Lawa a wúlu-bɔlen 15 - LAWA A BOO SONBORE 2011

Giĩ a gɔ̀

¹ Dɛnaa Lawa boo da ka Muizu laanka Aarɔn nɛ á pɛ ǹ nɛ:

² Ka boo da Izirayeli minin lɛn nɛ ka pɛ ǹ nɛ: Giĩ woo giĩ, kii mu a da a din li ǹ busu ná a giulun ganaa, kii mu a da miɛ̃ lɛ n *gɔ̀ lɛa.

³ Ta a giulun nə toɛ á n kiɛ, hinlaa ta a n kuĩ á golee ne, gɔ̀ nɛ, ǹ dɛnaa a gɔ̀ nɛ.

⁴ Giĩ mɛn bɛ́, kii mu a da a din li ǹ busu ná a ganaa, bɛ̀ á waa piì mɛn la, bɛa piì lɛ dɔ n gɔgɔrɛ koe. Bɛ̀ á giã màn woo màn la, a n gɔgɔrɛ koe.

⁵ Bɛ̀ min mɛn nə́ n gɔn da bɛa piì lɛ ganaa, ǹ dɛnaa doamaa nɛ a na a mɔnaan pii, a n zoo. Sɛnɛ, ǹ dɛnaa n goɛ̃ gɔ̀dɛnaa lɛa, yǎa wasa woe miɛ̃.

⁶ Busulə lɛ giã màn mɛn la, bɛ̀ min mɛn giã bɛa màn lɛ la, ǹ dɛnaa doamaa nɛ, a na a mɔnaan pii, a n zoo. Sɛnɛ, ǹ dɛnaa n goɛ̃ gɔ̀dɛnaa lɛa yǎa wasa woe miɛ̃.

⁷ Bɛ̀ min mɛn nə́ n gɔn da busulə lɛ paǹ mɛn ganaa, ǹ dɛnaa doamaa nɛ a na a mɔnaan pii, a n zoo. Sɛnɛ, ǹ dɛnaa n goɛ̃ gɔ̀dɛnaa lɛa, yǎa wasa woe miɛ̃.

⁸ Min mɛn bɛ́ yoreene landa wɔ paǹ li, bɛ̀ giĩ busulə lɛ sɛ̀ kaa bɛ ganaa, ǹ dɛnaa doamaa nɛ a na a mɔnaan pii, a n zoo. Sɛnɛ, ǹ dɛnaa n goɛ̃ gɔ̀dɛnaa lɛa yǎa wasa woe miɛ̃.

⁹ Bɛ̀ giĩ busulə lɛ dii màn woo màn la á woo zii ni, bɛ n màn gɔgɔrɛ biɛ.

¹⁰ Màn woo màn, bɛa giĩ busulə lɛ giã la, bɛ̀ min mɛn nə́ n gɔn da bɛ ganaa, ǹ dɛnaa n goɛ̃ gɔ̀dɛnaa lɛa, yǎa wasa woe miɛ̃. Bɛ̀ min mɛn dɔ́ bɛ miã màn lɛ saa, ǹ dɛnaa doamaa nɛ a na a mɔnaan pii, a n zoo. Sɛnɛ, ǹ dɛnaa n goɛ̃ gɔ̀dɛnaa lɛa, yǎa wasa woe miɛ̃.

¹¹ Bɛ̀ bɛa busu lɛ tɔrɔ tá min mɛn ganaa, bɛ̀ ǹ dɛnaa nə n gɔn pii wa, yǎa a n gɔn da min mɛn ganaa, ǹ dɛnaa doamaa nɛ, a na a mɔnaan pii, a n zoo. Sɛnɛ, ǹ dɛnaa n goɛ̃ gɔ̀dɛnaa lɛa, yǎa wasa woe miɛ̃.

¹² Màn mɛn bɛ́ ǹ nə́ zɛnaa ka gì ni, bɛ̀ giĩ busulə lɛ nə́ n gɔn da bɛ ganaa, ǹ doamaa nɛ, ǹ bɛa màn lɛ yu. Bɛ̀ ǹ mɛn nə gɔn màn lɛa, ǹ doamaa nɛ ǹ bɛ pii.

¹³ Kii mu a da a din li ǹ busu mɛn goã giĩ lɛ ganaa, bɛ̀ á nya, a doamaa nɛ a n yii da lɛawaa sɔbaa, a gɔ̀ bɔma-a ǹ lɛawaa lɛa. Bɛ kio, a na a mɔnaan pii, a n zoo mu yoreen li, á die *yoreen koe.

¹⁴ Lɛawaa kiwisibaa ǹ wɔ pinaa, a wuruun màn paa hinlaa zɛrɛkantoan màn paa kũ, a da ǹ kɔ Lawa a wúlu-bɔle la, kɔn yɛ ǹ kion kɛ a kiɛnlɛ-a, Dɛnaa Lawa yɔrɔ-a.

¹⁵ Lawa a wúlu-bɔle die a bàanan lɛn goon baa sii baraa sawaa ǹ *wúlu màn lɛa, a ǹ goon baa wúlu màn tiɛ̃ lɛa. Wúlu-bɔle lɛ gɔ̀ bɔma-a ǹ landa zɛnaa bɛa giĩ lɛ a lɛa, kɔn yɛ ka Dɛnaa Lawa nɛ ǹ kion kɛ yɔrɔ-a, a kii mu a da a din li lɛ taman yii.

¹⁶ Bɛ̀ giĩ giulun pisəə, a doamaa nɛ, a n zoo duduu. Sɛnɛ, a n goɛ̃ gɔ̀dɛnaa lɛa, yǎa wasa woe miɛ̃.

¹⁷ Mɔnaa woo mɔnaa, hinlaa kɔmalɛ woo kɔmalɛ, á n ki lɛa, bɛ̀ giĩ giulun pisəə a ganaa, ǹ doamaa nɛ ǹ bɛ pii. Sɛnɛ, a n goɛ̃ màn gɔgɔrɛ lɛa, yǎa wasa woe miɛ̃.

¹⁸ Bɛ̀ lɔ giã kun ka giĩ ni, ǹ doamaa nɛ, ǹ nə n zoo. Sɛnɛ, maǹ goɛ̃ gɔ̀dɛnan lɛa, yǎa wasa woe miɛ̃.

Lɔ a gɔ̀

¹⁹ Bɛ̀ lɔ a mui tá a ganaa yǎa mà soo, a n goɛ̃ gɔ̀dɛnaa lɛa, yǎa lɛawaa sɔbaa. Bɛ̀ min mɛn dɔ nə́ n gɔn da a ganaa, ǹ dɛnaa n goɛ̃ gɔ̀dɛnaa lɛa yǎa wasa woe miɛ̃.

²⁰ Bɛ̀ lɔ a mui lɛ tá a ganaa, bɛ̀ á waa tán màn woo màn la, bɛ̀ á giã màn mɛn dɔ la, bɛ n gɔgɔrɛ koe.

²¹ Bɛ̀ min mɛn nə́ n gɔn da a waa ǹ piì ganaa, ǹ dɛnaa doamaa nɛ a na a mɔnaan pii, a n zoo. Sɛnɛ, ǹ dɛnaa n goɛ̃ gɔ̀dɛnaa lɛa, yǎa wasa woe miɛ̃.

²² Bɛ̀ á giã màn mɛn la, bɛ̀ min mɛn kɔsɔ giã bɛ la, ǹ dɛnaa doamaa nɛ a na a mɔnaan pii, a n zoo. Sɛnɛ, ǹ dɛnaa n goɛ̃ gɔ̀dɛnaa lɛa, yǎa wasa woe miɛ̃.

²³ Bɛ̀ màn mɛn tá a waa ǹ piì lɛ la, hinlaa a giã ǹ bǎã lɛ nɛ, bɛ̀ min mɛn nə́ n gɔn da bɛ ganaa, ǹ dɛnaa n goɛ̃ gɔ̀dɛnaa lɛa, yǎa wasa woe miɛ̃.

²⁴ Bɛ̀ giĩ giã kun ni bɛa biikoo kɛ lɛ gɔ́ɔ̃ nɛ, a mà lɛ n die kiɛ a ganaa. Bɛ̀ á n baa miɛ̃ lɛn, bɛa giĩ lɛ n goɛ̃ gɔ̀dɛnaa lɛa, yǎa lɛawaa sɔbaa. Bɛ̀ á waa piì mɛn dɔ la, bɛ n gɔgɔrɛ koe.

²⁵ Bɛ̀ lɔ lɛ a lɛawaa ba a ganaa wa, a n mà dɔ kiɛ lɛawaa damata gɔ́ɔ̃ nɛ, hinlaa bɛ̀ a lɛawaa kũ á kiɛ̃, á n tɔn mà lɛ kiɛ, a n goɛ̃ gɔ̀dɛnaa lɛa a mà-kaa biikoo lɛ tumaa gɔ́ɔ̃ nɛ, ka a bɛ́ gɔ̀dɛnaa lɛa lɔn, bɛ̀ a lɛawaa tá a ganaa.

²⁶ Bɛ̀ bɛa mà-kaa lɛ tá a ganaa, bɛ̀ á waa piì woo piì la, bɛ̀ á giã màn woo màn dɔ la, bɛ n goɛ̃ gɔgɔrɛ, ka a bɛ́ gɔgɔrɛ koe lɔn, bɛ̀ á daa yǎa lɔ lɛ a lɛawaa tá a ganaa.

²⁷ Bɛ̀ min mɛn nə́ n gɔn da ǹ ganaa, ǹ dɛnaa doamaa nɛ a na a mɔnaan pii, a n zoo. Sɛnɛ, ǹ dɛnaa n goɛ̃ gɔ̀dɛnaa lɛa yǎa wasa woe miɛ̃.

²⁸ Bɛ̀ a mà-kaa lɛ nya, a n yii da lɛawaa sɔbaa doo, a tɔn goã yoreene.

²⁹ A lɛawaa kiwisibaa ǹ wɔ pinaa, a wuruun màn paa hinlaa zɛrɛkantoan màn paa kũ, a da ǹ kɔ Lawa a wúlu-bɔle la, kɔn yɛ ka Lawa nɛ ǹ kion kɛ a kiɛnlɛ-a.

³⁰ Wúlu-bɔle lɛ na a goon baa sii baraa sawaa ǹ wúlu màn lɛa, a na a goon baa wúlu màn tiɛ̃ lɛa. Mà-kaa mɛn goã á lɔ lɛ baa gɔ̀dɛnaa lɛa, wúlu-bɔle lɛ bɛa gɔ̀ bɔma-a ǹ landa zɛnaa a lɛa, kɔn yɛ ka Dɛnaa Lawa nɛ ǹ kion kɛ yɔrɔ-a.

³¹ Muizu laanka Aarɔn ganaa, ka pɛ Izirayeli minin lɛn manɛ: Bɛ̀ gɔ̀ tá ka mɛn ganaa, n giã tìãlɛ-a. Masɛ a giã ǹ kion mɛn bɛ́ ka bii, bɛ̀ ka gɔ̀ lɔ bɛ ganaa wa, ka a re giɛ̃ wa.

³² Landa mɛn bɛ́ a tan, a din nə ka bɛ nɛ. A n giĩ wɔ paǹ li, bɛ̀ kii mu a da a din li ǹ busu tá a ganaa, hinlaa giulun a pisəə mɛn bɛ́ min biɛ gɔ̀dɛnaa lɛa, bɛ̀ bɛ tá a ganaa.

³³ A n lɔ dɔ wɔ paǹ li, bɛ̀ a lɛawaa tá a ganaa. A n giĩ laanka lɔ wɔ paǹ li, bɛ̀ kii a da a din li ǹ busu tá a ganaa, ka giĩ mɛn dɔ bɛ́ á giã kun ka lɔ gɔ̀dɛnaa nɛ.