Korɛnti2 9 - LAWA A BOO SONBORE 2011

Dɔ dɔɔ̃nɔn lɛ kɔsɔ boo

¹ Lawa a zaman mɛn bɛ́ Zudee gána nɛ, là ba a ganaa, ma boo da kasɛn nɛ bɛn dɔmalɛ wɔ paǹ li wa.

² Taasiɛ sonboren mɛnɛn bɛ́ ka gɔ́ɔ̃ nɛ, man ma din laakalɛɛ ka bɛn nɛ Masedoanɛ minin li kaa lɛa. Má pɛ máa a saa diɛ̃n ganaa, wɔ dɔɔ̃nɔn mɛnɛn bɛ́ Grɛki gána nɛ, máa bɛn nə́ lɛ kɔ ka dɔmalɛ lɛ nɛ. Kaa din kɔ sii ganaa miɛ̃ kɛ lɛ Lawa a sɔmɔn lɛn gigiã gù kaa.

³ Man wɔ dɔɔ̃nɔn kɛn diɛ ka la, màn mɛn bɛ́ toɛ, ma bɛ́ ma din kalaa mɛn we kaa lɛa, dɔmalɛ kɛ wɔ paǹ li, bɛ nyan kooro baa wa. Sɛnɛ, ka n yɔrɔ bɔ taãnɛ ka ma bɛ́ má pɛ lɔn.

⁴ Bɛ̀ a n baa miɛ̃ wa, bɛ̀ Masedoanɛ minin nə́ daa kun ka ma nɛ, ǹ nə́ daa yaa bɛ̀ ka n yɔrɔ bɔ wa, maa waa ka la miɛ̃ kɛ á re sìi diɛ ma ganaa parsiini, a ka dɔn dinin pusii wa!

⁵ Má ga a ganaa, máa a n siĩni, ma wɔ dɔɔ̃nɔn kɛn nyankɔ, ma ǹ dia ma nyɛɛnɛ, ka lɛ kɔ ka bǐɛ̃baa ǹ sii mɛn nɛ, ǹ da bɛ yɔrɔ bɔ. Bɛ̀ á n baa miɛ̃, ma á re die yiɛ bɛ̀ ká n yɔrɔ bɔ ká nya, bɛ tɔn nyaa, mà ka ǹ ká kɔ ka foo kɔɔ̃n nɛ, pàã ná a yɛ a-n wa.

⁶ Ka n yiri koa kɛ li: bɛ̀ min màn tɔrɔ boɛɛn da, a n màn boɛɛn kuri. Bɛ̀ min màn tɔrɔ gigiã da, a n màn gigiã kuri.

⁷ Didie tumaa lɛ kɔ lɔn, a màn kɔ a kɔnpɛ bɛ nɛ. A kɔ bɔ a din ni, a nyan pàã baa wa. A giala, bɛ̀ min màn kɔ ka foo kɔɔ̃n nɛ, Lawa n bɛa dɛnaa narɛ.

⁸ Pàã tá Lawa lon, á boe la a toa ka bǐɛ̃ tɔrɔ gigiã yɛ, ń giɛ ka á boe la ka n laadoo màn tumaa yɛ, ka a laman yɛ, ka bǐɛ̃baa ǹ dí sonbore tumaa nya nɛ.

⁹ Ka Lawa a sɛ́wɔ bɛ́ á pɛ lɔn: «A nə n gɔn lɛ buĩ á doobaan goe ka màn nɛ. A sii pepere zɛnaa n goɛ̃ yǎa duduu.»

¹⁰ Lawa mɛn bɛ́ màn tɔrɔ koe màn-dali la, ka màn-bii ni mà a n din too ne, á re màn tɔrɔ tumaa koe ka la, ka dinin laadoo yii li, a na a bulu bɔ, ń giɛ kaa bǐɛ̃baa ǹ foo kɛ á sii gigiã zɛnɛɛ.

¹¹ Á re ka biɛ pàãman lɛa a dɔ kɔn, ka boo la, ka n dinin nyaa bǐɛ̃baa ǹ foodɛnan lɛa biikoo tumaa li. Masɛ bɛ́ re woe kaa bǐɛ̃baa ǹ mànan mɛnɛn koɛ, bɛ á re toɛ min gigiã barka da Lawa nɛ.

¹² A giala, bɛa dí kɛ lɛ ka á nyɛɛ, a bie Lawa a zaman dinsɔɔ̃ laadoo bǐɛ̃ koe wa, sɛnɛ, a n toɛ doo, barka gigiã nə n da Lawa nɛ.

¹³ Ka bɛ́ n doe min mɛnɛn lɛ, ǹ gigiã á re Lawa tɔ gole koe. Ka bɛ́ dí nyɛɛ ka bɔlɔgoondɛnaabaa-n ka yɔrɔ mɛn nɛ, *Krita a Boo Tii Kɔɔ̃n kɛ gɔ́ɔ̃ nɛ, bɛ á re toɛ, ǹ barka da Lawa nɛ. Ka bɛ́ ka gɔn mànan gii kɔn-a ǹ nɛ, a n doe min kɔsɔn dɔn ganaa, ǹ tá re barka diɛ Lawa-n bɛ dɔ a lɛa.

¹⁴ Ǹ tá re Lawa nyankoe ka a lɛa, ǹ nə ǹ kɔn-narɛɛ nyaa ka nɛ. A giala, Lawa bǐɛ̃ gole gole baa ka nɛ.

¹⁵ Lawa a bǐɛ̃baa ǹ màn kɛ miã banban, wɔ á barka diɛ nɛ bɛ taman yii.