Lawa a wúlu-bɔlen 27 - LAWA A BOO SONBORE 2011

Lɛ kɔ Lawa la ǹ màn saraa ǹ gɔn

¹ Dɛnaa Lawa boo da ka Muizu ni á pɛ nɛ:

² Boo da ka Izirayeli minin lɛn nɛ, n pɛ ǹ nɛ: Bɛ̀ min mɛn nə́ n lɛ kɔ Dɛnaa Lawa la, mà asɛ á die min koe la, ǹ dɛnaa á boe la a wɔrɔ bɔ a bɛa min lɛ mìi si ni, a na a lɛ-kɔ lɛ a sii lɛ pã.

³ A giɔ̀mɔ n ka kɛ nɛ: bɛ̀ giĩ ni, a saa lɛ̀ fuə ganaa a wo lɛ̀ pɔsɔrɔ yaa, bɛ n kɔnpii ka Lawa a kion wɔrɔ we kɛa posooro ne.

⁴ Bɛ̀ lɔ nɛ, pɔsɔɔ nɛ.

⁵ Bɛ̀ nɛginin ni, a saa lɛ̀ sooro ganaa a wo lɛ̀ fuə yaa, wɔrɔ we fuə ne. Bɛ̀ nɛlɔ nɛ, wɔrɔ we fù ni.

⁶ Bɛ̀ nɛginin ni, a saa mui goon ganaa a wo lɛ̀ sooro yaa, wɔrɔ we sooro ne. Bɛ̀ nɛlɔ nɛ, wɔrɔ we sɔɔ nɛ.

⁷ Bɛ̀ giĩ mɛn dɔ lɛ̀ pɔsɔrɔ, hinlaa a na á màn da bɛ la, bɛ mìi si ǹ giɔ̀mɔ n wɔrɔ we fulu sooro, lɔ wɔ n fù.

⁸ Wɔrɔ lɛ mɛn nə n pɛ, bɛ̀ min doobaa baa á la yii ni, a ná a boe la á bɛ sarɛɛ wa, a n lɛ kɔ Lawa la ka min mɛn lɛ nɛ, a wo ka bɛ lɛ nɛ Lawa a wúlu-bɔle yɔrɔ-a, a ga a ganaa, a bɛ́ lɛ mɛn boe. Wúlu-bɔle lɛ na a mìi si ǹ giɔ̀mɔ pɛ, a kɔnpɛ ka a kɔle lɛ pàã lɛ yii ni.

⁹ Bɛ̀ tɔɔ *yoreen ne, ǹ tá boe la ǹ kɔ Dɛnaa Lawa la *wúlu màn lɛa. Bɛ̀ tɔɔ woo tɔɔ dɔ nə́ n kɔ Dɛnaa Lawa la, a dinsɔɔ̃ wɔ n ka bɛ nɛ.

¹⁰ Tɔɔ kɔsɔ ba n diɛ a bǎã-n wa. A sonbore lon ba n koe ka a naarɛ-n wa, a naarɛ dɔ lon ba n koe ka a sonbore-n wa. Bɛ̀ min mɛn nə́ n tã la á ná a lonkɔ, a ǹ mɛn lɛ lonkɔ, a na a lonkɔ ka ǹ mɛn dɔ nɛ, ǹ paanan nə Lawa wɔ lɛa.

¹¹ Bɛ̀ tɔɔ gɔgɔrɛ nɛ, ǹ nə́ ǹ ba boe la ǹ kɔ Dɛnaa Lawa la wúlu màn lɛa wa, ǹ kũ ǹ wo ne Lawa a wúlu-bɔle yɔrɔ-a.

¹² Wúlu-bɔle na a giɔ̀mɔ pɛ, a kɔnpɛ ka a siĩnbaa laanka a siĩnbaabaã nɛ. Bɛ̀ a din lɛ mɛn pɛ, ǹ toa bɛ lɛ ganaa.

¹³ Bɛ̀ tɔɔdɛnaa lɛ pɛ, mà yǎa asɛ na a mìi boe, wúlu-bole lɛ lɛ mɛn pɛ, yǎa a bɛ lɛ a talakɔn sooro goon tii a sã ǹ giɔ̀mɔ lɛ ganaa.

¹⁴ Bɛ̀ min mɛn nə́ n gɔn nyaa a kion ganaa, mà asɛ n die kɛ koe Dɛnaa Lawa la, Lawa a wúlu-bɔle na a giɔ̀mɔ pɛ, a kɔnpɛ ka a siĩnbaa laanka a siĩnbaabaã nɛ. Bɛ̀ a din lɛ mɛn pɛ, ǹ toa bɛ lɛ ganaa.

¹⁵ Bɛ̀ kiondɛnaa lɛ pɛ, mà yǎa asɛ na a mìi boe, wúlu-bɔle lɛ lɛ mɛn pɛ, yǎa a bɛa talakɔn sooro goon tii a sã ǹ giɔ̀mɔ lɛ ganaa, kion lɛ tɔn goɛ̃ a wɔ lɛa.

¹⁶ Bɛ̀ min mɛn ná a wuru paǹ kɔn pɔrɔ á kɔ Dɛnaa Lawa la, bɛ̀ ǹ dɛnaa tá li, a wusoo a na a mìi bɔ, *ɔrzi tɔrɔ mɛn bɛ́ boe la á we wuru lɛ nɛ, wuru lɛ giɔ̀mɔ nə n pii a kɔnpɛ ka bɛ nɛ: ɔrzi kilo biɛsɔɔ kɛ miã n kɔnpii ka wɔrɔ we posooro ne.

¹⁷ Bɛ̀ ǹ dɛnaa na á wuru lɛ kɔ Lawa la lɛ̀ posooro zɔ́n waáraa, wúlu-bɔle wɔrɔ lɛ mɛn pɛ, a n bɛ lɛ sarɛɛ, a mìi bɔ ǹ giɔ̀mɔ lɛa.

¹⁸ Bɛ̀ min mɛn ná a wuru kɔ Dɛnaa Lawa la lɛ̀ posooro zɔ́n lɛ kio, lɛ̀ lɛ mɛn bɛ́ goɛ̃ kanaa lɛ̀ posooro zɔ́n kɔsɔ tɔn dɔ, wúlu-bɔle wuru lɛ a giɔ̀mɔ pɛ a kɔnpɛ ka bɛ nɛ. Wɔrɔ lɛ mɛn doamaa bɛ́ nɛ a n saraa lɛ̀ posooro wɔ lɛa, màn nə n boe bɛ lɛ.

¹⁹ Sɛnɛ, min mɛn wuru lɛ kɔ Lawa la, bɛ̀ bɛ din pɛ mà yǎa asɛ na a mìi boe, wúlu-bɔle lɛ lɛ mɛn pɛ, yǎa a bɛa talakɔn sooro goon tii a sã ǹ giɔ̀mɔ lɛ ganaa, wuru lɛ tɔn na a wɔ biɛ.

²⁰ Sɛnɛ, bɛ̀ ǹ dɛnaa wuru lɛ mìi bɔ wa, á toa min kɔsɔ pii, a mìi bɔ ǹ sii a doe a ganaa doo wa.

²¹ Ta lɛ̀ posooro zɔ́n na á dɔ, bɛa wuru lɛ nə n koɛ Dɛnaa Lawa wɔ lɛa, a ná a wɔbaa-n duduu. Bɛa bǎã lɛ n doe Lawa a wúlu-bɔle ganaa.

²² Bɛ̀ min a bǎã bie ka bǎã mɛn nɛ wa, bɛ̀ a na á pii, yǎa a kɔ Dɛnaa Lawa la,

²³ lɛ̀ lɛ mɛn bɛ́ goɛ̃ kanaa lɛ̀ posooro zɔ́n tɔn dɔ, wúlu-bɔle na a giɔ̀mɔ pɛ a kɔnpɛ ka bɛ lɛ nɛ. Bɛ̀ wuru lɛ a kɔle tá li a na a mìi bɔ, yǎa a bɛa wɔrɔ lɛ lɛ sarɛɛ a din pinaa. A giala, wɔrɔ lɛ n Dɛnaa Lawa wɔ lɛa.

²⁴ Bɛ̀ lɛ̀ posooro zɔ́n dɔ, ǹ wuru lɛ pii min mɛn lon, min mɛn a bǎã bɛ́ nɛ, wuru lɛ n doe bɛ ganaa.

²⁵ Ǹ bɛ́ dí nyɛɛ ka wɔrɔ mɛn nɛ kion sonbore kɛ nɛ, ǹ màn tumaa giɔ̀mɔ pɛ, a kɔnpɛ ka bɛ lɛ nɛ. Bɛa wɔrɔ lɛ a we goon a gugurubaa n garamu fù.

²⁶ Sɛnɛ, min doamaa bie a pɛ mà asɛ n tɔɔ a nɛ bibinaa koe Dɛnaa Lawa la wa. Ta diin nɛ nɛ, ta sère nɛ nɛ, hinlaa ta bòe nɛ nɛ. A giala, bɛ n masɛ Dɛnaa Lawa wɔ lɛa lɛlɛndun.

²⁷ Bɛ̀ tɔɔ gɔgɔrɛ a nɛ bibinaa nɛ, ǹ dɛnaa á boe la a na a mìi bɔ. Lawa a wúlu-bɔle lɛ mɛn pɛ a sã ǹ giɔ̀mɔ lɛa, ǹ dɛnaa bɛ lɛ a talakɔn sooro goon ti a sã ǹ giɔ̀mɔ lɛ ganaa, a na a mìi bɔ nɛ. Bɛ̀ a ba li a na a mìi bɔ wa, Lawa a wúlu-bɔle á boe la a sã, a kɔnpɛ ka a giɔ̀mɔ nɛ.

²⁸ Ka bɛ nɛ, màn mɛn tumaa bɛ́ min gɔn, min ni hinlaa tɔɔ nɛ, hinlaa bǎã nɛ, bɛ̀ á ǹ mɛn toa walan duduu Dɛnaa Lawa taman yii, a boe la a n sã doo wa, a mìi dɔ a boe la a n bɔ wa. Min bɛ́ màn mɛn tumaa toɛ walan duduu Dɛnaa Lawa taman yii, bɛ tumaa n Dɛnaa Lawa dinsɔɔ̃ wɔ lɛa.

²⁹ Ta min mɛn nɛ, ǹ nə́ toa walan miɛ̃ duduu Dɛnaa Lawa taman yii, min ba boe la a na a mìi bɔ wa. Ǹ doamaa nɛ ǹ bɛ dɛ a gã.

³⁰ Tán-kɔsiɛ màn tumaa ka da nɛn nɛ, ǹ fùbaa ǹ wɔ n Dɛnaa Lawa wɔ gii lɛa. Bɛ lɛ doamaa nɛ a dɔ a ganaa.

³¹ Bɛ̀ min ná a màn a fùbaa ǹ wɔ bɔ, mà a n die koe Lawa la, bɛ̀ ǹ dɛnaa din tá li a ǹ kɔn mìi bɔ, yǎa a na a màn lɛ a talakɔn sooro goon tii a ganaa.

³² Màn tumaa a fùbaa ǹ wɔ, tɔɔ dadaran bii hinlaa a bisinin bii, bɛ̀ tɔɔn-lɛduə̃li gɔn bǎã da ǹ mɛn ganaa ka a bàlà nɛ ǹ nimii biikoo li, bɛ n Dɛnaa Lawa wɔ gii lɛa.

³³ Ǹ baran bɔkɔnlɛ wɔ a siĩnin laanka a naarɛn bii wa, ǹ baran ǹ lon dɔ kɔ wa. Sɛnɛ, bɛ̀ ǹ nə́ n tã la ǹ ná a lonkɔ, ǹ nə ǹ mɛn lɛ lonkɔ, ǹ na a lonkɔ ka ǹ mɛn dɔ nɛ, ǹ paanan doamaa nɛ, ǹ dɔ Lawa ganaa. Ǹ dɛnaa dɔ a boe la a ǹ kɔn mìi bɔ doɛ̃ wa.

³⁴ Dɛnaa Lawa nə n gɔn waa Muizu ni ka boon mɛnɛn nɛ, Sinayii kele la, mà ǹ nə ǹ pɛ Izirayeli minin lɛn manɛ, ǹ dinin man ka bɛn nɛ.