Lawa a wúlu-bɔlen 3 - LAWA A BOO SONBORE 2011

Barka da Lawa nɛ ǹ wúlu

¹ Bɛ̀ min tá die barka da Lawa nɛ ǹ wúlu boe, bɛ̀ tɔɔ golee ne, ta a sa nɛ, hinlaa ǹ dan nɛ, a da nɛ kɔn yɛ ka Dɛnaa Lawa nɛ ǹ kion kɛ yɔrɔ-a. Sɛnɛ, wɔ̀lɔ̀ doamaa bie a goã a ganaa wa.

² Ǹ dɛnaa nə n gɔn da bɛa tɔɔ lɛ mìi ni, a tɔn na a bɔlɔ kuru kɔn yɛ ka Lawa nɛ ǹ kion lɛ a kiɛnlɛ-a. Bɛa biikoo li, Aarɔn a nɛgiĩn wúlu-bɔlen kɛn na a mà si, ǹ pɛpɛsɛ̃ *wúlu bɔ ǹ bǎã lɛ wàãn tumaa ganaa.

³ Ǹ bɛ́ re barka da Lawa nɛ ǹ *wúlu màn lɛ a paǹ mɛn tiɛ̃ Dɛnaa Lawa wɔ lɛa, bɛ n ka kɛ nɛ: a nyɔɔ mɛn tumaa bɛ́ pɛnɛɛ nɛ a nàn ganaa,

⁴ a dɔ̀ɔ̃ koron màn paa kɛ laanka nyɔɔ mɛn bɛ́ doa-n kɔn, nyɔɔ mɛn dɔ bɛ́ a kolon li, ka a foo lɛwɔn nɛ, ǹ bɛ bɔ kun ka a dɔ̀ɔ̃ koronən lɛn nɛ.

⁵ Wúlu-bɔlen lɛn nə bɛ tumaa tã wúlu bɔ ǹ bǎã lɛ a tɛ gɔn lɛ la, kun ka wúlu màn tiɛ̃ kɛ nɛ. A n wúlu màn tiɛ̃ lɛa, a tɛmaa gìĩ n kɔɔ̃n Dɛnaa Lawa ganaa.

⁶ Bɛ̀ min tá die tɔɔ boɛɛn koe Dɛnaa Lawa la, barka da ǹ wúlu màn lɛa, ta a gɔ̀lɔ̀ nɛ hinlaa ǹ dan nɛ, wɔ̀lɔ̀ doamaa bie a goã a ganaa wa.

⁷ Bɛ̀ sère ne á n die Lawa goe ne, a doamaa nɛ a da nɛ Dɛnaa Lawa yɔrɔ-a bɔrɔ.

⁸ Ǹ dɛnaa nə n gɔn da bɛa tɔɔ lɛ mìi ni, a tɔn na a bɔlɔ kuru kɔn yɛ ka Dɛnaa Lawa nɛ ǹ kion lɛ a kiɛnlɛ-a. Bɛa biikoo li, Aarɔn a nɛgiĩ wúlu-bɔlen lɛn na a mà si, ǹ pɛpɛsɛ̃ wúlu bɔ ǹ bǎã lɛ wàãn tumaa ganaa.

⁹ Barka da Lawa nɛ ǹ màn lɛ a paǹan mɛnɛn bɛ́ nyɔɔ lɛa, ǹ nə́ die tiɛ̃ Dɛnaa Lawa wɔ lɛa, bɛn man ka kɛn nɛ: a muigoã ke, bɛ̀ ǹ na, bɛ̀ ǹ bɔ kɔn ka a kii ni, bɛ tumaa, a nyɔɔ mɛn tumaa bɛ́ pɛnɛɛ nɛ a nàn ganaa,

¹⁰ a dɔ̀ɔ̃ koron màn paa kɛ laanka nyɔɔ mɛn bɛ́ doa-n kɔn, nyɔɔ mɛn dɔ bɛ́ a kolon li, a foo lɛwɔn nɛ, a bɛ bɔ kun ka a dɔ̀ɔ̃ koronən lɛn nɛ.

¹¹ Wúlu-bɔle lɛ die a bɛ tumaa tã wúlu bɔ ǹ bǎã lɛ lalan, Dɛnaa Lawa wɔ lɛa.

¹² Bɛ̀ bòe ne min nə́ die Lawa goe ne, a doamaa nɛ a da nɛ Dɛnaa Lawa yɔrɔ-a bɔrɔ.

¹³ Bɛ kio, a n gɔn da bòe lɛ mìi ni, a tɔn na a bɔlɔ kuru kɔn yɛ ka Lawa nɛ ǹ kion lɛ yɔrɔ-a. Bɛa biikoo li, wúlu-bɔlen lɛn min goon na a mà si, a pɛpɛsɛ̃ wúlu bɔ ǹ bǎã lɛ wàãn tumaa ganaa.

¹⁴ Ǹ bɛ́ re ǹ mɛn tiɛ̃ ǹ Dɛnaa Lawa gɔ nɛ, bɛ n ka kɛ nɛ: a nyɔɔ mɛn tumaa bɛ́ pɛnɛɛ nɛ a nàn ganaa,

¹⁵ a dɔ̀ɔ̃ koron màn paa kɛ laanka nyɔɔ mɛn bɛ́ doa-n kɔn, nyɔɔ mɛn dɔ bɛ́ a kolon li, ka a foo lɛwɔn nɛ, ǹ bɛ bɔ kun ka dɔ̀ɔ̃ koronən lɛn nɛ.

¹⁶ Wúlu-bɔle lɛ die a bɛ tumaa tã wúlu bɔ ǹ bǎã lɛ lalan. Wúlu màn tiɛ̃ nɛ, a gìĩ n kɔɔ̃nɛ. Màn nyɔɔ tumaa n doe Dɛnaa Lawa ganaa.

¹⁷ Tɔɔ nyɔɔ tumaa laanka a mà tumaa, ǹ nyan toa ǹ bɛ kɔn wɔ ǹ lɛ-n wa. Bɛ n landa lɛa. Ta maǹ giã-n bǎã mɛn nɛ, ǹ doamaa nɛ ǹ bɛ tamaa biikoo tumaa li.