Loen 44 - LAWA A BOO SONBORE 2011

Basaã a min yɛ kio loe

¹ Koore a minin doree kɔ ǹ loe. A n boe loe-saalin goledɛnaa a sɛ́wɔ nɛ.

² Ee Lawa, n sii dadaran mɛnɛn zɛnaa lɛlɛ, wɔ digolon wɔa biikoo li, wɔ din ná a laakalaa wɔ nɛ, wɔ́ ma ka wɔ too ne.

³ N nə ń tɔrɔ kɔsɔn loo ka pàã nɛ, ń wɔ digolon koa gána kɛ nɛ. Ń fuu nyaa tɔrɔ kɔsɔn manɛ, màn mɛn bɛ́ toɛ, n din a minin sii wo nyɛɛnɛ.

⁴ Ǹ gɔya sa bie á ǹ baa gána lɛ a dɛnan lɛa wa, ǹ dinin pàã bie á ǹ baa gɔ̀lɔ̀n lɛa wa, sɛnɛ, n din a dɔmalɛ pàã nɛ, n din yɔrɔ bɛ́ á goã ǹ la, a giala ń goã ǹ narɛ.

⁵ Maa Lawa, n din nə maa kii lɛa, n din die n nə n minin lɛn gɔ̀lɔ̀baa sii yɔrɔ bɔ.

⁶ Ka n din pàã nɛ, wɔ́ wɔa zɔ́ɔn lɛn loo. Ka n din tɔ nɛ, wɔ́ tɔtɔrɔ wɔa ziadɛnan lɛn la.

⁷ Haayii, masɛ bie n foo doɛ maa sa ganaa wa, maa gɔya sa bie re ma kirisibiɛ wa.

⁸ N din nə wɔ kanbiɛ wɔa zɔ́ɔn ganaa, n din nə sìi diɛ wɔa baa zɔ́ɔbaa wolen kɛn ganaa.

⁹ Lawa, baraabaraa, wɔ n loe loe wɔ tá n tɔ boe ne, wɔ n die n tɔ guguru koe miɛ̃, yǎa duduu. *Doa

¹⁰ Sɛnɛ, n bɛ́ ń wɔ tii, ń sìi da wɔ ganaa. N ba soe kun ka wɔa zia-baalin ni doo wa.

¹¹ N din nə́ ń toa, wɔ́ baa si wɔa zɔ́ɔn kɛn nyɛɛnɛ. Min mɛnɛn bɛ́ wɔ biɛ zɔ́ɔ, bɛn nə́ wɔ gɔn màn yii goa.

¹² N din nə́ ń wɔ kɔ, ka tɔɔn bɛ́ lɔn, ǹ nə́ woe ǹ dii. Ń wɔ loo, ń wɔ pɛsɛ̃ bǎã tumaa nɛ, tɔrɔn bii.

¹³ Ń ke ń nə́ n minin lɛn sã giɔ̀mɔ kɔɔ̃n ganaa, á ke, n là kɔn dɔ yɛ-a wa.

¹⁴ N din nə toɛ, wɔ miãkɛnɛn nə́ sɔ koe wɔ-a, n din nə toɛ, bɛn nə́ wɔ diɛ yaa lɛa, ǹ nə́ wɔ puusə koe.

¹⁵ N din nə toɛ, tɔrɔ kɔsɔn nə́ suusu diɛ wɔ ganaa, n din nə toɛ, tɔrɔ kɔsɔn nə́ wɔ diɛ yaa lɛa, bɛ̀ ǹ nə n kɔkɔrɔ zulu wɔ li.

^16-17 Min mɛn bɛ́ sɔ kiɛ ma la, á n ma diɛ yaa lɛa, bɛ̀ má bɛ lɛ ma, maa zɔ́ɔ mɛn bɛ́ gɛ̀ dòo boe, bɛ̀ má bɛ yɛ ma yɔrɔ-a, ma yiri n maa puusə kɔ ǹ sii kɛ-n miɛ̃, sìi n ka a daa a ma dɛ.

¹⁸ A laanɛ bɛ tumaa wɔ yɛ, wɔ yiri bɔ n nɛ wa, n lɛ kɔ kɔn la mɛn wɔ kɔn wɔ nɛ, wɔ n lɛ bɔ wa.

¹⁹ Wɔ gɔ́ɔ̃ nə n bɔyaa, wɔ́ wusoo wɔ kio-n wa, wɔ gòã talaa wɔ́ n zii da wa.

²⁰ Sɛnɛ, n din nə ń wɔ dɛ ń wɔ kaa tán, wɔ n kɛ kɔrɔn nɛ ka tolokan bɛ́ lɔn. Ń wɔlɔ tii wɔ ganaa ka gɛ̀ bɛ́ lɔn.

²¹ Bɛ̀ wɔ yiri na á bɔ ka n tɔ kɛ nɛ, wɔa Lawa, bɛ̀ wɔ n wɔ́ n gɔn dia lawa kɔsɔ la,

²² bɛ̀ n tá re foɛ̃ a ganaa ya? N din lɛ n minin gɔ́ɔ̃gɔ́ɔ̃ ǹ taasiɛ doɛ̃.

²³ Sɛnɛ, n din a lɛa nɛ, ǹ nə́ wɔ dii lɛawaa tumaa gɔ́ɔ̃ nɛ, n din a lɛa nɛ, ǹ nə́ giɛ wɔ ganaa ka tɔɔ mànan bɛ́ lɔn, ǹ nə́ die ǹ bɔlɔ kuri.

²⁴ Dɛnaa, yoo! Wàa na á baa n tá nyuù we? Yoo! N nyan wɔ tii yǎa duduu wa.

²⁵ Wàa na á baa n tá n yii tiɛ̃ wɔsɛn ganaa? Wàa na á baa n yiri á boe ka wɔsɛn bɔ̀n kɛ nɛ, wàa na á baa n yiri á boe ka wɔsɛn fuu kɛ nɛ?

²⁶ Á ke, wɔ nə n birikəĩ tii li, wɔ nɔ̀ tán kũ palapala.

²⁷ Yoo, da n dɔ wɔ lɛ, n kɔn-narɛɛ gole kɛ taman yii, wɔ nyin si.