Korɛnti1 13 - LAWA A BOO SONBORE 2011

Dɔɔ̃nɔn kɔn-narɛɛ

¹ Haalɛ ta má minbuiinin bɔlɔ pɛ, má lon a dia dí-a wole dinin wɔ pɛ, bɛ̀ kɔn-narɛɛ ba ma lon wa, maa boo laakalaa lɛ a màn kɔ́n lɛa wa. A n goon ka màn wuu n boe, hinlaa ka fɔlɔ màn wuu bɛ́ lɔn.

² Ta má Lawa a boo gii-dali baa, ta má màn-doɛ̃ tumaa yɛ, man sii-duriin tumaa doɛ̃, goleemali mɛn bɛ́ boe la a kelen goa a ǹ bɔ ǹ bǎã nɛ, ta má bɛ yɛ, bɛ̀ kɔn-narɛɛ ba ma lon wa, ma a màn kɔ́n lɛa wa.

³ Ta má n gɔn màn tumaa gii bòonaan manɛ, ta má n gɔ̀nɔn da tɛ-n, bɛ̀ kɔn-narɛɛ ba ma lon wa, ma a màn kɔ́n yii a-n wa.

⁴ Kɔn-narɛɛ n toɛ min nə n foo kũ, a sii n kɔɔ̃nɛ, a yii ná a mimini wa. A toɛ min nə n din kalaa wa, a toɛ a n din koa wa.

⁵ Kɔn-narɛɛ a toɛ min sìi da ǹ sii zɛnaa wa, a toɛ min ga a din a là dinsɔɔ̃ li wa. A toɛ min foo yoo fufuu wa, a toɛ min nə ǹ miã koa a gɔ́ɔ̃-n wa.

⁶ Kɔn-narɛɛ a toɛ min nə n nyɛnyɛɛ ka kɔkɔrɔbaa ǹ sii-n wa, sɛnɛ, a n toɛ min foo kɔɔ̃n kɔ ka taãn pɛ nɛ.

⁷ Kɔn-narɛɛ n toɛ min nə ǹ miã a sã tumaa toa nɛ. A n toɛ min golee ǹ miã li ka sii tumaa nɛ. A din nə toɛ dɔn min foo-doa yɛ sii tumaa gɔ́ɔ̃ nɛ, a sii tumaa si a ganaa.

⁸ Kɔn-narɛɛ a papaɛ̃ duduu wa. Lawa a boo gii-dalibaa á re nyɛɛ, bɔlɔ soree pɛ á re nyɛɛ, màn-doɛ̃ á re nyɛɛ.

⁹ A giala, wɔa màn-doɛ̃ lɛ lɛ a piɛ̃-n wa, wɔa Lawa a boo gii-dalibaa dɔ lɛ a piɛ̃-n wa.

¹⁰ Sɛnɛ, bɛ̀ sii lɛ-piɛ̃ zɛnaa daa biikoo mɛn li, lɛ-doa bɛ́ sii mɛn la, bɛ á re nyɛɛ.

¹¹ Ma bɛ́ má goã nɛnyaan lɛa, man má goã boo diɛ ka nɛnyaan wɔ bɛ́ lɔn, má goã n taasɛ ka nɛnyaan wɔ bɛ́ lɔn, má goã n yiri koe ka nɛnyaan wɔ bɛ́ lɔn. Sɛnɛ, ma bɛ́ má min gole baa, má nɛnyaanbaa ǹ sii tumaa lɛ doa walan.

¹² Sisia, wɔ yii n màn yii nuùnaà nɛ kooro ka damalon wɔ bɛ́ lɔn, sɛnɛ ǹ kɔ́n pinaa, wɔ á re goɛ̃ kɔn yɔrɔ-a dəndəənəə ne. Sisia maa màn-doɛ̃ lɛ lɛ a piɛ̃-n wa, sɛnɛ, ǹ kɔ́n pinaa maa màn-doɛ̃ lɛ lɛ á re piɛ̃ ka Lawa bɛ́ ma doɛ̃ lɔn.

¹³ Kanna kəni, sii sɔɔ kɛ na a tan, goleemali ni, foo-doa nɛ, kɔn-narɛɛ nɛ, sɛnɛ, kɔn-narɛɛ n gole ǹ tumaa nɛ.