Loen 105 - LAWA A BOO SONBORE 2011

Dɛnaa Lawa mɛn bɛ́ a zaman kirisibiɛ, a tamaa

¹ Ka Dɛnaa Lawa guguru kɔ, ka a tɔ kɛ kalaa, ka a nya ǹ dí dadaran kɛn boo da tɔrɔ kɔsɔn bii.

² Ka loe lɔ Dɛnaa Lawa nɛ, ka a guguru kɔ ka tùtu wuu ni, ka a kaãbaa ǹ siin kɛn tumaa pɛ, ka timəə la.

³ Ka n din koa, ka Dɛnaa Lawa tɔ sonbore kɛ nɛ. Ka n nyɛnyɛɛ, kasɛn mɛnɛn bɛ́ giɛ Dɛnaa Lawa li.

⁴ Ka ga Dɛnaa Lawa lɛ li, ka ga a pàã kɛ dɔ li. Ka ga li, ka n mɔrɔ a ganaa biikoo tumaa li.

⁵ Ka n yiri koa a kaãbaa ǹ siin kɛn nɛ, á ǹ zɛnaa, a sii-nyaa ǹ siin kɛn nɛ, ka kiri boon kɛn nɛ, ǹ nə́ soo a lɛ-n.

⁶ Ka zɛnaa miɛ̃, kasɛn kɛn lɛn Lawa din a dí-nyali Abrahamu tɔrɔn lɛa, kasɛn kɛn lɛn Zakɔba a nɛnyaanan lɛa, ka n Lawa din a yii gɔgɔɔ̃ wolen lɛa.

⁷ Dɛnaa Lawa lɛ n wɔa Lawa lɛa, a din lɛ n kii lɛa, kanaa tumaa mìi la.

⁸ A nə n yiri koɛ a lɛ kɔ kɔn la kɛ-n biikoo tumaa li. A yiri a boe a lɛ-kɔ kɛ dɔ-n wa, yǎa wasa lɛ minin koa kɔn kio duu goon.

⁹ A lɛ kɔ kɔn la mɛn wɔ ka Abrahamu ni, bɛ lɛ nɛ. A na á baa liɛ lɛa Izaaki ni.

¹⁰ A na á barka wɔ a-n doo, á baa dí-pɛ lɛa, á kɔ Zakɔba la, lɛ kɔ kɔn la duduu ni, Izirayeli minin wɔ lɛa.

¹¹ A na á pɛ a gɔ́ɔ̃-n kɛnɛn: Man die Kanaan gána kɛ koe n la, a kaa wɔ baa.

¹² Bɛa biikoo li, bɛ̀ ǹ ba gigiã wa. Maǹ nə́ goã tii kuru boɛɛn kooro lɛa gána lɛ gɔ́ɔ̃ nɛ.

¹³ Maǹ nə́ goã gánan kiɛ kɔn la.

¹⁴ A laanka bɛ tumaa nɛ, Dɛnaa Lawa toa min kɔn nə mɛnaa ǹ la wa. Á dɔlɔ bɔ kiin ganaa ǹ taman yii, á n gɔn waa ǹ nɛ kɛnɛn:

¹⁵ Ka baran n gɔn da maa yii-gɔgoɛ̃ wolen kɛn-a wa. Ka baran sii baraa zɛnaa maa boo gii-dalin kɛn man wa.

¹⁶ Dɛnaa Lawa bòo gole wɔ gána lɛ gɔ́ɔ̃ nɛ, màn-bii ná a banban.

¹⁷ Sɛnɛ, a din na á min goon dia wɔ digolon nyɛɛnɛ. Zozɛfu kɛ lɛ, ǹ dɔɔ̃nɔn nə́ sã, ka bɛ̀rɛ nɛ.

¹⁸ Ǹ nə́ kanan kaa a gòãn ganaa, ǹ nə́ fɔlɔ biɛ da a bɔlɔ-a.

¹⁹ A na á n zɛnaa miɛ̃, yǎa Zozɛfu a nyɛɛn sii-pɛ kɛ lɛ pã. Dɛnaa Lawa a boo lɛ sonbore kɔ la.

²⁰ Kii tɔ́n pɛ, mà ǹ biɛ bɔ a ganaa, tɔrɔn tumaa a kii pɛ, mà ǹ bɔ kòso-n ǹ da.

²¹ Kii lɛ Zozɛfu koa a kion mìi la, mà a gána lɛ a naforo tumaa sii yɔrɔ bɔ.

²² Min tumaa na á goã Zozɛfu gòã li, haalɛ kii a kiodɛnaa dadaran kɛn. Á goã daraa dɔ koe min golen la.

²³ Bɛ kio, Zakɔba lɛ, a tɔ n Izirayeli dɔn, bɛ́ bɔ Kanaan gána kɛ nɛ, á daa giã Ezipti.

²⁴ Lawa ná a zaman lɛ mɔnaa parsiini, á pàã kɔ ǹ la, á la ǹ zɔ́ɔ Ezipti minin kɛn wɔ nɛ.

²⁵ Lawa din toa Ezipti minin lɛn yiri nə́ n bɔyaa, ǹ ná a zaman lɛ baa zɔ́ɔ, ǹ na a dí-nyali Izirayeli minin lɛn kũ ka soɛ nɛ.

²⁶ Lawa ná a dí-nyali Muizu dia, ka Aarɔn kɛ nɛ, a din bɔ.

²⁷ A na á ǹ baa a din lɛ lɛa, ǹ nə́ boo da. Bɛ lɛ nɛ, Lawa a kaãbaa ǹ siin laanka a sii-nyaa ǹ siin nə́ gisĩ Ezipti gána la.

²⁸ Á wɔlɔ tì dia, á tán tii ni, min kɔn nə n piã ka a boo lɛ-n wa.

²⁹ Á mu bɔyaa mà lɛa, á zɔ̀n dɛ nɛ.

³⁰ Sɔmɔnɔn nə́ gána lɛ pã, yǎa ǹ nə́ woo kaa ǹ kiin kionən ne.

³¹ Lawa boo da, nyuun sɔn-dɔl en laanka nyɔɔnyaanan nə́ soo gána lɛ paǹ tumaa ganaa.

³² A na á la gii kɔ ǹ la, la dòo, la gini, á tɛ kaa ǹ gána lɛ la.

³³ Á ǹ da nɛ-kɔlen dɛ, Á gána lɛ a dan tumaa yiyiɛ.

³⁴ Lawa boo da doo, bisin daa tì lɛa ka biribiri.

³⁵ Ǹ nə́ buu laanka màn bɔ tán wole kɛ tumaa sɔ̃, gána lɛ gɔ́ɔ̃ nɛ.

³⁶ Gána lɛ a sumun tumaa nɛ, Lawa wɔ, á nɛgiĩ bibinaan kɛn tumaa dɛ, ǹ tɔntɔraabaa ǹ nɛgiĩn kɛn lɛn.

³⁷ Á toa a din a zaman kɛ soo ka wɔrɔ laanka sana nɛ. Min kɔn din gòã talaa a din a tɔrɔ minin kɛn bii wa.

³⁸ Ezipti minin nə́ n nyɛnyɛɛ ǹ woo a lɛa, a giala mà nyɛ́ɛ na á goã ǹ ganaa.

³⁹ Lawa labara kɔ a din a zaman lɛ lɛ wúlu lɛa, á tɛ fúlu bɔ ǹ nɛ tèlò-n.

⁴⁰ Ǹ bɛ́ ǹ na a nyankɔ, á bàanan dia ǹ la siĩ lɛa, á màn-bii bɔ lon gɔ́ɔ̃ nɛ, á kɔ ǹ la, ǹ nə́ bii ǹ nə́ kã.

⁴¹ Á gɛ̀fu lɛ bũ, mu soo a nɛ, á baa si don gɔ́ɔ̃ nɛ, ka tà bɛ́ lɔn.

⁴² Á n yiri koa a din a lɛ kɔ ǹ boo sonbore kɛ nɛ, á pɛ a dí-nyali Abrahamu ni.

⁴³ A din na á toa, a zaman nə́ soo ka foo kɔɔ̃n nɛ, á toa a din a yii gɔgoɛ̃ wolen kɛn nə́ soo ka nyɛnyɛɛ gole ne.

⁴⁴ Á tɔrɔ kɔsɔn tánan si, á ǹ kɔ ǹ la, á bɛn dí a là kɔ ǹ la, mà ǹ bii.

⁴⁵ Á giɛ sii mɛn li, mà yǎa ǹ na asɛ foo sii boon laanka asɛ a dí-pɛn tamɛɛ, ǹ koe ǹ lɛ. Aleluya, ka Dɛnaa Lawa tɔ bɔ!