re n diɛ bɛ ganaa.

¹⁶ Yezu pɛ-n kɛnɛn: «Giĩ goon ne, á màn-bii gole zɛnaa, á min gigiã bíi a ganaa.

¹⁷ Màn lɛ a bii biikoo bɛ́ á dɔ, giĩ lɛ ná a dí-nyali dia, a bɛ́ á min mɛnɛn bíi, mà a pɛ bɛn manɛ mà ǹ daa mà màn tumaa nə́ n yɔrɔ bɔ á nya.

¹⁸ Sɛnɛ, ǹ tumaa pɛ kɔn kio ganaa, mà giĩ lɛ sabarɛbaa. Ǹ bibinaa mà dí-nyali lɛ ganaa mà asɛ na á wuru goon pii, mà asɛ doamaa nɛ a wo ga bɛ ganaa. Mà asɛ na a nyankoe a sabarabaa.

¹⁹ Ǹ goon dɔ mà asɛ na á buu kɔsɔ ǹ dii fù pii, mà asɛ n woe ǹ kiɛ di-a á giɛ ǹ ganaa. Mà asɛ na a nyankoe a sabarɛbaa.

²⁰ Ǹ goon kɔsɔ dɔ, mà asɛ na á lɔ tii saa sisia, mà bɛ lɛ nɛ, asɛ a boe la a wo lɛ-dia lɛ-a wa.

²¹ Dí-nyali lɛ wusoo á woo bɛa boon kɛn lɛn pɛ a goledɛnaa nɛ. Kiondɛnaa lɛ foo tɔ́n yoo, á pɛ a dí-nyali lɛ nɛ mà a wo fufuu kiwi lɛ a zaman bǎãn nɛ ka a ziin ni, a da kun ka doobaan nɛ ka bɔlɔkan nɛ ka yii tere-an nɛ ka siməə wolen ne.

²² Bɛ kio, dí-nyali lɛ wusoo á daa pɛ mà goledɛnaa ganaa, mà a bɛ́ mà sii mɛn, mà bɛ nə́ n zɛnaa. Sɛnɛ, mà bǎã tá tɔn na a tan.

²³ Goledɛnaa tɔ́n pɛ a dí-nyali lɛ nɛ mà a wo don ziin la ka dù gɔrɔn lɛ-an nɛ, a minin kũ ka pàã nɛ ǹ daa, màn mɛn bɛ́ toɛ, kion lɛ pã.

²⁴ A giala mà asɛ n pii ǹ ni, mà bibinaa a bíi wolen kɛn lɛn kɔ́n ba re asɛ a màn-bii lɛ nɛ̀n diɛ wa.»

N piã ka sii yii ni n kɔ Yezu lɛ

²⁵ Zaman gole na á goã koe zii lɛ kun ka Yezu ni. Á n yɔrɔ bɔyaa á pɛ ǹ nɛ:

²⁶ «Bɛ̀ min mɛn daa kɔ masɛ lɛ, bɛ̀ a masɛ soɛ kɔ ǹ di-n wa, ka ǹ dan nɛ, ka a lɔ nɛ, ka a nɛnyaanan nɛ, ka ǹ dɔɔ̃ngiĩn ni ka ǹ dɔɔ̃nlɔn nɛ wa, haalɛ a dinmaa, ǹ dɛnaa ba boe la a masɛ a kialandɛnaa baa wa.

²⁷ Min mɛn bɛ́, a ba n yii boe a din-a masɛ a lɛa, a fuu si a ganaa, a kɔ masɛ kio lɛ wa, bɛa dɛnaa ba boe la a masɛ a kialandɛnaa baa wa.

²⁸ Bɛ̀ min tá re sanabolo doe, ǹ dɛnaa n giɛ̃ tán bɔrɔ, a na a giɔ̀mɔ nimi a kaa kun. Bɛ̀ á re boe la a dɔ a nya, a tɔn na a dí giala kɔ. Kaa die na a ba bɛ zɛnɛɛ wa?

²⁹ Bɛ̀ a ná a giala wɔ, a ná a boo la á dɔ á nya wa, min mɛnɛn tumaa bɛ́ re yii, bɛn man die yaa we a ganaa,

³⁰ maǹ die pii mà giĩ kɛ ná a kion gòã daa, a boo la á dɔ á nya wa.

³¹ Bɛ̀ kii á die woe zia biɛ ǹ miã kii kɔsɔ ganaa, a n giɛ̃ tán bɔrɔ, a ga a din pàã ganaa. Bɛ̀ á dɔ̃ mà asɛ á boe la ka sɔraasi duu fù ni, a n da ǹ miã kɛ lɛ die ka sɔraasi duu fuə ne, a n woe. Kii mɛn na a ba bɛ zɛnɛɛ wa?

³² Bɛ̀ a ba boe la wa, a n bɛa kii goon kɛ lɛ toɛ sɔsɔɔ, a minin dia a li ǹ na a nyankɔ mà a daa ǹ kiɛ̃ zia lɛ la ǹ kɔn wɔ ma.

³³ Bɛa yɔrɔ kɛ lɛ la, min woo min tá ka bii, a ná a ba n yii boe a gɔn màn-a wa, bɛ ba boe la a masɛ a kialandɛnaa baa wa.

Kialandɛnaa na á kɔnbɔ ka yìsi ni

³⁴ Taãn nɛ yìsi n màn sonbore lɛa. Sɛnɛ, bɛ̀ yìsi a kɔɔ̃nbaa nə́ n bɔ a nɛ, maǹ wàa zɛnɛɛ a tɔn wusoo a kɔɔ̃n kɔ?

³⁵ A ba màn kɔ́n bǐɛ̃ koe tán nɛ wa, a ba wuru bǐɛ̃ kɔ ǹ màn dɔ din biɛ wa. A là n ka zũ kanaa nɛ. Too bɛ́ ka lon ka n too kɔ koe!»