Lawa a wúlu-bɔlen 26 - LAWA A BOO SONBORE 2011

¹ Ka baran dìn zɛnaa wa. Ka baran màn nyín hinlaa tíĩ doa wa, ka baran kɔlɔ sɛlɛ ka da tán gána lɛ nɛ, ka bɛ guguru kɔ wa. A giala, masɛ din Dɛnaa Lawa n kaa Lawa lɛa.

² Masɛ lɛawaan mɛnɛn koa *susu ǹ pii lɛa, ka bɛn tamaa, ka gugurubaa wɔ masɛ a kion kɛa sii ni. Masɛ din ni Dɛnaa Lawa lɛa.

Lawa bɔlɔ sii a là

³ Dɛnaa Lawa wusoo á pɛ: Ka kɔ masɛ a landa boon kɛn lɛ, ka maa gɔn waa ǹ boon kɛn tamaa, ka ǹ sii zɛnaa.

⁴ Bɛ̀ ka zɛnaa miɛ̃, lan mɛnɛn bɛ́ ka laadoo bǐɛ̃ koe, ma á die toɛ, bɛn nə kaa a biikoo li. Tán-kɔsiɛ á die bǐɛ̃ koe, dan dɔn tá re nɛ koe.

⁵ Ka bɛ́ re màn mɛn yii, ka á re bɛ duwii, yǎa a woe doe rezɛ̃ ma waáraa ganaa. Ka bɛ́ re rezɛ̃ mɛn dɔ yii, ka á re bɛ niɛ̃, yǎa a woe doe *belee diɛ waáraa ganaa. Ka á re màn bii ka kã. Ka á re boe la ka giã kaa gána lɛ nɛ, ka yiri n bǎã goon ne.

⁶ Ma á re là nyantoro koe gána lɛ la. Ka á re wɛɛ tán ka nyuù wɔ, sii kɔn ná a re nyɛ́ɛ diɛ ka ganaa wa. Don mànan mɛnɛn bɛ́ basaã koe, masɛ á re bɛn papaɛ̃ ma ǹ bɔ gána lɛ nɛ. Masɛ a re toɛ min da zia baa ka ganaa kaa gána kɛ-n doo wa.

⁷ Ka á re kaa zɔ́ɔn lɛn kio lui, ka ǹ dɛ, ka ǹ kaa tán.

⁸ Kaa min sooro á die kaa zɔ́ɔn lɛn min paabiɛ lui, kaa min paabiɛ á die kaa zɔ́ɔn lɛn min duu fù lui. Ka á re kaa zɔ́ɔn lɛn dii, ka ǹ kaa tán.

⁹ Ma á re n yɔrɔ bǐɛ̃ diɛ ka la. Ma á re toɛ ka nɛnyaanan yɛ ǹ bulu bɔ. Ma lɛ kɔ kɔn la mɛn wɔ ka ka nɛ, ma a die bɛ toɛ̃ wa.

¹⁰ Ka n die kaa bɔ don màn zizi bii, bɛ̀ ka a zizi waa, ka a dii kaa a nɛ.

¹¹ Masɛ dinmaa n die giɛ̃ ka bii. Ka tìĩ a re boe ma nyin ni, ma ka tii wa.

¹² Ma din tá re goɛ̃ kun ka nɛ. Man die goɛ̃ kaa Lawa lɛa, ka dɔn man die goɛ̃ maa zaman lɛa.

¹³ Masɛ din Dɛnaa Lawa n kaa Lawa lɛa. Masɛ din ni má ka waa má ka bɔ Ezipti minin kɛn gána nɛ, màn mɛn bɛ́ toɛ, ka baran bɛn bɛ̀rɛn baa doo wa. Ma din ni má Ezipti minin pàã kɛ nya má bɔ ka mìi ni, màn mɛn bɛ́ toɛ, ka dɔn nə goã ka dinin gɔn wìi a lɛa.

Lawa bɔlɔ tii a dɔlɔ

¹⁴ Sɛnɛ, bɛ̀ ka n too kɔ masɛ lon wa, bɛ̀ ka dí-pɛn kɛn lɛn tumaa a sii zɛnaa wa,

¹⁵ bɛ̀ ka n piã ka masɛ a landa boon kɛn nɛ, bɛ̀ masɛ a sii yɔrɔ bɔ ǹ boon kɛn tìĩ bɔ ka nyin ni, yǎa ka ǹ tii, bɛ̀ ka a masɛ a gɔn waa ǹ boon kɛn tumaa a sii zɛnɛɛ doo wa, ka maa lɛ kɔ kɔn la lɛ ziziɛ̃.

¹⁶ Bɛa biikoo li, masɛ dɔ n die kɛ zɛnɛɛ ka nɛ: Man die toɛ gɔ̀nɔn-woɛ̃ ka kũ, ka pɛrɛ, bɛ lɛ nyɛ́ɛ dɛ a wurəə ka ganaa. Bɛa busun lɛn tá re kaa ga ǹ gɔn ziziɛ̃, ǹ ka pàã nya. Ka màn mɛn da kaa wuru-n, kooro ne. Kaa zɔ́ɔn man die bii.

¹⁷ Masɛ á die n bɔyɛɛ ka li, ma toa kaa zɔ́ɔn nə boo ka la. Min mɛnɛn bɛ́ ka biɛ zɔ́ɔ, bɛn lɛn tá re pàã nyɛɛ ka nɛ. Ka á re baa sii, min dɔ din ná a bie ka lui wa.

¹⁸ Bɛ tumaa kio, bɛ̀ kaa tɔn nə n too koe masɛ lon wa, ma bɛ́ re dɔlɔ mɛn diɛ ka mìi ni, kaa sii baraan kɛn taman yii, bɛ á re baraa koe a la yii ni.

¹⁹ Pàã mɛn lɛ á ke toɛ ka a n dinin koɛ, masɛ á die bɛa pàã kɛ lɛ nyɛɛ. Ma á re lon laɛ ka ganaa ka fɔlɔ bɛ́ lɔn, ma tán laa ka ganaa ka zan bɛ́ lɔn.

²⁰ Ka pàã n die nyɛɛ kooro. Ka a re tán dí nyɛɛ ka màn kɔn yɛ a-n doo wa, gána lɛ a dan dɔn ba re nɛ koe doo wa.

²¹ Bɛ̀ ka tá yɔ boe masɛ ganaa, ka a li ka n too kɔ masɛ lon wa, ma bɛ́ re dɔlɔ mɛn boe ka ganaa kɛ kio, kaa sii baraan kɛn taman yii, bɛ á re baraa koe a la yii ni.

²² Ma á re don màn baraan kiɛ ka ganaa, ǹ kaa nɛnyaanan laanka kaa tɔɔn dɛdɛ ǹ nə ǹ nya, ǹ ka dinmaan dɛ ǹ ka kiɛrɛ kɔ, ka min baran min yɛ kiɛ̃ kaa ziin la doo wa.

²³ Bɛ̀ bɛa siin kɛn lɛn dɔn nə ka doro ǹ nə́ ka kɔ masɛ la wa, bɛ̀ ka tá tɔn yɔ boe masɛ ganaa,

²⁴ masɛ dɔ á die yɔ boe ka dɔn ganaa. Masɛ bɛ́ re dɔlɔ mɛn boe ka ganaa bɛ kio, kaa sii baraan kɛn taman yii, bɛ á re baraa koe a la yii ni.

²⁵ Masɛ a lɛ kɔ kɔn la ke ka n ziziɛ̃, man die zia yiɛ ma kaa ka ganaa, ma bɛa dɔlɔ bɔ ka ganaa. Ta ka baa si ka woo n duru kaa kiwin kɛn nɛ kungɔn nə́ ǹ lɛnpɛnɛ, ma á re busu babaraa kiɛ ka ganaa, ma ka wɔ kaa zɔ́ɔn lɛn gɔn.

²⁶ Bɛ̀ má ka nu ka màn-bii ni ǹ mɛn waáraa, lɔ fù á re paɛ̃ kùsì goon toto ganaa, ǹ nə ǹ màn-bii zɛnaa la. Lɔn lɛn tá re màn-bii lɛ zoɛ̃, bɛ̀ ǹ tɔn kɔ ka la. Ka á re bɛ lɛ bii, sɛnɛ, ka a re kiɛ̃ wa.

²⁷ Bɛ̀ masɛ bɛ dɔ zɛnaa má fɔ̃, ka n ka a n too koe masɛ lon wa, bɛ̀ ka tá tɔn yɔ boe masɛ ganaa,

²⁸ masɛ dɔ á re n parsii boe ka li. Masɛ dinmaa bɛ́ re dɔlɔ babaraa mɛn boe ka ganaa, kaa sii baraan lɛn taman yii, bɛ á re ka doree.

²⁹ Bòo lɛ taman yii, ka á re ka yɛ ǹ nɛnyaanan soɛ̃.

³⁰ Bɛ̀ masɛ foo yoo ka li, kaa wúlu bɔ ǹ bǎãn kɛn, ma á re bɛn wurii. Ka tíĩ dadaran mɛnɛn dɔ, ka n wasa guguru koe ne, ma á die bɛn yui. Ma á die ka dininmaan gere kiɛ kɔn la, bɛa dìn kɛn lɛn kɛbɔlɔ lalan. Ka tìĩ á die boe masɛ nyin ni.

³¹ Ma á die kaa kiwin kɛn yui lenlen. Kaa dìn guguru kɔ ǹ bǎãn kɛn, man die bɛn wurii, min ná a ba woe walan doo wa. Kaa wúlu mànan kɛn tɛmaa din gìĩ ba re kɔɔ̃n koe masɛ-n doo wa.

³² Masɛ dinmaa n die ka lui lenlen ma ka bɔ gána lɛ nɛ. Kaa zɔ́ɔn mɛnɛn bɛ́ re die giɛ̃ a nɛ, bɛn dinin tá re n kaãbiɛ.

³³ Masɛ á re zia yiɛ ma kaa ka ganaa, ma ka sasawaa, ma ka kaa tɔrɔ kɔsɔn bii, kaa gána lɛ gɔ́ɔ̃ kooro á die goɛ̃. Kaa kiwin kɛn tá re kɛbɔlɔ kooron biɛ.

³⁴ Bɛ̀ ka a gána lɛ nɛ ǹ mɛn waáraa wa, gána lɛ a tán tá re susui yii bɛa biikoo kɛ lɛ tumaa gɔ́ɔ̃ nɛ. Gána lɛ a tán tá re susui yii a n susu, bɛ á zɛnɛɛ, bɛ̀ ka dininmaan tá kaa zɔ́ɔn gána nɛ.

³⁵ Ka bɛ́ giã-n gána lɛ nɛ, ka bɛ́ ka lɛ kɔ ka susu ǹ lɛawaan mɛnɛn kɔ tán lɛ la wa, tán lɛ á re susui yii bɛn lɛn dòo, a n susu.

³⁶ Kaa min mɛnɛn yii bɛ́ re goɛ̃ koo, ma á re foo biɛ niɛ diɛ bɛn ganaa, kaa zɔ́ɔn lɛn gána nɛ. Ta da luu na á na lon á mɛnaa, ǹ tá re n gòã diɛ baa nɛ. Ǹ tá re baa sii ka min nə ǹ kio ka gɔya sa nɛ. Ǹ tá re boe bɛ̀ ǹ nə n duduwəə tán min dɔ ná a bie ǹ lui wa.

³⁷ Ǹ tá re baa sii ǹ nə n tɔtɔ kɔn nɛ, ka min nə ǹ kio ka gɔya sa nɛ, a da yǎa min dɔ bie ǹ lui wa. Ǹ ba re boe la ǹ golee ǹ zɔ́ɔn nyɛɛn wa.

³⁸ Ǹ tá re giɛ̃ tɔrɔ kɔsɔn gána nɛ, ǹ zɔ́ɔn gána á die ǹ bii.

³⁹ Ǹ min mɛnɛn yii bɛ́ re goɛ̃ koo, bɛn pàã á die nyɛɛ ǹ zɔ́ɔn gána lɛ nɛ, ǹ sii baraan kɛn taman yii. Ǹ digolon sii baraan nɛ, ka ǹ dinin wɔn lɛn nɛ, bɛn lɛn man die toɛ ǹ pàã nya.

Lawa a lɛ kɔ kɔn la

⁴⁰ Ǹ dinin tá re golee ǹ laanka ǹ digolon lɛn sii baraan li, ǹ bɔ ǹ lɛ-n ǹ pɛ, mà ǹsɛn nə́ sã masɛ ganaa, ǹ nə́ yɔ bɔ masɛ ganaa.

⁴¹ Bɛ lɛ na á toa masɛ dɔ yɔ bɔ ǹ ganaa, má ǹ kũ má ǹ dia ǹ zɔ́ɔn gána nɛ. Maǹ nə́ sii la, bɛ lɛ nɛ masɛ dɔlɔ bɔ ǹ ganaa. Bɛ̀ ǹ dinin nə́ daa ǹ nə́ dɔ̃ ǹ mɛn waáraa, mà masɛ bie mɛnɛɛ ǹ la wa,

⁴² masɛ dɔ lɛ kɔ kɔn la mɛn wɔ kɔn ka ǹ digolo Zakɔba nɛ, ka Izaaki laanka ka Abrahamu ni, masɛ dɔ á re bɛ lɛ piɛ̃. Ma lɛ kɔ kɔn la mɛn wɔ kɔn ǹ nɛ gána lɛ dɔ wɔ paǹ li, ma á die bɛ dɔ lɛ piɛ̃.

⁴³ Ǹ tá re gána lɛ toɛ sɛn. A gɔ́ɔ̃ kooro n die goɛ̃. Gána lɛ a tán tá re n susui bɛa biikoo lɛ gɔ́ɔ̃ nɛ, bɛ á zɛnɛɛ, bɛ̀ ǹ dininmaan tá fuu ni, ǹ sii baraan lɛn taman yii. Ǹ tá re doɛ̃, mà masɛ bie mɛnɛɛ ǹ la wa. A giala, maǹ nə́ n piã ka maa sii yɔrɔ bɔ ǹ boon kɛn nɛ, ǹ nə́ maa landa boon kɛn tii.

⁴⁴ Haalɛ bɛ tumaa kio, ǹ bɛ́ re goɛ̃ ǹ zɔ́ɔn lɛn gána nɛ ǹ mɛn waáraa ke, ma a re n piɛ̃ ǹ nɛ wa, ma a re ǹ tii wa. Ma a re bɛ zɛnɛɛ ma ǹ dɛ ma ǹ nya wa, ma ba re maa lɛ kɔ kɔn la kɛ toɛ̃ ma bɔ kɔn-a ǹ nɛ wa. A giala, masɛ din Dɛnaa Lawa nə ǹ Lawa lɛa.

⁴⁵ Ma á die maa lɛ kɔ kɔn la kɛ lɛ piɛ̃ ǹ wɔ paǹ li. A din lɛ kɔ kɔn la kɛ lɛ nɛ, ma doa kɔn ka bibinaadɛnan kɛn lɛn nɛ, ma ǹ mɛnɛn lɛn waa má ǹ bɔ Ezipti gána nɛ, tɔrɔ kɔsɔn yii ni, màn mɛn bɛ́ toɛ, ma goã ǹ Lawa lɛa. Masɛ din Dɛnaa Lawa má pɛ.

⁴⁶ Landa mɛn bɛ́ a tan, ka sii yɔrɔ bɔ ǹ boon laanka dí-pɛn kɛn nɛ, Dɛnaa Lawa nə́ ǹ koa a din laanka Izirayeli minin lɛn bii, ǹ dinin lɛn man ka bɛn nɛ. A na á ǹ pɛ Muizu ni Sinayii kele la, mà a ǹ pɛ Izirayeli minin lɛn manɛ.