KZS1 28 - LAWA A BOO SONBORE 2011

Salomɔn nə Davida bǎã siɛ

¹ Kii Davida Izirayeli a goledɛnan tumaa sɔkɔn, tɔrɔn kiãn nɛ, sɔraasin kurun goledɛnan mɛnɛn bɛ́ dí nyɛɛ kii ni, sɔraasi duu goon nyɛɛnaandɛnan ka a paabiɛ wɔn nɛ. Min mɛnɛn bɛ́ kii gɔn mànan mìi la, á bɛn dɔn sɔkɔn, a tɔɔn mìilandɛnan nɛ, nɛnyaan-doroolin ni, kii a sumu dí-nyalin mìilandɛnan nɛ, zia-baali foo kaka-a n nɛ, ka min yii guguru-an nɛ.

² Kii Davida yoo lon á pɛ ǹ nɛ: – Maa zaman a minin lɛn, ma dɔɔ̃nɔn lɛn, ka n too kɔ ma lon! A na á goã ma yiri ni, máa ma susu ǹ kion dɔ ma Dɛnaa Lawa a *lɛ kɔ kɔn la ǹ goo lɛ da a nɛ, wɔa Lawa bɛ́ n gòã diɛ bǎã mɛn nɛ. Má bɛa kion dɔ lɛ yɔrɔ bɔ.

³ Sɛnɛ Lawa pɛ ma nɛ: «Nsɛ ba re kion doe n ma tɔ bɔ-n wa. A giala giĩ zia-baali nə n ni, ń mà gigiã kaa tán.»

⁴ Sɛnɛ, ma din lɛ nɛ, Dɛnaa Lawa, Izirayeli a Lawa ma bɔ ma di a kion minin tumaa bii. A na á gole li mà masɛ kii baa Izirayeli gána kuturu mìi la yǎa duduu. Lɛlɛ, á Zudaa bɔ kiã lɛa, bɛ kio, Zudaa tɔrɔn bii á maa díi a kion bɔ, ma di nɛn bii, a na á lɛ kɔ á ma din bɔ kii lɛa á ma koa Izirayeli kuturu mìi la.

⁵ Dɛnaa Lawa nɛ gigiã mɛn kɔ ma la, a na á Salomɔn bɔ ǹ bii á koa kii dankan la a din wɔ lɛa Izirayeli mìi la.

⁶ Dɛnaa Lawa pɛ ma-n kɛnɛn: «N nɛgiĩ Salomɔn nə die maa kion doe ka a sumun ni. A giala a din ni má bɔ. Á re n biɛ maa nɛ lɛa, ma á re a díi biɛ.

⁷ Bɛ̀ á ma lɛ si ka bɔlɔgoondɛnaabaa nɛ, á kɔ maa dí-pɛn kɛn lɛ ka maa landa boon kɛn nɛ ka pelo ǹ bɛ́ lɔn, ma din pàã nɛ, a kiibaa kɛ n die goɛ̃ yǎa duduu.»

⁸ Kanna kəni ma dɔɔ̃nɔn lɛn, Dɛnaa Lawa a zaman Izirayeli din kuturu yɔrɔ-a, wɔa Lawa din yɔrɔ-a, asɛ mɛn bɛ́ wɔ bɔlɔ miɛ, ka lɛ kɔ mà ka á re koe Dɛnaa Lawa, wɔa Lawa a dí-pɛn kɛn lɛ, ka ǹ lɛsi. Bɛ̀ á n baa miɛ̃, gána kɔɔ̃n ke ka tá a nɛ, á re goɛ̃ kaa wɔ lɛa, ka á re toɛ walan kíɛ̃ lɛa kaa kion minin gɔn yǎa duduu.

⁹ Nsɛ dɔ, maa nɛgiĩ Salomɔn, toa n nə daraa n díi a Lawa doɛ̃ ganaa. Dí nya nɛ n foo ná a talɛɛ-n ma, n yiri n bǎã goon ne. A giala, Dɛnaa n giɛ wɔ gɔ́ɔ̃ ganaa, á minbuiinin taasiɛ din tumaa doɛ̃. Bɛ̀ n ga li á re toɛ n yɛ. Sɛnɛ bɛ̀ n tii, á re n zuĩ bii-a yǎa duduu.

¹⁰ Kanna kəni, n yii tá a ganaa, Dɛnaa Lawa na á n din bɔ mà n kion dɔ, ǹ mɛn lɛ á ke die a din a "bǎã sonbore" biɛ. Toa n foo tã kɔ, n dí lɛ kũ.

Davida n Lawa a kion lɛ nyín koe Salomɔn la

¹¹ Davida dàã nyín lɛ kɔ a nɛgiĩ Salomɔn la kɔnlɛ ka kion nɛn mɛnɛn bɛ́ re n tii a ganaa, mànan koa ǹ bǎãn nɛ, kion nɛn mɛnɛn bɛ́ lon ka ǹ mɛnɛn bɛ́ gɔ́ɔ̃ li, ka goo sonbore kɛa koa ǹ kion ne.

¹² A màn mɛn yii koa a yɔrɔ-a mà á re doe: Dɛnaa Lawa a kion lɛa sumu ni, kion nɛn mɛnɛn bɛ́ sumu lɛ lɛnpɛnɛ, Dɛnaa Lawa a kion gɔ́ɔ̃gɔ́ɔ̃ ǹ mànan koa ǹ bǎã lɛa ka Lawa a kion gɔn màn sonboren kɛn nɛ, á bɛn dɔn nyín kɔ la.

¹³ Á Lawa a wúlu-bɔlen kɛn laanka *Levii tɔrɔn kɛn kurun sɛ́wɔn kɔ la, dí mɛn tumaa á ke n nyɛɛ Dɛnaa Lawa kion lɛ nɛ, bɛn wɔ nɛ. Ǹ doamaa bɛ́ nɛ ǹ dí nya ka mànan mɛnɛn nɛ Dɛnaa Lawa a kion lɛ nɛ, á bɛn dɔn sɛ́wɔ kɔ la.

¹⁴ Sana mɛn bɛ́ dí nya ǹ màn lɛ a gogoonmaa zɛnɛɛ, á bɛa kilo lɛ pɛ nɛ, ǹ mɛnɛn dɔn bɛ wɔrɔ mànan lɛa, á bɛ́ dɔ a gugurubaa kilo lɛ pɛ nɛ, ka ǹ kɔnbɔ ka dí mɛn nɛ.

¹⁵ Bólon da ǹ bǎã nɛ sana lɛa, ka ǹ sana bólonən kɛn nɛ, bólon da ǹ bǎã mɛnɛn bɛ́ wɔrɔ lɛa ka ǹ wɔrɔ bólonən ne, á bɛn dɔn gugurubaa a kilo pɛ nɛ ka ǹ kɔnbɔ ka dí mɛn nɛ.

¹⁶ Lawa gɔ ǹ buuru bɛ́ n kiɛ tabalan mɛnɛn la sana lɛa ka wɔrɔ nɛ, á bɛn dɔn gugurubaa a kilo nyaa nɛ,

¹⁷ ka siĩ fɔ̃ ǹ kiɛnən kɛn dɔn wɔ nɛ. Á tɔ́n a gɔn nyɔmɔɔ mà si ǹ mànan kɛn gugurubaa ganaa, ka mu mi ǹ kaaran kɛn nɛ sana taãn-taãn lɛa, ka tasan kɛn nɛ sana lɛa ka wɔrɔ nɛ,

¹⁸ ka màn gìĩ kɔɔ̃n *wúlu bɔ ǹ bǎã kɛ wɔ nɛ sana yoreen lɛa. Davida tɔ́n ziabaa ǹ wotoro sonbore kɛ a kɔnboe kɔ Salomɔn la ka lon màn yiikoonaan nyínin ni sana lɛa ǹ nə́ Dɛnaa Lawa a *lɛ kɔ kɔn la ǹ goo lɛ tamiɛ̃, ǹ nyàan nə́ nyoã nɛ.

¹⁹ Davida tɔ́n pɛ: «Bɛ tumaa tá yii sɛ́wɔ kɛ nɛ Dɛnaa Lawa kiɛ̃. Bɛa sɛ́wɔ kiɛ̃ lɛ toa má nyín lɛ dɔ̃, a bɛ́ re n zɛnɛɛ lɔn ka a paǹ bisin tumaa ni.»

²⁰ Bɛ kio, á wusoo á pɛ Salomɔn nɛ doo: «Maa nɛgiĩ, toa n goã kaka n foo n tã. Yoo n dí lɛ kũ nyɛ́ɛ ná a ba n ganaa wa, n foo nyan ziziɛ̃ wa. Dɛnaa Lawa, maa Lawa á re goɛ̃ kunun n ni, a re n toɛ walan wa, a re n tii wa, yǎa Lawa a kion a dí ke, ń ná a lɛ kũ Dɛnaa Lawa wɔ lɛa, yǎa bɛ nyɛɛ.

²¹ Lawa a wúlu-bɔlen kuru laanka Levii tɔrɔn mɛnɛn bɛ́ Dɛnaa a kion kɛa dí nyɛɛ, bɛn dɔn tá kunun n ni. A din yii goon ne, giĩn tá re yii ǹ lɛ kɔ ǹ dinin li, ǹ nə́ boe dí tɔrɔ tumaa la parsiini, kiã bii, zaman bii. Ń bɛ́ re boo mɛn yii diɛ ǹ nɛ, ǹ tá re a tumaa zɛnɛɛ.»