KZS1 29 - LAWA A BOO SONBORE 2011

Lawa a kion dɔ a mangɔ

¹ Kii Davida pɛ zaman tumaa yɔrɔ-a kɛnɛn: «Maa nɛgiĩ Salomɔn ke Lawa ná a dinsɔɔ̃ bɔ, a n nɛ ten lɛa, a tɔn sii dɔ̃ wa. Di mɛn bɛ re n nyɛɛ, dí gangabiɛ nɛ. A bie kii kion lɛa ǹ nə́ doe koe minbuiin nɛ la wa, sɛnɛ Dɛnaa Lawa a kion ne.

² Ma bɛ́ boe sii mɛn din tumaa la maa Lawa a kion lɛ a doe taman yii, ma bɛn yɔrɔ bɔ. Má sana sɔkɔn, wɔrɔ nɛ, zan nɛ, fɔlɔ nɛ ka gɔn nɛ, laadoo mànan zɛnaa a lɛa. Má kɔlɔ tɔrɔ gigiã yɔrɔ bɔ kɔrɔnalini kɔlɔ lɛa, ka kɔlɔ kɔsɔn nɛ, nyaǹ kɔ ǹ wɔn lɛa, kɔlɔ gɔ̀nɔn totoro ne ka kɔlɔ tɔrɔ kɔsɔn nɛ, kɔlɔ giɔ̀mɔ kaka-a tɔrɔ tumaa nɛ ka marbərə fu gigiã nɛ.

³ Ka bɛ nɛ, maa Lawa a kion lɛ bɛ́ kɔɔ̃n ma ganaa man ma din gɔn sana laanka wɔrɔ koe, ǹ kaa kun ka mànan kɛn nɛ ǹ nə́ ǹ yɔrɔ bɔ bǎã sonbore kɛ wɔ lɛa.

⁴ Man sana yoreen tɔnɔ paabiɛ (100) ka wɔrɔ yoren tɔnɔ biɛpaa pusi (240) koe ǹ kaa Lawa a kion lɛ gɔ̀nɔn ganaa,

⁵ Sana nɛ sana mànan wɔ lɛa, wɔrɔ nɛ wɔrɔ mànan wɔ lɛa, gɔn dí-nyalin dí tumaa wɔ lɛa. Kanna kəni, die n ka bii á golee li, a bɔ a din ni a màn kɔ Dɛnaa Lawa wɔ lɛa?»

⁶ Kɛdɛnan nɛ, tɔrɔn nyɛɛnaadɛnan nɛ, zia nɛ duu goon nyɛɛnaandɛnan nɛ, zia nɛ paabiɛ nyɛɛnaandɛnan nɛ, kurun nyɛɛnaandɛnan mɛnɛn bɛ́ dí nyɛɛ kii ni, ǹ tumaa gɔn màn bɔ ǹ foo-a ǹ nə́ kɔ.

⁷ Maǹ koe Lawa a kion kɛ a dí nyɛɛ taman yii: Sana tɔnɔ paabiɛ ka pɔsɔbaa (170), sana wa duu fù (10 000) wɔrɔ wɔ la tɔnɔ biɛsɔɔ (300) nɛ, zan tɔnɔ biɛsɔrɔ (600), fɔlɔ wɔ la tɔnɔ duu sɔɔ (3 000) nɛ.

⁸ Kɔlɔ giɔ̀mɔ kaka-a bɛ́ yii min mɛnɛn gɔn, ǹ nə́ daa kɔ Gɛrsɔn a tanlɛ min Yeyiieli la, Dɛnaa Lawa a kion a naforo lɛa.

⁹ Zaman tumaa foo kɔɔ̃n kɔ bɛa minin kɛn lɛn gɔn màn kɔ Dɛnaa Lawa la lɛ taman yii, a giala maǹ nə́ kɔ Dɛnaa Lawa la ka ǹ foo tumaa nɛ. Kii Davida dɔ gɔ́ɔ̃ pã ka foo kɔɔ̃n nɛ.

Davida n loe loe á barka diɛ Lawa nɛ

¹⁰ Davida barka da Dɛnaa Lawa nɛ zaman tumaa yɔrɔ-a, a n pii kɛnɛn: «Gugurubaa nə wɔ lɛa, biikoo yii tumaa li yǎa duduu, Dɛnaa Lawa, Izirayeli a Lawa, wɔa Lawa!

¹¹ Dɛnaa Lawa, kakabaa nɛ, pàã nɛ, tɔ golebaa nɛ, siĩnbaa nɛ ka golebaa nɛ, bɛn tumaa nə n din wɔ lɛa, lon gɔ́ɔ̃ nɛ ka tán la nɛ. N din nə kii lɛa, nsɛ mɛn bɛ màn tumaa mìi la.

¹² Pàãmabaa laanka gugurubaa n boe n din ni. N din ni màn tumaa a dɛnaa lɛa. Kakabaa ka pàã ta n lon. N din pàã nɛ, màn tumaa n gole koe, pàã ná a lon.

¹³ Kanna kəni wɔa Lawa, wɔ n barka diɛ n nɛ, wɔ nə n tɔ sonbore kɛ boe ka loe ne.

¹⁴ Maa màn kɔn lɛa wa, maa zaman dɔ a màn kɔn lɛa wa. Wɔsɛn man doe wàa-a wɔ kɔ n la? Màn tumaa n boe n din ni. N din màn mɛn kɔ wɔ la, wɔ n wusii wɔ á bɛ lɛ dinsɔɔ̃ koe n la.

¹⁵ Wɔ n tiin lɛa n yɔrɔ-a, wɔ n kiɛ̃ wolen lɛa ka wɔ digolon tumaa bɛ́ lɔn. Wɔa yiikoonaabaa lɛ n ka wúlu bɛ́ lɔn kanaa, foo ná a ba n doɛ a ganaa wa.

¹⁶ Dɛnaa Lawa, wɔa Lawa, wɔ́ gɔn màn gigiã yɔrɔ bɔ wɔ á re n kion doe ne, n din tɔ sonbore kɛ boe ne. Ǹ tumaa n boe n din ni, manə n din wɔ lɛa.

¹⁷ Maa Lawa, máa doɛ̃, máa n tá giɛ̃ wɔ gɔ́ɔ̃ ganaa, màn mɛn bɛ́ pepere bɛ n kɔɔ̃nɛ n ganaa. Man ma bɔ ma din ni má n gɔn mànan kɛn kɔ n la, ka ma foo tumaa nɛ. Ma yii tá a ganaa kanna, ka foo kɔɔ̃n nɛ, n zaman nə́ n sɔkɔn ǹ nə́ zɛnɛɛ ka a din yɔrɔ lɛ nɛ.

¹⁸ Dɛnaa Lawa, wɔ digolo Abrahamu, Izaaki, ka Izirayeli a Lawa, biikoo tumaa li, toa taasiɛn kɛn nə goã n zaman lɛ foo ne, ǹ nə n foo bɔyaa taãnɛ ǹ dia n din la.

¹⁹ Foo mɛn bɛ́ re n guguru koe biikoo yii li, a kɔ n dí-pɛn kɛn lɛ, n daraan kɛn nɛ ka n landa boon kɛn nɛ, a n lɛ si, n bɛ kɔ maa nɛgiĩ Salomɔn la, màn mɛn bɛ́ toɛ a boo la a Lawa a kion kɛ dɔ, ma ǹ mɛn lɛ a mànan yɔrɔ bɔ.»

²⁰ Bɛ kio Davida pɛ zaman lɛ tumaa nɛ: «Ka barka da Dɛnaa Lawa, kaa Lawa nɛ!» Ǹ tumaa barka da Dɛnaa Lawa, ǹ digolon Lawa nɛ. Ǹ tumaa kaa ǹ musin la, ǹ nə́ n kuməə tán Dɛnaa Lawa yɔrɔ-a ka kii ni.

Maǹ Salomɔn koɛ kii lɛa

²¹ Bɛa lɛawaa, Izirayeli minin nə́ wúlu mànan laanka *wúlu màn tiɛ̃ kɔ Dɛnaa Lawa la. Ǹ nə́ dii gɔ̀lɔ̀ duu goon (1 000) kɔ la, sère gɔ̀lɔ̀ duu goon ne, sère ten duu goon ni ka duvɛ̃ kɛ nɛ bɛ̀ ǹ ti wúlu mànan ganaa. Ǹ nə́ wúlu màn gigiã bɔ Izirayeli a zaman wɔ lɛa.

²² Bɛa pinaa kɛ lɛ nɛ, minin man nə́ mànbii, ǹ nə́ màn mi Dɛnaa Lawa yɔrɔ-a ka foo kɔɔ̃n nɛ. Ka a paabaa ǹ wɔ nɛ, ǹ nə́ Davida a nɛgiĩ Salomɔn koa kii lɛa, ǹ nə́ nyɔɔ lɔ a ganaa kiã lɛa Dɛnaa Lawa nɛ. Ǹ nə́ Sadɔki dɔ koa Lawa a wúlu-bɔlen kiã lɛa.

²³ Dɛnaa Lawa a kii dankan ke, Salomɔn nə́ ǹ di Davida a bǎã saa, á giã bɛ la. A sii zɛnaa yii tumaa bǐɛ̃ kɔ, Izirayeli zaman tumaa ná a lɛ si.

²⁴ Sɔraasin goledɛnan nɛ, sɔraasin ni haalɛ kii Davida a nɛ kɔsɔn kɛn dinin nə́ golee Salomɔn a pàã li.

²⁵ Dɛnaa Lawa Salomɔn baa kii gole lɛa Izirayeli din kuturu yɔrɔ-a. Á baa kii yii guguru-a lɛa. Izirayeli kiin mɛnɛn nə goã a nyɛɛnɛ-a yii gugurubaa la bɛn tumaa wɔ nɛ.

Davida a gɛ̀

²⁶ Zesee a nɛgiĩ Davida na á kii baa Izirayeli kuturu mìi la.

²⁷ Á goã Izirayeli zaman a kii lɛa lɛ̀ pusi: Lɛ̀ sɔbaa Ebrɔn, lɛ̀ pɔsɔɔwensɔɔ Zeruzalɛmu.

²⁸ Á lɛ̀ gigiã yɛ á tɔ́n gã foo kɔɔ̃n nɛ, gɔn màn gigiã nɛ, ka yii gugurubaa nɛ. A nɛgiĩ Salomɔn na á giã kiibaa la a bǎã nɛ.

²⁹ Á ke, kii Davida a nya ǹ dín tumaa, a kũ a bibinaa ganaa a wo a giala nyɔmɔɔ yaa, ǹ tá kiɛ̃ nɛ sii yɛ wole Samayeli a sɛ́wɔ nɛ, Lawa a boo gii-dali Natan a sɛ́wɔ nɛ, ka sii yɛ wole Gaadi a sɛ́wɔ nɛ.

³⁰ Siin mɛnɛn nə n zɛnaa bɛ̀ Davida bɛ́ kiibaa la, bɛa sɛ́wɔn kɛn man bɛn laakalɛɛ. A foo tãbaa ǹ siin ni, a nɔmaan mɛnɛn yɛ, sii mɛn Izirayeli yɛ kɔnlɛ ka gána kɔsɔn kɛn dɔn nɛ.