Loen 81 - LAWA A BOO SONBORE 2011

Zɔ́n Loe

¹ Loe-saalin goledɛnaa loen mɛnɛn lɔ. Asaafu a loe goon ne. A nə n loe bɛ̀ Gaati ná a bɛ̀ dɛ ǹ màn diɛ li.

² Ka n lɛ dɛ, ka n nyɛnyɛɛ wɔ tamaali Lawa nɛ. Ka Zakɔba a Lawa para pɛ.

³ Ka sàn kɔ, ka maà dɛ, ka tùtun wuu da li.

⁴ Ka bɛn pɛ mui a bɔ li, ka a folon kaa taãn-taãn biikoo ne, ka pɛ wɔa zɔ́n pinaa dɔ nɛ.

⁵ Bɛ n dí-pɛ lɛa Izirayeli ni, Zakɔba a Lawa dinmaa na á pɛ.

⁶ A din na á bɛa sii zɛnaa ǹ gɔn pɛ, á da Zozɛfu a minin mìi ni, bɛ̀ a bɛ́ á yoo Ezipti gána gialaa ǹ mɛn waáraa. Man lɛn kɔn miɛ̃, boo diɛ ma nɛ, sɛnɛ, ma a lɛn lɛ doɛ̃ wa. Á n pii kɛnɛn:

⁷ Má guĩ saa, má bɔ n kɔrɔ-n, n gɔnɔn nə́ kɛsɛ gugurun gisĩ.

⁸ Ǹ bɛ́ boe n yii ni, n nə́ n lɛ dii, má n si má n da. Man toa piɛ̃ gole gɔ́ɔ̃ nɛ, má n nyankɔ si, Meribaa a mu yala bǎã nɛ, má n da n gɔ́ɔ̃ li.

⁹ Ma din a zaman, n too kɔ, ma nə n gɔn wɛɛ n nɛ. Izirayeli, bɛ̀ ń nə́ n too kɔ ma lon,

¹⁰ bǎã ba re yii n li lawa kɔsɔ wɔ lɛa wa. N ba re n musin koɛ tán, n lawa kɔsɔ guguru kɔ wa.

¹¹ A giala, mà masɛ din nə n Dɛnaa Lawa lɛa, ma din nə má soo n ne, má n bɔ Ezipti gána nɛ. N lɛ bũ gole, ma á re piɛ̃.

¹² Sɛnɛ, maa zaman lɛ nə n too kɔ maa lɛ-dia ganaa wa. Izirayeli mà a ba ma li wa.

¹³ Bɛ lɛ nɛ, ma ǹ toa walan, ǹ baãnaabaa ǹ too kakabaa gɔ́ɔ̃ nɛ. Haya, ǹ kɔ ǹ dinin dùũ lɛ kəni.

¹⁴ E, bɛ̀ maa zaman kɛ na á goã n too koe ma lon, bɛ̀ Izirayeli na á goã koe maa ziin lɛ,

¹⁵ bɛ̀ ma á re n nanaɛ, ma sìi da a zɔ́ɔn ganaa, man gɔn saa lon, a bɔmayii-n wolen kɛn li.

¹⁶ Min mɛnɛn bɛ́ Dɛnaa Lawa biɛ zɔ́ɔ, bɛn tá re die a gòã kuĩ, a giala, mà ǹ dɔn biikoo na á kiɛ̃ kəni ka lenlen, yǎa duduu.

¹⁷ Sɛnɛ, bɛ̀ Dɛnaa n die Izirayeli sɛ toe ka wuru màn sonbore sonbore ne, a don a zoo nyɔɔ kɔ la, a bii a kã.