Korɛnti1 9 - LAWA A BOO SONBORE 2011

Pooli a piã ka a dia dí-a wolebaa ǹ mànan nɛ boo

¹ Masɛ a ma din gɔn wìi a lɛa wa? Ma a dia dí-a wole lɛa wa? Ma Dɛnaa Yezu yɛ ka ma yii-n wa? Ma din a nya ǹ dí a lɛa bie ka á Dɛnaa wɔn lɛa wa?

² Ta ma a dia dí-a wole lɛa min kɔsɔn yii li wa, ma tá a lɛa kasɛn kɔ́n yii li; a giala, kaa tá kun ka Dɛnaa-n lɛ, a n masɛ a dia dí-a wolebaa nyɛɛ.

³ Ma bɛ́ yɔ boe ma tɔ-pɛlen ganaa, ka yɔrɔ mɛn nɛ, bɛ á ke:

⁴ Masɛ a kɔnboe, ǹ màn-bii kɔ ma la ka mi ǹ màn nɛ, maa dí-nyɛɛ a lɛa wa?

⁵ Dia dí-a wole gialakunun kɛn bɛ́ zɛnɛɛ lɔn, ka Dɛnaa din dɔɔ̃nɔn kɛn laanka Piɛrɛ nɛ, masɛ dɔ a kɔnboe ma lɔ Lawa-nyankɔle wɔ, a n kun ma-n miɛ̃ wa?

⁶ Hinlaa, masɛ laanka Barnabaasi dinsɔɔ̃ doamaa nɛ wɔ dí nya, wɔ tɔn màn-bii yɛ wɔ bii?

⁷ Die n kun ka sɔraasin ni zia-baali lɛa, a ná a din dɔ a màn-bii boe? Die n dù gɔrɔ dí nyɛɛ, a ná a ba a da nɛ bii wa? Hinlaa, die n tɔɔn lɛduĩ, a ná a ba tɔɔn lɛn nyɔ mii wa?

⁸ Ka nyan taasɛ, mà man bɛa boon kɛn diɛ, á kɔnpii minbuiinin lɛ-mui sii zɛnaa dinsɔɔ̃-n wa. Haayii! Lawa Landa boon mɛnɛn kɔ Muizu la, bɛn sɛ́wɔ dɔ á pii miɛ̃.

⁹ Taãn nɛ, a n kiɛ̃-n Landa sɛ́wɔ nɛ mà tɔɔ mɛn bɛ́ wii goɛ, n nyan bɛ kurəə wii lɛ a soɛ̃ ganaa wa. Lawa nə n gɔ́ɔ̃ bii ka tɔɔn nɛ?

¹⁰ Wɔ dinin lɛa bie Muizu kɛ pɛ miɛ̃ wa? Taãn nɛ, bɛa boo kɛ na á n kiɛ̃ wɔ dinin lɛa. A giala, a n kɔnboe min mɛn bɛ́ buu kɔsɛ, ka min mɛn bɛ́ wii duwii, ǹ nə ǹ dí nya, ǹ yiri ná a ganaa, mà ǹsɛn tá re ǹ wɔ gii yii.

¹¹ Wɔsɛn nə màn tɔrɔ mɛn da ka nɛ, Lawa a boo ne. Bɛ̀ wɔ dɔn tá kaa kanaa gɔn mànan kɛn yii, bɛ na á la yii ni?

¹² Bɛ̀ min kɔsɔn tá bɛ miã yii ka li, wɔsɛn ba kɔnboe ne, a la bɛn wɔ-n ma? Sɛnɛ, wɔsɛn nə bɛa màn kɛ lɛ kɔ́n yɛ ka li wa. Wɔ n wɔ́ sii tumaa si wɔ ganaa dinin, ń giɛ wɔ bɛ́ Boo Tii Kɔɔ̃n zii mɛn nyɛɛ ka nɛ, á n *Krita wɔ lɛa, màn kɔ́n nyan ka kurəə bɛ ganaa wa.

¹³ Ka dinin tá doɛ̃, mà min mɛnɛn bɛ́ dí nyɛɛ Lawa a kion, ǹ màn-bii n boe Lawa a kion. Min mɛnɛn dɔn bɛ́ wúlu boe Lawa a *wúlu bɔ ǹ bǎã nɛ, ǹ gii n boe bɛa wúlu bɔ ǹ mànan kɛn lɛn nɛ.

¹⁴ A din yii goon ne, min mɛnɛn bɛ́ Boo Tii Kɔɔ̃n kɛ laakalɛɛ, Dɛnaa pɛ mà ǹ dɔn màn-bii die a bɔ bɛa dí lɛ nɛ.

¹⁵ Sɛnɛ, masɛ tɔn bɛ miã màn kɛ kɔ́n yɛ ka li wa, ma bie sɛ́wɔ kɛ diɛ ka la, ma á nɔ̀n dɔ diɛ li wa. Bɛ̀ má gã gɔrɔ bɛ á soɛ! Min kɔ́n ba re boe la, a bɛa din-koa ǹ gɔn kɛ si ma la wa.

¹⁶ A giala, Boo Tii Kɔɔ̃n kɛ a laakalaa bie din-koa ǹ sii lɛa masɛ gɔn wa. A n pàã lɛa ma ganaa. Bɛ̀ ma a Boo Tii Kɔɔ̃n kɛ laakalɛɛ wa, koe na á bɔ ma ganaa.

¹⁷ Bɛ̀ ma din nə má bɔ maa nya ǹ dí lɛa, bɛ̀ ma tá n yii diɛ saraa la. Sɛnɛ, a na á n kɔ ma la, Lawa na á da ma mìi-n dí lɛa, mà ma nya.

¹⁸ Maa saraa n ka wàa-n kəni? Ma bɛ́ boe la, ma á Boo Tii Kɔɔ̃n kɛ laakalɛɛ ka-n kooro, maa saraa lɛ n bɛ nɛ. Ma gii bɛ́ ka màn mɛn nɛ, Boo Tii Kɔɔ̃n laakalaa kɛ a lɛa, ma nɔ̀n da bɛ li wa.

Pooli a min tumaa wɔ baa ǹ gɔn

¹⁹ Hiĩ, man ma din gɔn wìi a lɛa, ma a min kɔn a bɛ̀rɛ lɛa wa. Sɛnɛ, má n din baa min tumaa a bɛ̀rɛ lɛa, màn mɛn bɛ́ toɛ, ma min gigiã yɛ.

²⁰ Má goã kun ka Zuifun ni ka Zuifu bɛ́ lɔn, màn mɛn bɛ́ toɛ, ma gɔn dɔ ǹ ganaa. A laan ma goã Muizu a Landa pàã giulun wa, ma dí nya kunun ǹ ni, ka ma na a pàã giulun, màn mɛn bɛ́ toɛ ma gɔn dɔ tá Landa pàã giulun wolen ganaa.

²¹ Min mɛnɛn bɛ́ Muizu a Landa goã ǹ li wa, má goã kun ka bɛn dɔn nɛ, ka ma dɔ n ma a Muizu a Landa lɛ doɛ̃ wa, màn mɛn bɛ́ toɛ, ma gɔn dɔ ǹ ganaa. A da yaa, ma bie Lawa a landa-zɛnaali baãnaa lɛa wa; a giala, maa landa n ka Krita nɛ.

²² Má goleemali boɛɛndɛnan sii si ma ganaa kunun ǹ ni, màn mɛn bɛ́ toɛ, ma gɔn dɔ ǹ ganaa. Man má zɛnaa miɛ̃ min tumaa nɛ, má lɛ kɔ sii din tɔrɔ tumaa ganaa, màn mɛn bɛ́ toɛ ma min tɛnɛn kirisibaa sonbore.

²³ Man bɛ tumaa zɛnɛɛ Boo Tii Kɔɔ̃n kɛ a lɛa, máa ma gii boo la a yɛ a sii bǐɛ̃n gɔ́ɔ̃ nɛ.

²⁴ Ka á doɛ̃ mà baa-silin man baa sii kun, sɛnɛ, min goon toto na a saraa yii. A bɛ́ miɛ, ka dɔn nə baa si, ń giɛ ka á saraa lɛ yii.

²⁵ Bɛ̀ baa-silin tá daraa ǹ bǎã nɛ, maǹ kɔn lɛ si ǹ sii kakan diɛ ǹ dinin mìi ni, saraa ǹ màn mɛn bɛ́ a beleboe wa, ǹ tá giɛ bɛ li. Sɛnɛ, saraa ǹ màn mɛn bɛ́ re goɛ̃ a ná a ziziɛ̃ wa, wɔsɛn man zɛnɛɛ wɔ á giɛ bɛ li.

²⁶ Bɛ lɛ-n masɛ á baa sii, ma yii n doa-n golee ǹ bǎã la. Man ka gɔn-munii wɔle mɛn bɛ́, a min dii a mìi gialaa wa.

²⁷ Man ma din gɔ̀nɔn kuĩ doɛ̃, ma ná a lɛduĩ kaka, ń giɛ, ma din nyan goã kooro, maa minin daraa kɛ kio wa.