Loen 7 - LAWA A BOO SONBORE 2011

Zɛ̀rɛbaãnaa a Lawa nyankɔ boo

¹ Davida na a busii pɛ Dɛnaa Lawa nɛ loe mɛn gɔ́ɔ̃ nɛ, Bɛnzamɛn tɔrɔ Kuusi wɔ paǹ li.

² Dɛnaa Lawa, maa Lawa, man kiɛ n din yele. Min mɛnɛn bɛ́ fuu nyɛɛ ma nɛ, ma kanbaa ǹ ganaa, n ma si ǹ la.

³ Bɛ bie wa, maǹ die ma kuĩ, ka yàra bɛ́ siĩ kuĩ lɔn. Maǹ die ma wɔwoɛ̃ kɔn, min dɔ ná a re yii, a ma si wa.

⁴ Dɛnaa Lawa, maa Lawa, maǹ pii mà ma zɛ̀rɛ nɛ. Bɛ̀ má zɛnaa ka ǹ bɛ́ pii lɔn, bɛ̀ ma din gɔn kɛ sii la sonbore,

⁵ bɛ̀ má baraa zɛnaa maa tá kun wole ne, min mɛn bɛ́ giɛ ma lɛ li kooro, bɛ̀ má bɛ gɔn mànan goa,

⁶ toa maa zɔ́ɔ ma loo a dɔ ma ganaa, toa a ma dɛ a ma tuturu tán, a ma nyin wɔ tii li. *Doa

⁷ Dɛnaa Lawa, n din yoo ka foo ne. Maa zɔ́ɔn kɛn foo-busii da n wɔ gɔ́ɔ̃ nɛ, yoo n nə n dɔ ma lɛ, nsɛ mɛn bɛ́ ń peperebaa koa.

⁸ Tɔrɔ gigiã die a n lɛnpɛnɛ, wusoo n dii n giã ǹ mìi la lon!

⁹ Dɛnaa Lawa, nsɛ mɛn bɛ́ kiri we gánan-a, kiri wɔ ma a lɛa, a giala n din tá doɛ̃, mà ma sii la wa.

¹⁰ Min baraan kɛn baraabaa nyaa. N dɔ min peperen kɛn lɛ! A giala, n din nə minbuiin nɛ a taasiɛ doɛ̃, ka a gɔ́ɔ̃gɔ́ɔ̃ ǹ wɔ nɛ. N din lɛ n Lawa pepere lɛa.

¹¹ Ma tamaali n ka Lawa nɛ, a din nə min peperen kirisibiɛ.

¹² Lawa n kiri pepere we. A n Lawa lɛa, yui min baraan gialaa biikoo tumaa li.

¹³ Bɛ̀ min baraa wusoo a sii kio wa, Lawa na a sɛmiɛ̃ lɛ loe, a na a sa dii, a n yii da la.

¹⁴ A na a gɛ̀-dɛ ǹ mànan yɔrɔ boe, a nə ǹ yɔrɔ boe ka kiɛ tɛdɛnan nɛ.

¹⁵ Á ke, taasiɛ baraa bɛ́ min mɛn yiri ni, á n giɛ mà a sii baraa zɛnaa, soɛ nɛ ǹ dɛnaa bɔ.

¹⁶ Bɛ̀ min nyankɔrɔ zuzulu mɛn fɔ̃, a din nə die mɛnɛɛ bɛa nyankɔrɔ lɛ nɛ.

¹⁷ A din a sii baraa n die kuĩ a din mìi ni. A din a kakaarɛbaa ǹ sii n die yui a din nyanlɛ-a.

¹⁸ Ma á re barka diɛ Dɛnaa Lawa nɛ, a peperebaa kɛa lɛa. Ma á re Lon a Dɛnaa Lawa gole kɛ tɔ boe ka loe ne.