Loen 48 - LAWA A BOO SONBORE 2011

Zeruzalɛmu tɔ kɔɔ̃n pɛ ǹ loe

¹ Koore a minin Lawa tɔ bɔ ǹ loe.

² Dɛnaa Lawa á gole, gugurukɔ tumaa na a din wɔ lɛa, wɔa Lawa a kiwi kɛ nɛ, a kele sonbore kɛ la.

³ Kele sasa siĩni, kanaa tumaa a nyɛnyɛɛ ǹ màn, *Siɔn kele lɛ nɛ, gɔsɛ a lɛ̀gɔn la kii gole a kiwi ni.

⁴ Lawa din nə Siɔn lɛduə̃ ǹ bǎãn kɛn nɛ, a din nə tamaɛ ka pàã gole ne.

⁵ Á ke, kiin nə́ da kɔn nɛ, ǹ nə́ kaa kun ǹ nə́ daa Siɔn gialaa.

⁶ Sɛnɛ, ǹ Dɛnaa yɛ lɔn, ǹ nə́ n kaãbaa parsiini, nyɛ́ɛ nə́ ǹ kũ, ǹ nə́ n gòã da baa nɛ.

⁷ Ǹ gɔ̀nɔn na á bìn da walan kəkəkə, ka lɔ nɔna-a n nɛ yii.

⁸ A n ka lɛ̀giala piɛ̃ gole kɛ bɛ́ lɔn, Tarsisi mu la ǹ goo dadaran niɛ̃ kɔn.

⁹ Wɔ goã wɔ́ màn mɛn ma, wɔ́ yɛ ka wɔ yii ni, Dɛnaa Lawa Pàãyiidɛnaa a kiwi kɛ nɛ, wɔa Lawa a kiwi kɛ nɛ, bɛ n ka kɛ nɛ: Lawa á die tamaɛ yǎa duduu.

¹⁰ Ee Lawa, n din a kion kɛ nɛ, wɔ nə n taasɛ ka n kɔn-narɛɛ gole kɛ nɛ.

¹¹ Ee Lawa, maǹ nə n tɔ boe kanaa paǹ yii ni, maǹ nə n guguru koe kanaa paǹ yii ni. N zɛnaa ǹ sii tumaa n pepere.

¹² Siɔn kele kɛ nə n nyɛnyɛɛ, Zudaa a kiwin kɛn foo n kɔɔ̃nɛ, n kiri kuriin lɛn taman yii.

¹³ Ka n bibiə̃ ka Zeruzalɛmu lɛnpɛnɛ, ka a lɛduə̃ ǹ bǎãn nimi.

¹⁴ A kungɔn ke, ka n taasɛ bɛ ganaa, ǹ màn mɛn dɔ ǹ nə́ tamaa nɛ, ka ga bɛ ganaa, ka á re boe la, ka a laakalaa kaa nɛnyaanan manɛ:

¹⁵ mà Lawa lɛ n wɔa Lawa lɛa yǎa duduu, a din nə wɔ nyɛɛnaan boe yǎa duduu.