Loen 2 - LAWA A BOO SONBORE 2011

Lawa a kii koa ǹ loe

¹ Gánan bɛ́ n gagasa diɛ, bɛ giala mà wàa? Tɔrɔn bɛ́ n yiri koɛ sii mɛn ganaa, kooro ne.

² Kanaa lɛ a kiin nə́ n lɛ kaa kun, a min dadaran lɛn nə́ yoo Dɛnaa Lawa gialaa, kun ka a kii kɛ nɛ, á bɔ á koa.

³ Kiin lɛn nə́ pɛ: Ka daa wɔ n bɔlɔ bɔ ǹ biɛ nɛ. Ka daa wɔ n si ǹ la.

⁴ Sɛnɛ, Dɛnaa Lawa mɛn bɛ́ kiibaa la lon, bɛ́ yaa wɔ ǹ ganaa, á ǹ da yaa lɛa.

⁵ Bɛ kio a foo yoo ǹ li, á boo da. Bɛa foo boo kɛ lɛ nə́ ǹ foo biɛ na.

⁶ A na á pɛ: Ma kii mɛn bɔ, man má bɛ koa maa *Siɔn kele sonbore kɛ la.

⁷ Dɛnaa Lawa golee boo mɛn la, man die bɛ lɛ pii. Dɛnaa Lawa pɛ ma-n kɛnɛn: Ma n maa nɛgiĩ lɛa, a kũ pelo ganaa, masɛ din ni n Díi lɛa.

⁸ Ma nyankɔ, ma á re gánan tumaa koe n la, ǹ nə n wɔ baa. Ma á re kanaa lɛ doa ǹ bǎãn koe n la, ǹ nə n wɔ baa.

⁹ Pàã mɛn bɛ́ kaka ka fɔlɔ nɛ, n tá re bɛ nyɛɛ ǹ nɛ, n tá re ǹ yɔyɔrɛ ka gì donkolon bɛ́ lɔn.

¹⁰ Haya! Kiin lɛn, ka yiri yɛ kanna kəni. Kanaa a pàãdɛnan lɛn, ka toa ka doroo ma.

¹¹ Ka dí nya Dɛnaa Lawa nɛ, bɛ̀ ka n nyɛ́ɛ biɛ nɛ. Ka a pàãdɛnaabaa dɔ̃ ka n nyɛnyɛɛ.

¹² Ka a nɛgiĩ lɛ guguru kɔ. Bɛ bie wa, bɛ̀ a foo yoo, ka laan bɛ̀ ka dɔ̃, bɛ̀ bɔ̀n ka yɛ. A giala, a foo á re yui fufuu. Min mɛnɛn bɛ́ kiɛ Dɛnaa yele, bɛn foo á re kɔɔ̃n koe.