Loen 104 - LAWA A BOO SONBORE 2011

Barka da Lawa nɛ a màn zɛnaa a lɛa

¹ Man kɔnboe ma barka da Dɛnaa Lawa nɛ, ka ma foo tumaa nɛ! Dɛnaa Lawa, maa Lawa, n tá gole á la yii ni. Siĩnbaa laanka tɛ-pɛ nə n ganaa,

² tɛ fúlu nə n ganaa ka dɔnkɛ nɛ. N din nə ń lon nyɔmaa ka mɔnaa kion ne.

³ N din nə n giã ǹ bǎã koɛ mu lalan lon sɔsɔɔ. Ma n labaran biɛ n wotoro lɛa, n nə n tɔ we piɛ̃ li.

⁴ Ma n piɛ̃ biɛ n dia dí-a wole lɛa, tɛ nə n dí-nyali lɛa.

⁵ N din nə́ ń tán giala wɔ a bǎã nɛ, a ba n boe a bǎã-n wa.

⁶ N din nə ń mu kɔ lɛ ka dɔnkɛ nɛ, mu na á goã kelen lalan.

⁷ N bɛ́ ń yoo ǹ gialaa, ǹ nə́ baa si. N bɛ́ ń gini,

⁸ ǹ nə́ n toa kelen la, ǹ nə́ daa bɔ nyankɔrɔ basan nɛ. N din bǎã mɛn koa ǹ wɔ lɛa, ǹ nə́ woo walan.

⁹ N din nə ń gèlè koa, ǹ ba kiɛ̃ bɛ la wa, ǹ ba re wusii doo ǹ da n kɔ tán lɛ wa.

¹⁰ N din nə mu pìãn buĩ, n mu dia mu nyankɔrɔn nɛ, a baa si a wo kelen biin ni.

¹¹ Don mànan tumaa n bɛ lɛ mii, don a dundunun manə ǹ mu boro nyɛɛ ka bɛ lɛ nɛ.

¹² Bàanan manə ǹ kii doe a lɛ-a, maǹ giɛ̃ da luu ni, ǹ tá lɛ biɛ.

¹³ N din nə n toɛ lon n tá la kiɛ kelen la. N din nə toɛ tán tá kiɛ̃ ka mu ni.

¹⁴ N din nə buu boe tán tɔɔn wɔ lɛa, bɛ nɛ, ka minbuiin nɛ bɛ́ màn mɛn dù kɔsɛ. Bɛa yɔrɔ lɛ la, ǹ màn-bii n boe tán:

¹⁵ yɔ n minin foo kɔɔ̃n koe, nyɔɔ nə ǹ yɔrɔ zɔ́nɛ, màn-bii n pàã koe ǹ la.

¹⁶ N din dan mɛnɛn zumu, Liban da dadaran kɛn, bɛn dɔn man kiɛ̃ ka mu ni.

¹⁷ Bàanan manə ǹ kii doe walan, gɔgɔrɔn man kii doe bɛa dan lɛn la.

¹⁸ Kele sɔsɔrɔn man don butumun giã ǹ bǎã lɛa, kele kɔ́sɔn man fuiĩnin duru ǹ bǎã lɛa.

¹⁹ N din nə́ ń mui da n tá lɛawaan bɔkɔnlɛ we ne, ka wasa nɛ, bɛ mɛn bɛ́ a yii-sã biikoo doɛ̃.

²⁰ Bɛ̀ n din wɔlɔ tii, tèlò na á kɔ. Don mànan tumaa nə n bibiĩ bɛa biikoo li.

²¹ Yàran man wɔɔsaa we ǹ siĩ kio, manə ǹ màn-bii liɛ n din la, Lawa.

²² Bɛ̀ wasa bɔ, manə n bɔyɛɛ, maǹ woe wɛɛ tán ǹ kolo ne.

²³ Bɛa biikoo li, minbuiin nɛ n woe a dí nya ǹ bǎã nɛ, a n woe buu kɔsɛ yǎa wasa miɛ̃.

²⁴ Dɛnaa Lawa, n nya ǹ dín tá mɔnaa-n dɛ! Ń yiridɛnaabaa ǹ dí nya koe! Tán nə́ pã ka n màn-zɛnaan nɛ.

²⁵ Ga kɔ̀ mu ganaa, gole ka panapana paǹ tumaa li. Màn yiikoonaa gigiã nə n bibiĩ li, a bɔnboɛɛnɛn nɛ ka a dadaran nɛ, min ba boe la a ǹ nimi wa.

²⁶ Goo dadaran manə n bibiĩ la. N din nə ń tɔɔ màn koe-bɔle kɛ zɛnaa ń da li, màn yiikoonaa gole lɛa, n tá sàn koe ne.

²⁷ Bɛa mànan kɛn lɛn tumaa nə n yii diɛ n din la, mà n màn-bii kɔ ǹsɛn la a biikoo li.

²⁸ N din nə koe ǹ la, bɛ̀ ǹ si, n din nə n gɔn lɛ buĩ, bɛ̀ ǹ tɔn kã.

²⁹ Sɛnɛ, bɛ̀ ń nə́ ǹ nu, koe na á bɔ ǹ ganaa. Bɛ̀ ń fɔfoaã si ǹ la, maǹ giɛ̃, maǹ wusii ǹ nə n baa tii lɛa.

³⁰ Bɛ̀ ń nə́ n fɔfoaã kɔ, kɔsɔn man yii doo, n din nə tán biɛ dii lɛa.

³¹ Dɛnaa Lawa, n gugurubaa kɛ die a goã yǎa duduu. N die n nə n nyɛnyɛɛ n nya ǹ dín kɛn lɛa.

³² Bɛ̀ ń ga tán ganaa kooro, a n bìn diɛ, bɛ̀ ń nə́ n gɔn da kelen ganaa, maǹ tɛmaa boe.

³³ Maa yiikoonaabaa biikoo tumaa li, man die loe loe Dɛnaa Lawa nɛ. Maa lɛawaa gialakun mɛn bɛ́ ma á zɛnɛɛ kanaa, man die loe loe, ma Lawa tɔ bɔ.

³⁴ Dɛnaa Lawa, maa loe kɛ die a kɔɔ̃n kɔ n ganaa! A giala n din nə ma foo kɔɔ̃n koe.

³⁵ Sii baraa-zɛnaali kɛn die ǹ papaã ǹ nə n bɔ tán la, n nyan min baraan kɛn toa kanaa doo wa. Man kɔnboe ma barka da Dɛnaa Lawa nɛ ka ma foo tumaa nɛ, ma pɛ, máa aleluya! Ka Dɛnaa Lawa tɔ bɔ!