Loen 68 - LAWA A BOO SONBORE 2011

Lawa a gɔ̀lɔ̀baa ǹ loe

¹ Loe-saalin goledɛnaa loe mɛn lɔ. Davida a loe goon ne.

² Lawa n yui, a zɔ́ɔn man sasawɛɛ. Min mɛnɛn bɛ́ ǹ ba narɛ wa, bɛn man baa sii a nyɛɛnɛ.

³ Lawa, n din nə ǹ sasawɛɛ ka tɛmaa bɛ́ lɔn. Ka tɛ bɛ́ nyɔɔ yoe lɔn, Lawa lɛ-tiilin lɛn dɔn man bɔ̀n biɛ a yɔrɔ-a miɛ̃.

⁴ Sɛnɛ, min peperen sɛn manə n nyɛnyɛɛ, ǹ foo n kɔɔ̃n Lawa yɔrɔ-a, ǹ nə́ foo kɔɔ̃nbaa ǹ bɛ̀ biɛ.

⁵ Ka loe lɔ Lawa nɛ, ka loe lɔ ka a tɔ bɔ nɛ. A din lɛ n tɔ we baran lalan, ka a tɔ bɔ. A tɔ mà Dɛnaa Lawa, ka toa ka foo kɔɔ̃n kɔ a yɔrɔ-a.

⁶ Nɛ toenən díi, lɔ giɔɔrɔn dɔmalɛ wole, Lawa lɛ n bɛ lɛa a giã ǹ bǎã sonbore kɛ nɛ.

⁷ Minin mɛnɛn bɛ́ ǹ nə́ ǹ loo, Lawa n kùsì koɛ bɛn nyɛɛnɛ, a ǹ kũ doɛ̃. A tá ǹ kiɛ a ǹ bɔ kòso-n, a foo kɔɔ̃nbaa kɔ kòso nɛn la. Sɛnɛ, Lawa lɛ-tiilin kɛn, bɛn man goɛ̃ bǎã gere ne.

⁸ Lawa, n bɛ́ ń soo n zaman lɛ nyɛɛnɛ, n bɛ́ ń tɔ wɔ don gɔ́ɔ̃ nɛ, *Doa

⁹ tán nə́ bìn da, haalɛ lon dinmaa dɔ mu gigiã kaa, nsɛ Lawa yɔrɔ-a, bɛ̀ n bɛ́ ń gisĩ Sinayii kele la, nsɛ Izirayeli minin Lawa lɛ.

¹⁰ Lawa, ń goã bǐɛ̃ zɛnɛɛ ka la mu sonbore ne, n din a gána lɛ pàã goã á nya, sɛnɛ, ń pàã kɔ la.

¹¹ N din nə ń nə́ n zaman lɛ koa walan, bɛa bǎã kɛ lɛ nɛ. N din Lawa sonbore bǎã mɛn yɔrɔ bɔ, ń koa doobaa nɛ.

¹² Dɛnaa n boo diɛ, bɛa boo kɔɔ̃n kɛ lɛ, a wo pɛ wolen man goɛ̃ giãgiã lɔn bii.

¹³ Ǹ nə́ pɛ: Maǹ baa sii. Kiin laanka zia-baalin man baa sii, ǹ si. Lɔn mɛnɛn nə goã piɛ, bɛn man kion màn sonboren kɛn goɛ zia mànan lɛa.

¹⁴ Kion bàan nyínin manɛ, ǹ nə́ wɔrɔ lɛa, ǹ nyàa kan nə́ sana yoreen yoreen lɛa. Die n die goɛ̃ waa-n tán sɔraasin bǎã kɛ nɛ?

¹⁵ Lawa Pàayiidɛnaa bɛ́ kiin sasawɛɛ bɛa bǎã kɛ lɛ nɛ, bɛ̀ la gii n kiɛ, Kele Tì kɛ sɛ la.

¹⁶ Basan kele! Kele gole gole. Basan kele! N mìin nə́ mɔnaa.

¹⁷ Basan kele! Nsɛ mɛn mìi bɛ́ gigiã, wàa na á baa, n tá miã goã boe kele kɔsɔ kɛ ganaa, Lawa din bɔ, mà asɛ n giɛ̃ la? Hiĩ Dɛnaa Lawa n die giɛ̃ la, yǎa duduu.

¹⁸ Lawa a ziabaa ǹ wotoron lɛn man duu gigiã. Dɛnaa Lawa na á yoo Sinayii kele la ka bɛn lɛn nɛ, á daa bǎã sonbore lɛ nɛ.

¹⁹ Á dii lon, á minin kũ kòso nɛn lɛa. Minin nə́ gɔ ka màn gigiã nɛ, haalɛ a lɛ-tiilin dinin, màn mɛn bɛ́ toɛ, ǹ giã kun ka Dɛnaa Lawa nɛ.

²⁰ Ka daa wɔ barka da Dɛnaa nɛ baraabaraa. Wɔ kirisibaali Lawa lɛ n giɛ wɔ walan. Doa

²¹ Lawa lɛ n kirisibaali lɛa wɔsɛn nɛ. A din mɛn bɛ́ Dɛnaa lɛa, wɔsɛn si gɛ̀ la ǹ gɔn na a din lon.

²² Sɛnɛ, wɔ á waa-n la taãn-taãnɛ, wáa Lawa á re a zɔ́ɔn mìi yui, ka min mìi ka sɔsɔrɔdɛnan mɛnɛn dɔn bɛ́ baraabaa biɛ ǹ dí lɛa.

²³ Dɛnaa din na á pɛ: Ma á re boe n zɔ́ɔn lɛn nɛ Basan gána nɛ, ma bɔ ǹ nɛ yìsi mu gialaa,

²⁴ màn mɛn bɛ́ toɛ, n nə n gòãn dɔdɔrɔ mà li, n ginin dɔn nə boo la, ǹ nə n zɔ́ɔn kɛn mà mi.

²⁵ Lawa, ǹ nə́ n gɔ̀lɔ̀baa ǹ zaman lɛ yɛ kiɛ̃, maa kii Lawa a zaman lɛ, ǹ nə́ yɛ a guguru kɔ ǹ bǎã sonbore kɛ nɛ.

²⁶ Loe-lɔlen man nyɛɛnɛ, bɛ̀ dɛ ǹ màn-dɛlen kɛn man kio, nɛlɔn man bii, ǹ nə́ maàn dii.

²⁷ Ka mɛnɛn basa bɛ́ boe Izirayeli ni, ka n lɛsɔkɔn zɔ́n taman yii, ka barka da Lawa nɛ, ka barka da Dɛnaa Lawa nɛ.

²⁸ Bɛnzamɛn tɔrɔ minin kɛn man kiɛ̃ nyɛɛnɛ, ǹ dinin lɛn manə ǹ ba tɛ wa. Bɛ kio, Zudaa tɔrɔ minin nyɛɛnaandɛnan, ka ǹ mɔnaa siĩnin kɛn nə́ ǹ ganaa, foɛ̃-n sɔnbɔraanɛ. Bɛ kio, Zabulɔn tɔrɔ minin kɛn nyɛɛnaandɛnan, ka Nɛfutalii tɔrɔ minin wɔn nɛ.

²⁹ Izirayeli, n pàã bɔ. Lawa din na á pɛ miɛ̃. Haya Lawa, n pàã bɔ wɔsɛn lɛa, ka n bɛ́ ń zɛnaa lɛlɛ lɔn.

³⁰ Toa kiin nə da ka n din gɔ ǹ mànan nɛ, n Kion Gole kɛ nɛ màn tumaa lalan Zeruzalɛmu kiwi.

³¹ Paraa ǹ li. Paraa Ezipti li, paraa bɛa bùruu gɔ́ɔ̃ nɛ ǹ tɔɔ kɛ li. Tɔrɔ gialakunun kɛn man ka tɔɔ kuru bɛ́ lɔn, diin laanka ǹ nɛn nɛ, paraa ǹ dɔn li, ń giɛ, ǹ tumaa á die kiɛ tán n din yɔrɔ-a, ka wɔrɔ wen nə́ ǹ gɔn. Zia bɛ́ kɔɔ̃n tɔrɔn mɛnɛn-a, bɛn loo.

³² Pàãman man boe Ezipti gána-n die. Minin man boe Etiopii gána-n die ka ǹ gɔnɔn piɛ̃maa nɛ.

³³ Kanaa a gánan lɛn, ka loe lɔ Lawa nɛ, ka Dɛnaa guguru kɔ. Doa

³⁴ A din lɛ n tɔ we lonən lon gɔ́ɔ̃ nɛ, a lon mɛn zɛnaa lɛlɛ-lɛlɛ. Á ke, a din lɛ n boo diɛ, a n diɛ ka lɛn gole ne.

³⁵ Ka pɛ mà pàã n Lawa wɔ lɛa. A din lɛ n kii siĩn lɛa Izirayeli mìi la. A pàã lɛ n gole, á woo lon ka labaran bɛ́ lɔn.

³⁶ Lawa nə n toɛ a giã ǹ bǎã sonbore kɛ nɛ, a tá n din nyɛɛ kaãbaa ǹ Lawa lɛa. Izirayeli a Lawa lɛ nɛ. A din nə pàã laanka boo sii la koe a minin la. Barka Lawa!