KZS1 26 - LAWA A BOO SONBORE 2011

Kiɛnlɛ-lɛduə̃lin kuru

¹ Kiɛnlɛ-lɛduə̃lin dɔn man taliɛ nɛ kuru dan yii li, Koree a tanlɛ kuru wɔ, Abiazafu a nɔ̀ɔn Miselemiya nɛ.

² Miselemiya na á nɛ sɔbaa yɛ. Ǹ bɛ́ koɛ kɔn la lɔn á ke: Zakarii, Yediayeli, Zebadia, Zatniyeli

³ Elamu, Zoanan ka Elionayii ni.

⁴ Obɛdi-Edɔmu na á nɛ kiwisi yɛ. Ǹ koa kɔn la lɔn á ke: Semayia nɛ, Zozabaadi ni, Zoa nɛ, Sakaara nɛ, Netaneyeli ni,

⁵ Amiyeli ni, Isakaara nɛ ka Pewultayii ni. Taãn nɛ, Lawa barka da Obɛdi-Edɔmu ganaa.

⁶ A nɛgiĩ goledɛnaa Semayia nɛn mɛnɛn yɛ, ǹ tumaa na á goã goledɛnan lɛa ǹ sɔmɔ lɛn nɛ, a giala ǹ yii n guguru.

⁷ Semayia a nɛn: Ɔtnii, Refayeli, Obɛdi ka Elzabaadi ni, ka ǹ dɔɔ̃n Eliwu laanka Semakia nɛ, ǹ dinin paanan nə min yii guguru-an lɛa.

⁸ Obɛdi-Edɔmu tɔrɔn lɛn laanka ǹ nɛnyaanan ka ǹ dɔɔ̃n kɔsɔn tumaa goã min yii guguru-a lɛa, ǹ foo dɔ n tã ǹ dí lɛ la. Ǹ kaa kun nə min pɔsɔrɔwenpaa.

⁹ Miselemiya laanka a nɛnyaanan ka ǹ dɔɔ̃nɔn man min yii guguru-a fulukiwisi.

¹⁰ Merarii a tanlɛ. Oza nɛ: A nɛ n sii. Simuri n kiã lɛa, ǹ di na á bɛa bǎã kɛ kɔ la, a laanɛ a ba nɛgiĩ gole lɛa wa,

¹¹ Hilkia na a paabaa ǹ wɔ lɛa, Tebalia na a sɔɔbaa ǹ wɔ lɛa, Zakarii na a Siibaa ǹ wɔ lɛa. Oza a nɛn lɛn laanka ǹ dɔɔ̃nɔn kaa kũn na á goã min fulusɔɔ.

¹² Kiɛnlɛ-lɛduə̃lin kuru minin laanka ǹ kiãn ka ǹ dɔɔ̃nɔn man dí nyɛɛ Dɛnaa Lawa a kion.

¹³ Min golen laanka nɛ tenən nə́ n pã kiɛnlɛn lɛn lɛduə̃ ganaa, sɔmɔ lɛ yii li.

¹⁴ Lɛ̀giala kiɛnlɛ ke, piɛ̃ na á Selemia kũ bɛa paǹ li. Gɔsɛ a lɛ̀gɔn la kiɛnlɛ ke piɛ̃ ná a nɛ Zakarii kũ bɛa paǹ li, ke da yiri-a wole sonbore lɛa.

¹⁵ Gusin a lɛ̀gɔn la a kiɛnlɛ kɛ Obɛdi-Edɔmu n bɛ lɛduĩ, a nɛnyaanan man mànan koa ǹ bǎãn lɛduĩ.

¹⁶ Supimu laanka Hosaa n lɛ̀nyɛɛnɛ a kiɛnlɛ kɛ lɛduĩ ka "Salekɛti a kiɛnlɛ" kɛ nɛ, zii dii wole kɛ yɔrɔ-a. Kiɛnlɛ lɛduə̃lin lɛn man nə n gii ka yɔrɔ kɛ nɛ:

¹⁷ Lɛ̀giala la a kiɛnlɛ, Levii tɔrɔ min sɔrɔ, lɛawaa tumaa li. Gɔsɛ a lɛ̀gɔn la kiɛnlɛ: Levii tɔrɔ min sii lɛawaa tumaa li. Gusin a lɛ̀gɔn la kiɛnlɛ: Levii tɔrɔ min sii lɛawaa tumaa li. Mànan koa ǹ kion: kuru paa, kuru gogoonmaa min paa.

¹⁸ Kion mɛn bɛ́ n tii a ganaa lɛ̀nyɛɛn gɔn la, min sii n bɛa zii lɛduĩ, min paa dɔ na a gɔ́ɔ̃ nɛ a kiɛnlɛn lɛduĩ.

¹⁹ Kiɛnlɛ-lɛduə̃lin lɛn kurun man ka kɛn nɛ. Maǹ Koree laanka Merarii tɔrɔn lɛa.

Dí mɛn tɔrɔ kɔsɔn nə n kɔ Levii tɔrɔn la

²⁰ Ayia ke, *Levii tɔrɔn goon lɛa, bɛ na á goã Dɛnaa Lawa a kion gɔ́ɔ̃gɔ́ɔ̃ ǹ mànan mìi la ka Lawa a kion gɔn màn sonboren kɛn nɛ.

²¹ Ladan tɔrɔn kɛn, Gɛrsɔn a tanlɛ nɛ, ǹ nə́ ǹ dinin kɛdɛnan lɛa, bɛ n ka Yeyieli ni,

²² a nɛnyaanan nɛ, Zetan laanka ǹ dɔɔ̃n Zowɛli ni. Maǹ Dɛnaa Lawa a kion gɔ́ɔ̃gɔ́ɔ̃ ǹ mànan mìi la.

²³ Amuramu a tanlɛ wɔ paǹ li, Isaara wɔ nɛ, Ebrɔn wɔ nɛ ka Uziili wɔ nɛ,

²⁴ Gɛrsɔn a nɛ Sebuweli ke Muizu a nɔ̀ɔn lɛa, bɛ n Dɛnaa Lawa a kion gɔn mànan mìi la.

²⁵ Gɛrsɔn ǹ dɔɔ̃nɔn kɛn Eliezɛɛrɛ tɔrɔn lɛa bɛn tá a sumu-n. Eliezɛɛrɛ a nɛ Rehabia nɛ, a nɛ Yekaya nɛ, a nɛ Yoraamu nɛ, a nɛ Zikiri ni ka a nɛ Selomiti ni.

²⁶ Kii Davida din gɔn mànan mɛnɛn kɔ Lawa la màn sonboren lɛa, kɛdɛnan nɛ, sɔraasi duu goon goledɛnan nɛ, sɔraasi paabiɛ a goledɛnan nɛ, ka sɔraasin goledɛnaa kɔsɔn dɔn nɛ, Selomiti laanka ǹ dɔɔ̃nɔn man bɛa mànan lɛn mìi la.

²⁷ Bɛa minin kɛn lɛn nə gɔn mànan mɛnɛn si zia la, maǹ nə́ daa Lawa gɔ ka bɛ lɛ paǹ goo ni, maǹ Dɛnaa Lawa a kion gɔ̀nɔn kũ ni.

²⁸ Sii-nyaali Samayeli mànan mɛnɛn kɔ Lawa wɔ lɛa, Kiisi a nɛ Sayulu ni, Nɛɛrɛ a nɛ Abnɛɛrɛ nɛ Seruyia a nɛ Zoabu ni, ka ǹ dɔɔ̃nɔn kɔsɔn nɛ, Selomiti laanka ǹ dɔɔ̃nɔn man bɛa mànan lɛn mìi la.

²⁹ Isaara a tanlɛ nɛ, Kenania laanka a nɛnyaanan man nə́ goã zaman a sii yɔrɔ boe. Maǹ sɛ́wɔ kiɛnlin laanka kiri kurulin lɛa.

³⁰ Ebrɔn a tanlɛ a paǹ li, Akabia laanka ǹ dɔɔ̃n yii guguru duu goonbiɛsɔbaa (1 700) n giɛ Izirayeli a gána kɛ walan dia-n woe Zurdɛ̃ tà a lɛ̀nyɛɛn gɔn la. Siin mɛnɛn bɛ́ Dɛnaa Lawa a paǹ li ka ǹ mɛnɛn bɛ́ kii a paǹ li ǹ dinin man bɛn mìi la.

³¹ Yeria n Ebrɔn a tanlɛ a kiã lɛ a a sumu lɛ yii li. Davida a kiibaa lɛ̀ pusibaa ǹ wɔ li, ǹ bɛ́ bɛa tanlɛ kɛ lɛ a sumu minin basa gɔsiɛ, ǹ nə́ woo min yii guguru-an yaa Yazɛɛrɛ, Galaati gána nɛ.

³² Kii Davida tɔ́n min duu paabiɛsɔbaa (2 700) bɔ kunu Yeria a tanlɛ ganaa, ǹ tumaa n min yii guguru-an lɛa, kɛdɛnan lɛa. Siin mɛnɛn bɛ́ Dɛnaa Lawa a paǹ li ka ǹ mɛnɛn bɛ́ kii a paǹ li ǹ doamaa nɛ ǹ ga bɛn walan, Urubɛn tɔrɔn kɛn bɛ́ giã-n gána mɛn nɛ, Gadi tɔrɔn nɛ ka Manaasee tɔrɔn talɛɛ kɛ nɛ.