Loen 31 - LAWA A BOO SONBORE 2011

Foo-doa Lawa ganaa ǹ nyankɔ

¹ Loe-saalin goledɛnaa loe mɛn lɔ. Davida a loe.

² Dɛnaa Lawa, man kiɛ n din yele, n nyan toa sìi ma kũ duduu wa. Ma kanbaa, n peperebaa kɛ gɔ́ɔ̃ nɛ.

³ N too kɔ ma lon, n nanaa n da ma bɔ a nɛ. N din nə n baa maa duru ǹ bǎã lɛa, n ma tamaa, màn mɛn bɛ́ toɛ, ma kirisibaa.

⁴ Sonbore, n din nə maa duru ǹ bǎã kaka lɛa, n din nə ma tamaa ǹ bǎã lɛa. N din tɔ a bǐɛ̃-kɔ taman yii, mɛ ma nyɛɛnɛ, n ma nyɛɛnaan bɔ.

⁵ Ǹ kan mɛn koa ma nɛ, n din tá re ma kanbiɛ bɛ ganaa, a giala, n din nə ma tamaali lɛa.

⁶ Dɛnaa Lawa, masɛ n ma din sii toɛ n gɔn. N din nə́ ń ma bɔ sii ni, Lawa bɔlɔgoondɛnaa.

⁷ Min mɛnɛn bɛ́ dì kooron kɛn guguru koe, masɛ n bɛn biɛ zɔ́ɔ. Masɛ, masɛ foo n doa-n Dɛnaa Lawa ganaa.

⁸ Foo kɔɔ̃nbaa gɔ́ɔ̃ nɛ, manə n nyɛnyɛɛ, n din a kɔn-narɛɛ gole kɛ taman yii. A giala, n bɛ́ ń maa nɔmaa yɛ, ń maa fuu gole kɛ dɔ̃,

⁹ ń ma toa maa zɔ́ɔ gɔn wa. Ń ma saa ń ma da lon, ń piɛ̃ kaa ma ganaa.

¹⁰ Dɛnaa Lawa, bǐɛ̃ kɔ ma-a, a giala, nɔmaa la ma nɛ. Foo-ziziɛ̃ ma pàã nya lenlen, á ma yii nànan bii.

¹¹ Man die goɛ̃ là-paparɛɛ gɔ́ɔ̃-n kɛnɛn, yǎa ma nyin woe nyɛɛ. Man die goɛ̃ ginii gɔ́ɔ̃-n kɛnɛn, yaa ma woe giɛ̃. Maa sii baraa lɛ taman yii, maa kakabaa nya, ma pàã nya.

¹² Maa zɔ́ɔn kɛn tumaa n sɔ kiɛ ma la, ma miãkɛnɛn kɛn wɔ na á là da. Min mɛnɛn bɛ́ ma doɛ̃, bɛn man nyɛ́ɛ biɛ ma nyɛɛnɛ, bɛ̀ ǹ nə́ ma yɛ kanaa, maǹ baa sii ma nyɛɛnɛ.

¹³ Minin yiri bɔ ma nɛ ka man má gã, ǹ yiri bɔ ma nɛ, ka màn ziziɛ̃ nɛ.

¹⁴ Min mɛnɛn bɛ́ soɛ kɛ diɛ masɛ la, bɛn nə́ mɔnaa. Nyɛ́ɛ n ma ganaa paǹ yii li. Ǹ nə́ kɔn yɛ maa sii-a, maǹ giɛ li ǹ ma nyin bɔ.

¹⁵ Sɛnɛ, masɛ nə n foo doɛ n din ganaa, Dɛnaa Lawa. Má pɛ: máa maa Lawa n ka n din ni.

¹⁶ Biikoo tumaa li, maa sii nə n din gɔn, maa zɔ́ɔn lɛn bɛ́ ma gialaa, ma si n ma bɔ ǹ gɔn.

¹⁷ N din a bɛ̀rɛgiĩ n masɛ nɛ, n yɔrɔ bǐɛ̃ da ma la. N din a kɔn-narɛɛ gole kɛ taman yii, ma kirisibaa.

¹⁸ Dɛnaa Lawa, bɛ̀ ma á lɛ diɛ n la, n nyan toa sìi ma kũ wa. Sɛnɛ, min baraan kɛn lɛn, toa sìi bɛn kũ, toa ǹ dinin kɛn lɛn nə gã, ǹ lɛ kuru ka kiĩn.

¹⁹ Ǹ soɛ bɔ ǹ lɛn kɛn lɛn, bɛn lɛn tã. Min mɛn bɛ́ n din bɔlɔ sii, maǹ nə n tìã dii bɛ li, maǹ din koa ǹ boo diɛ a ganaa, ǹ tá a puusə koe.

²⁰ Sonbore, n bǐɛ̃-zɛnaa á gole á la yii ni. Min mɛnɛn bɛ́ nyɛ́ɛ biɛ n nɛ, ma n koɛ bɛn lɛn nɛ. Min mɛnɛn bɛ́ kiɛ n yele, ma n koe bɛn lɛn la, min tumaa yii ni.

²¹ N din nə bɛn duri n bǎã-durii kɛ nɛ, ǹ wɔlɔ n lui ni, minbuiinin sii tì zɛnaa ganaa. N din nə ǹ tamaɛ, n tá ǹ kanbiɛ lɛwɔn babaraan kɛn ganaa.

²² Maa barka tá n-a, Dɛnaa Lawa, a giala, maǹ nə goã ma gialaa ka maǹ kiwi yui, sɛnɛ, n din a kɔn-narɛɛ gole kɛ kaãbaa ǹ sii zɛnaa ma nɛ.

²³ Maa foo-ziziɛ̃ gɔ́ɔ̃ nɛ, man má goã taasɛ máa ma nə́ n ma loo ń ma bɔ n yɔrɔ-a. Sɛnɛ, ma bɛ́ má n gòã kũ, ń maa gòã-kũ si. Ma bɛ́ má n lɛ dɛ n-a, ń maa lɛ-dɛ ma.

²⁴ Ka Dɛnaa Lawa narɛ, kasɛn mɛnɛn tumaa bɛ́ a wɔn lɛa. Dɛnaa Lawa n goleemali wolen tamaɛ. Sɛnɛ, min mɛnɛn bɛ́ n dinin gole koe, a n dɔlɔ babaraa boe bɛn ganaa.

²⁵ Min mɛn tumaa bɛ́ n foo doɛ Dɛnaa Lawa ganaa, ka n foo taã, ka n gù we yii.