Loen 51 - LAWA A BOO SONBORE 2011

Ga sii toaman li loe

¹ Davida a loe n ke:

² Davida naarɛbaa mɛn zɛnaa kun ka Basebaa nɛ, Lawa a boo gii-dali Natan woo a piɛ a sii-a, loe lɛ n woe kun ka bɛ nɛ.

³ Maa Lawa, makara bɔ ma ganaa, n kɔn-narɛɛ gole kɛ taman yii. N makara-doɛ̃ gole kɛa lɛa, maa sãn toa ma nɛ.

⁴ Maa kɔkɔrɔbaa ǹ siin kɛn tuturu, n ma *yoreen kɔ n ma bɔ maa sã ǹ sii ni.

⁵ Ma á maa sãn doɛ̃, maa sii baraa lɛ n ma yɔrɔ-a duduu.

⁶ Má sii la, man má sii la n dinsɔɔ̃ lɛ la. Sii mɛn bɛ́ baraa n yɔrɔ-a, má bɛ lɛ zɛnaa. Bɛ lɛ n ke, ta n boo mɛn da, sonbore tá n lon, ta n dɔlɔ mɛn da ma mìi ni, zɛ̀rɛ ba n ganaa wa.

⁷ Dinin, ma dan bɛ́ maa nɔ̀ nɛ, bɛ̀ man sii baraa-zɛnaali lɛa gɔrɔ, man má yɛ ka sii baraa nɛ.

⁸ Bɛ lɛ na á goã durii-n ma ganaa, sɛnɛ, ń bɛ nyaa ma nɛ. Yiitibaa gɔ́ɔ̃ nɛ, bɛ̀ min tá sonbore doɛ̃, bɛ lɛ n kɔɔ̃nɛ n ganaa.

⁹ Toa maa sã ǹ sii papaã, ma á re yoreen koe, ma zoo, ma á re fu koe ma la koarɛ wù ni.

¹⁰ Ma makara dɔ̃ ǹ boo da ma nɛ, ma foo á re kɔɔ̃n koe a la yii ni. N masɛ mɛn yɔyɔrɛ, toa ma foo kɔɔ̃n kɔ!

¹¹ N yɔrɔ bɔyaa n bɔ maa sã ǹ siin kɛn la, n maa kɔkɔrɔbaa ǹ siin kɛn tumaa tuturu.

¹² Lawa, foo yoreen da ma nɛ, n yiri dii kɔ ma la, yiri mɛn bɛ́ golee ne.

¹³ N nyan ma na n ma zũ sɔsɔɔ n din ganaa wa, n nyan nə n yiri sonbore kɛ si ma la wa.

¹⁴ Maa kirisibaa lɛ taman yii, n din wusoo n foo kɔɔ̃nbaa kɔ ma la, n din nə n dɔ ma lɛ n bɔlɔ si ǹ yiri kɔ ma la.

¹⁵ Min mɛnɛn nə sii la, ma á re n zii lɛ nyɛɛ bɛn manɛ. Sii baraa-zɛnaalin tá re wusii ǹ da n li.

¹⁶ Ma sii mɛn la, a dɔlɔ n ka gɛ̀ nɛ. Maa Lawa, ma kirisibaali Lawa, n din ma si mà kaa la, ń giɛ ma tá n lɛ dii ka n peperebaa kɛ nɛ.

¹⁷ Dɛnaa, maa sìi toɛ̃ n bɔ ma-a, ń giɛ ma tá n lɛ buĩ ma n tɔ bɔ.

¹⁸ N bie giɛ li, mà ma *wúlu màn kɔ n la wa. Haalɛ wúlu màn mɛn bɛ́ ǹ nə́ tã á kukũ lenlen, bɛ kɔn bie n yii kiɛ̃ wa.

¹⁹ Lawa bɛ́ giɛ min mɛn a din-kɔ li, ka wúlu màn bɛ́ lɔn, bɛ n ke: min mɛn a sii baraa bɛ́ taasiɛ diɛ a ganaa. Lawa, min mɛn a sii baraa bɛ́ taasiɛ laanka sìi diɛ a ganaa, n ba n piɛ̃ ka bɛa dɛnaa-n wa.

²⁰ N yɔrɔ bǐɛ̃ dia *Siɔn kele a kiwi minin kɛn la, wusoo n Zeruzalɛmu a kungɔnun lɛn dɔ.

²¹ Bɛa biikoo li, ǹ tá re wúlu mànan koe n la, wúlu mànan mɛnɛn bɛ́ kɔɔ̃nɛ n ganaa, n din nə́ n boo da, ka n din gɔ ǹ wúlu màn lɛpiɛ̃ kɛ nɛ, ka wúlu màn kɛ dɔ nɛ bɛ̀ ǹ tã lenlen. Bɛa biikoo li, ǹ tá re wúlu boe ka dii gɔ̀lɔ̀n nɛ, n *wúlu bɔ ǹ bǎã kɛ nɛ.