KZS2 27 - LAWA A BOO SONBORE 2011

Zoatamu n Zudaan kii lɛa

¹ Zoatamu á kii biɛ bɛ̀ a lɛ̀ fuəwensooro ne. Á kii baa Zeruzalɛmu lɛ̀ fulusɔrɔ. Ǹ dan tɔ n Yerusaa, Sadɔki a nɛlɔ nɛ.

² Sii mɛn bɛ́ siĩn Dɛnaa Lawa yii li, Zoatamu na á bɛ lɛ zɛnaa ka te ka a díi Oziasi wɔ bɛ́ lɔn. Asɛ wɔ Dɛnaa Lawa a kion kɛ-n wa. Sɛnɛ, zaman lɛ goã lɛ pii ǹ màn sii.

³ Zoatamu Lawa a kion a kiɛnlɛ gole kɛ dɔ. Á màn gigiã dɔ Ofɛli kungɔn la.

⁴ Á kiwin dɔ Zudaa a kele yii kɛ nɛ. Á kungɔn dɔ kiwi tamaa ǹ wɔ lɛa, ka gɔnda ǹ bǎãn nɛ.

⁵ Zoatamu zia baa Amɔn tɔrɔn kii ganaa á boo ǹ la. Bɛa lɛ̀ kɛ lɛ-a, Amɔn tɔrɔn lɛn nə́ nyin giɔ̀mɔ saraa Zoatamu la, wɔrɔ tɔnɔ sɔɔ, *belee tɔnɔ duu sɔɔ (3 000) ka *ɔrzi tɔnɔ duu sɔɔ nɛ. Ǹ nə́ bɛa nyin giɔ̀mɔ kɛ lɛ miã saraa a lɛ̀ paabaa ǹ wɔ li ka a sɔɔbaa ǹ wɔ nɛ.

⁶ Zoatamu pàã yɛ parasii ni, a giala, a n tɔ we Dɛnaa Lawa yɔrɔ-a ka peperebaa nɛ.

⁷ Zoatamu a zɛnaa ǹ sii kɔsɔn kɛn tá kiɛ̃ nɛ Izirayeli laanka Zudaa kiin sɛ́wɔ nɛ. Bɛa sɛ́wɔ lɛ na a ziabaan laakalɛɛ, ka a zɛnaa ǹ sii tumaa nɛ.

⁸ Zoatamu na á kiibaa bɛ̀ a lɛ̀ fuəwensooro ne, á kii baa Zeruzalɛmu lɛ̀ fulusɔrɔ.

⁹ A bɛ́ á gã á woo ǹ digolon li, maǹ nə́ bĩ "Davida a kiwi". A nɛgiĩ Ahaazi kiibaa a bǎã nɛ.