KZS2 33 - LAWA A BOO SONBORE 2011

Manaasee n Zudaan kii lɛa

¹ Manaasee kiibaa yɛ bɛ̀ a lɛ̀ fulupaa nɛ. Á kii baa Zeruzalɛmu lɛ posoorowensooro.

² Sii mɛn bɛ́ baraa Dɛnaa Lawa yii li, á bɛ zɛnaa. Dɛnaa Lawa goã á tɔrɔn mɛnɛn lɛn loo á ǹ bɔ Izirayeli nɛnyaanan nyɛɛnɛ, ǹ nə́ giã ǹ bǎã nɛ, Manaasee na á goã koe bɛn sii bɔbɔnɛɛn kɛn lɛ.

³ Ǹ di Ezekiasi dì bǎã mɛnɛn wuru, á wusoo á bɛn dɔ. Á wúlu bɔ ǹ bǎãn dɔ dì *Baali guguru kɔ ǹ wɔn lɛa. Á dì gɔnɔn zɛnaa, á kaa tán lon gɔ̀nɔn ganaa ǹ mànan kɛn tumaa giulun á ǹ guguru kɔ.

⁴ Á wúlu bɔ ǹ bǎãn kɔsɔn dɔ Dɛnaa Lawa a kion. Bɛa kion kɛ lɛ nɛ, Dɛnaa Lawa goã á boo da a wɔ paǹ li á pɛ: Man die n tɔ toɛ Zeruzalɛmu kiwi yǎa duduu.

⁵ Á wúlu bɔ ǹ bǎãn kɔsɔn dɔ lon màn zɛnaan lɛn wɔn lɛa Lawa guguru kɔ ǹ kion a sumu màn paa kɛ nɛ.

⁶ A ná a nɛgiĩ baa wúlu màn-tiɛ̃ lɛa. Á boobaa ǹ dí nya, á kɔ́lɔnbaa ǹ siin zɛnaa, wɔ kũ ǹ siin ni ka nyín bíi ǹ dí ni. Siin mɛnɛn bɛ́ baraa Dɛnaa Lawa yii li, Manaasee na á bɛn lɛn dinin zɛnaa á la yii ni, á Dɛnaa Lawa foo yoo.

⁷ Á dì goon nyín sɛlɛ á da Lawa a kion. A da yǎa dɔn, Lawa goã á pɛ Davida laanka a nɛgiĩ Salomɔn nɛ: «Man die n tɔ toɛ kion kɛ lɛ gɔ́ɔ̃ nɛ Zeruzalɛmu, yǎa duduu. Man má kiwi kɛ lɛ bɔ Izirayeli tɔrɔ fulupaa a kiwin tumaa bii.

⁸ Ma a re Izirayeli zaman lɛ diɛ paǹ yii li doo wa, ǹ nyan sɔsɔɔ kɔ gána lɛa má kɔ ǹ digolon la wa. Ma a re bɛ zɛnɛɛ doo wa. Sɛnɛ yǎa ǹ koe dí-pɛn kɛn tumaa lɛ, gɔn waa ǹ boo kɛn nɛ ka landa boon kɛn nɛ má ǹ kɔ Muizu la.»

⁹ Sɛnɛ, Manaasee Zeruzalɛmu minin laanka Zudaa gána minin kaa sii baraa zɛnaa ganaa. Ǹ sii zɛnaa baraa kɔ á la tɔrɔn kɛn wɔn manɛ Dɛnaa Lawa nə ǹ loo á ǹ bǎã kɔ Izirayeli minin la.

¹⁰ Dɛnaa Lawa na á goã boo diɛ Manaasee ne kun ká a zaman nɛ, sɛnɛ ǹ goà n yiri koɛ li wa.

¹¹ Bɛ lɛ nɛ, Dɛnaa Lawa Asiiriin kii a zia-baalin nyɛɛnaandɛnan dia ǹ gialaa. Ǹ nə́ Manaasee kũ, ǹ nə́ koɛ̀ɛ̃nən kaa a ganaa, ǹ nə́ yii ka zan zɔrɔkan nɛ ǹ nə́ woo ne *Baabilonii.

¹² A koe lɛ gɔ́ɔ̃ nɛ, Manaasee Dɛnaa Lawa, a Lawa nyankɔ. Á n din boɛɛn kɔ ǹ digolon Lawa yɔrɔ-a parsiini,

¹³ á gòa-kũ da a ganaa. Lawa toa a lɛ-dɛ dɔ a li, á n too kɔ a nyankɔ ganaa. Á wusoo á daa nɛ Zeruzalɛmu, a ná a kiibaa ǹ pàã kɔ la. Bɛ lɛ na á toa Manaasee dɔ̃, mà Dɛnaa Lawa lɛ din ni Lawa lɛa.

¹⁴ Bɛa siin kɛn kio, Manaasee kungɔn dɔ á woo lon, "Davida a kiwi" lɛ a kanaa la. Bɛa kungɔn lɛ-n boe Giɔn mu yala kɛa lɛ̀nyɛɛn gɔn la, a n kiɛ̃ woe boe Sedrɔn a nyankɔrɔ basa kɛ nɛ yǎa zɔ̀nɔn kiɛnlɛ-a, a Ofɛli dala kɛ lɛnpɛnɛ. Manaasee sɔraasin nyɛɛnaandɛnan koa Zudaa kiwi kɛn tumaa nɛ tamaa nɛ.

¹⁵ Á ǹ kaa lawa tiin kɛn goa ganaa, ka dì nyín kɛ nɛ á sɛlɛ á da Lawa a kion kɛ nɛ. A *wúlu bɔ ǹ bǎã mɛnɛn dɔ Dɛnaa Lawa a kion a kele kɛ la ka Zeruzalɛmu gɔ́ɔ̃ nɛ, á n tumaa ziziɛ̃. A ná a lɛkaran zũ, á ǹ bɔ kiwi lɛ nɛ.

¹⁶ Á wusoo á wúlu bɔ ǹ bǎã dɔ Dɛnaa Lawa wɔ lɛa. Á barka da Lawa nɛ ǹ wúlu mànan kɔ walan ka Lawa tɔ bɔ ǹ wúlu mànan nɛ, á n pii Zudaa minin manɛ mà ǹ Dɛnaa Lawa, Izirayeli a Lawa guguru kɔ.

¹⁷ Ka bɛ nɛ, minin tá tɔn wúlu mànan koe wúlu bɔ ǹ bǎãn nɛ, sɛnɛ maǹ koe Dɛnaa Lawa, ǹ Lawa dinsɔɔ̃ la.

¹⁸ Manaasee a sii zɛnaa kɔsɔn kɛn, a nyan mɛn kɔ a Lawa la, Lawa a boo gii-dalin dɔn nə boon mɛnɛn da nɛ, Dɛnaa Lawa, Izirayeli a Lawa wɔ lɛa, bɛn tumaa ta kiɛ̃ nɛ "Izirayeli a kiin sii zɛnaan sɛ́wɔ" nɛ.

¹⁹ Lawa a boo gii-dali "Ozayii a sɛ́wɔ" kɛ na a Lawa nyankɔ kɛ nyɛɛ, ka Lawa na a lɛ si ka yɔrɔ mɛn nɛ. A tá a sii baraan dɔn boo diɛ ka a bɔlɔgoonbaãdɛnaabaa nɛ Lawa wɔ paǹ li. Manaasee a bǎãn doan nɛ, a dìn doa bǎãn mɛnɛn nɛ, ka dì nyín-sɛlɛn nɛ, Manaasee na á bɛn zɛnaa á tɔn nə n din boɛɛn kɔ Lawa yɔrɔ-a.

²⁰ Manaasee gã á woo ǹ diogolon li. Ǹ nə́ bĩ a dina sumu-n. A nɛgiĩ Amɔn na á kii baa a bǎã nɛ.

Amɔn nə Zudaan kii lɛa

²¹ Amɔn kiibaa yɛ bɛ̀ a lɛ̀ fuəwenpaa nɛ, á kii baa Zeruzalɛmu lɛ̀ paa.

²² Sii mɛn bɛ́ baraa Dɛnaa Lawa yii li a na á bɛ zɛnaa ka ǹ di Manaasee wɔ bɛ́ lɔn. A n wúlu mànan koe dì nyínin la, ǹ di nə ǹ mɛnɛn lɛn sɛlɛ, á ǹ guguru koe.

²³ Sɛnɛ, a n din boɛɛn kɔ Dɛnaa Lawa yɔrɔ-a ka ǹ di bɛ́ á zɛnaa lɔn wa. Asɛ din wusoo doo á sii baraa zɛnaa á la ǹ di Manaasee ne.

²⁴ A sɔraasi nyɛɛnaandɛnan nə́ boo wɔ kɔn a ganaa ǹ nə́ dɛ a kii kion.

²⁵ Sɛnɛ min mɛnɛn nə boo wɔ kɔn kii Amɔn ganaa, Zudaa minin nə́ ǹ dɛ. Ǹ nə́ tɔn a nɛgiĩ Zoziasi bɔ ǹ nə́ koa kii lɛa.