Korɛnti1 3 - LAWA A BOO SONBORE 2011

Lɛ kaa kun dí-nyalin boo

¹ Ma dɔɔ̃nɔn lɛn, ma boo la má boo da ka nɛ ka Yiri Fu bɛ́ min mɛnɛn nɛ wa. Sɛnɛ, a n ka man má boo da ka gɔ̀nɔn foo sii zɛnaa wolen ne, ǹ nə́ ka nɛnyaan bɔnboɛɛnɛn bɛ́ lɔn *Krita a sii gɔ́ɔ̃ nɛ.

² A n goon ka man má bɔ̀nyaa kɔ ka la ká mi, ka ma bie má màn-bii kəkə kɔ ka la wa. A giala, mà ka a boe la, ka tá a kuubaa sii ka ganaa wa. Haalɛ tɔn pelo, ka a boe la ka tá a kuubaa sii ka ganaa wa.

³ Bɛ n nyɛɛ mà ka n tɔn sii zɛnɛɛ, ka ga kanaa foo sii li wolen wɔ bɛ́ lɔn. Màn mɛn toa foo wuu-pɛn laanka zian tá tɔn ka bii, bɛ n nyɛɛ mà ka n ga kanaa foo sii li wolen lɛa, ka n tɔn sii zɛnɛɛ ka minbuiinbaa ǹ sii bɛ́ lɔn.

⁴ Bɛ̀ kaa min tɛnɛn tá tɔn pii: «Masɛ n Pooli wɔ lɛa,» kɛ dɔ mà asɛ n Apolɔɔsi wɔ lɛa, a bie goon ka ka n tɔn sii zɛnɛɛ, ka min gialakunun kɛn wɔ bɛ́ lɔn wa?

⁵ Kasɛn gɔ́ɔ̃ nɛ, mà Apolɔɔsi n wàa lɛa? Pooli dɔ n wàa lɛa? Wɔ ǹ dí-nyali kooron lɛa, wɔ́ ka kaa goleemali ni. Dɛnaa màn mɛn kɔ wɔ gogoonmaa la, didie na á bɛ lɛ nyaa ka nɛ.

⁶ Masɛ n má màn zumu, Apolɔɔsi na á mu kaa a ganaa, sɛnɛ, Lawa din na a gole koe.

⁷ A n miɛ̃, da-zumuli a màn kɔ́n lɛa wa, a mu-kaali a màn kɔ́n lɛa wa. Lawa dinsɔɔ̃ n màn lɛa. A din nə da lɛ gole koe.

⁸ Min mɛn bɛ́ zumi ka min mɛn bɛ́ mu kiɛ a ganaa, maǹ goon. Lawa din nə die ǹ didie a saraa koe la, a nya ǹ dí yii li.

⁹ Wɔsɛn man kun Lawa a dí-nyalin lɛa, kasɛn man Lawa a wuru lɛa, á n kɔsɛ. Lawa bɛ́ kion mɛn dɔ doe, ka ǹ bɛ lɛa.

Di nya a là bɛ́ yii Lawa li lɔn

¹⁰ Lawa bǐɛ̃ mɛn baa masɛ la, man má kion lɛ gòã daa ka kion-dɔle taãn wɔ bɛ́ lɔn; kanna, min kɔsɔ dɔ n màn doe a lalan. Sɛnɛ, a n kɔnboe didie nə n yiri koa a wɔ a dɔ ǹ gɔn li.

¹¹ A giala, a gòã na á n daa ka Yezu Krita nɛ; min kɔ́n ba boe la, a na a gòã daa ka màn kɔsɔ-n wa.

¹² Ta min mɛn màn dɔ bɛa gòã-daa kɛ lɛ la, ka sana nɛ, ka wɔrɔgiala nɛ, ka gɛ̀fu sonbore ne, ta gɔn nɛ, ta buu ni, ta làpaa nɛ, ǹ tumaa á re yii foaãnɛ.

¹³ Didie tumaa a nya ǹ dí a là á re yii kiri-kurii pinaa. Taãn nɛ, bɛa pinaa kɛ nɛ, maǹ die giɛ màn tumaa ganaa ka tɛ nɛ. Bɛa tɛ lɛ n die didie tumaa a nya ǹ dí a là nyɛɛ nɛ.

¹⁴ Bɛ̀ min mɛn màn dɔ kion gòã-daa kɛ la, tɛ ná a boe la á kuĩ wa, bɛa dɛnaa á re saraa yii.

¹⁵ Bɛ̀ tɛ lɛ min mɛn a nya ǹ dí kũ, bɛa dɛnaa a saraa á re papaɛ̃; a dinmaa sɛ kɔn tá re kirisibiɛ, sɛnɛ, a n goɛ̃ ka min mɛn bɛ́ á soo tɛ nɛ, á baa si á la lɔn.

¹⁶ Táa ka dinin tá doɛ̃ mà ka ǹ Lawa a Kion lɛa, Lawa a Yiri Fu n ka gɔ́ɔ̃ nɛ.

¹⁷ Ka dɔ̃ mà bɛ̀ min mɛn Lawa a Kion ziziɛ̃, Lawa á re ǹ dɛnaa dɔ ziziɛ̃. A giala, Lawa a Kion nə màn sonbore lɛa. Ka dinin lɛn dɔn man Lawa a Kion lɛ lɛa.

Màn tumaa a wɔa wɔ baa laanka wɔa Krita wɔ baa boo

¹⁸ Ka nyan ka dinin yiri sã wa. Bɛ̀ min tá ka bii á n taasɛ, ka kanaa minin kɛn wɔ bɛ́ lɔn, mà asɛ n sii-dɔ̃li lɛa, ǹ dɛnaa nə n din baa gàãnaa lɛa bɔrɔ, a tɔn sii-doɛ̃ taãn yɛ.

¹⁹ A giala, kanaa kɛ a sii-doɛ̃ n gàãnaabaa lɛa Lawa yii li. Taãn nɛ, ka a n pɛ Lawa a sɛ́wɔ-n lɔn, «Sii-dɔ̃lin sii-zɛnaan bɛ́ kan mɛn koe, Lawa n die ǹ kuĩ ka bɛa kan lɛ-n gɔrɔ.»

²⁰ A n pii doo mà «Dɛnaa din tá sii-dɔ̃lin taasiɛn doɛ̃, ǹ ba màn kɔ́n lɛa wa.»

²¹ Bɛ lɛ nɛ, min kɔ́n doamaa bie a n din koa ka daraa-wɔlen sii ni, a da yaa ǹ dɔn nə́ minbuiinin lɛa wa. A giala, mà ǹ tumaa n kaa wɔ lɛa:

²² Pooli ni, Apolɔɔsi ni, ka Piɛrɛ nɛ; kanaa din tumaa nɛ, yiikoonaabaa nɛ ka gɛ̀ nɛ, pelo ǹ ne ka bǐɛ̃ ǹ nɛ, ǹ dinin tumaa n kaa wɔ lɛa.

²³ Ka dinin kɛn man Krita wɔ lɛa, Krita dɔ n Lawa wɔ lɛa.