Kiin2 4 - LAWA A BOO SONBORE 2011

Yiliizee nə n doe lɔ giɔɔrɔ goon lɛ

¹ Lawa a boo gii-dalin mɛnɛn bɛ́ giã-n kun zaman lɛa, bɛn goon a lɔ Yiliizee nyankɔ á pɛ nɛ: «Ma zuũ lɛ, n dí-nyali lɛa, á gã. N ta doɛ̃, mà n dí-nyali lɛ goã nyɛ́ɛ biɛ Dɛnaa Lawa yii ni. Sɛnɛ, a giɔ̀mɔdɛnaa na á daa, a gɔ́ɔ̃ na a ganaa, a maa nɛgiĩ min paa kũ a baa a bɛ̀rɛn lɛa, a giɔ̀mɔ lɛ bǎã nɛ.»

² Yiliizee nɔ̀n da lɔ lɛ la: «Masɛ n boe la ma wàa zɛnaa n nɛ? Bɛ pɛ ma nɛ, wàa n màn nə n lon piɛ?» Lɔ lɛ ná a lɛ si: «Màn kɔn din ba n bɛ̀rɛlɔ lɛ lon wa, bɛ̀ á n bɔ nyɔɔ tɔn boɛɛn nɛ.»

³ Yiliizee tɔ́n pɛ nɛ: «Kɔ n miãkɛnɛn tumaa lɛ, n dɔnɔn nyankɔ ǹ la, dɔnɔn mɛnɛn nə́ ke ǹ gɔ́ɔ̃ kooromaa nɛ. N baran dɔnɔn lɛn nyankɔ kiɛɛrɛ wa.

⁴ Bɛ kio, n dɔ kion, n kiɛnlɛ tã n din laanka n nɛnyaanan lɛ. N nyɔɔ lɛ kakaa bɛa dɔnɔn lɛn nɛ. Bɛ̀ dɔn lɛ mɛn pã lɔn gɔrɔ, n bɛ saa n da para li.»

⁵ Lɔ lɛ kiɛ̃ á n bɔ Yiliizee li, á woo n dɔ kion, á kiɛnlɛ kũ á tã a din laanka a nɛnyaanan lɛ. Nɛnyaanan lɛn man nə́ goã dɔnɔn lɛn diɛ la, a dɔ n nyɔɔ lɛ kiɛ ǹ nɛ miɛ̃.

⁶ Dɔnɔn lɛn bɛ́ ǹ nə́ papã, lɔ lɛ pɛ a nɛginin ni: «Ka dɔn goon dia doo.» Nɛginin lɛ ná a lɛ si mà dɔn banban doo wa. Nyɔɔ lɛ lɛ nɔmaa á kũ, a die wa.

⁷ Lɔ lɛ woo a boo da Lawa a min lɛ nɛ. Lawa a min lɛ tɔ́n pɛ: «Wo bɛa nyɔɔ lɛ sã, n na a giɔ̀mɔ lɛ saraa nɛ. Màn mɛn bɛ́ re goɛ̃ n gɔn, n die n la bɛ ganaa, n din laanka n nɛnyaanan nɛ.»

Yiliizee laanka Sunɛmu lɔ pàãma

⁸ Ǹ kɔn pinaa, Yiliizee n kiɛ̃ Sunɛmu kiwi, lɔ pàãma goon goã bɛa kiwi lɛ nɛ, á Yiliizee bii mà a da màn bii. A saa bɛ lɛ ganaa, bɛ̀ Yiliizee tá kiɛ̃ lɔn, a n woe màn bii lɔ lɛ li.

⁹ Lɔ lɛ pɛ ǹ zuũ ni: «Ma á doɛ̃, máa giĩ kɛ lɛ goɛ̃ bɛ̀ a da wɔ li, Lawa a min sonbore ne.

¹⁰ Toa wɔ waa ǹ kion boɛɛn dɔ kalan, wɔ piì da a nɛ, tabala nɛ, dankan nɛ, bólon da ǹ bǎã nɛ, Yiliizee wɔ lɛa, màn mɛn bɛ́ toɛ, bɛ̀ á daa wɔ li, a boo la a giã walan.»

¹¹ Ǹ kɔn pinaa, Yiliizee daa bǎã lɛ nɛ, á wɔ bɛa waa ǹ kion boɛɛn lɛ nɛ, á waa a nɛ.

¹² Yiliizee pɛ a dí-nyali Geazi ni: «Lɛ dia Sunɛmu lɔ lɛ la.» Geazi lɛ dia la, á daa golee a yɔrɔ-a.

¹³ Yiliizee pɛ a dí-nyali lɛ nɛ kɛnɛn: «A pɛ lɔ lɛ nɛ, mà á wɔsɛn guguru kɔ ka yɔrɔ din tumaa nɛ. Mà wɔsɛn nə wàa zɛnaa nɛ? Wɔ wo a bǐɛ̃ kɔ ǹ boo da kii-n hinlaa wɔ wo da sɔraasin mìilandɛnaa nɛ?» Yǎa lɔ lɛ tɔ́n nə n toa: «Ma tá ka tɔrɔn bii kiĩni.»

¹⁴ Yiliizee tɔ́n pɛ doo: «Wɔsɛn man boe la wɔ wàa zɛnaa lɔ lɛ-n kəni?» Geazi Yiliizee lɛ si: «Nɛ ba lɔ lɛ lon wa le! Ǹ zuũ dɔ́ zizi kɔ.»

¹⁵ Yiliizee pɛ: «Lɛ dia lɔ lɛ la.» Geazi lɛ dia la, á daa golee kiɛnlɛ-a.

¹⁶ Yiliizee pɛ lɔ lɛ nɛ: «Lɛ̀ boe kɛnɛn ke, n tá re nɛ guĩ n gɔn.» Lɔ lɛ pɛ: «Haayii! Maa dɛnaagiĩ, Lawa a boo gii-dali, n baran soɛ bɔ ma-n wa.»

¹⁷ Sɛnɛ, lɔ lɛ nɔ̀ si á nɛginin yɛ a lɛ̀ n buĩ-a, a din biikoo lɛ gɔ́ɔ̃ nɛ ka Yiliizee goã á pɛ-n lɔn.

¹⁸ Nɛnyaan lɛ daa á gole kɔ. Ǹ kɔn pinaa, a nɛnyaan lɛ a díi toa kun ka kaa-piɛ dí-nyalin ni, nɛnyaan lɛ woo a li.

¹⁹ Á n toa ǹ di lɛ ganaa mà asɛ mìi ni, ma asɛ mìi ni! Díi lɛ tɔ́n pɛ a dí-nyali ni mà a nɛ lɛ saa a wo kɔ ǹ dan la.

²⁰ Dí-nyali lɛ dɔ nɛ lɛ saa, á woo kɔ ǹ dan la. Nɛ lɛ goã ǹ dan gòã la, yǎa penleen kɔ. Bɛ kio, á gã.

²¹ Ǹ dan lɛ dii á woo naa tán Lawa a min lɛ a piì la, á kiɛnlɛ kũ á tã lɛ á soo.

²² Lɔ lɛ lɛ dia ǹ zuũ la á pɛ nɛ: «Bǐɛ̃ kɔ n dí-nyalin lɛn goon kɔ ma la, ka dundun daanan lɛn goon ne. Man baa sii woe Lawa a min lɛ li, ma á n bɔyɛɛ.»

²³ Ǹ zuũ lɛ pɛ: «Wàa na á baa n tá li n wo a li pelo? Mui dii zɔ́n hinlaa *susu ǹ pii dɔ bɛ́ a bie wa!» Lɔ lɛ nə́ n toa: «N foo baran biɛ na wa.»

²⁴ Lɔ lɛ toa ǹ nə́ kɛkɛrɛ da dundun dan dɔ̀ɔ̃ nɛ, á pɛ a dí-nyali ni: «Mɛ ma nyɛɛnɛ, n tɔ wɔ, n baran toa n golee zii la wa bɛ̀ ma din nə ma pɛ n nɛ mà n golee wa!»

²⁵ Lɔ lɛ woo, á woo dɔ Lawa a min lɛ li Karmɛli kele la. Lawa a min lɛ bɛ́ á yɛ tìãlɛa lɔn gɔrɔ, á pɛ a dí-nyali Geazi ni: «Wɔa Sunɛmun lɔ lɛ á ke!»

²⁶ Bǐɛ̃ kɔ n baa si n wo n da lɛ, n kaasiĩnii da nɛ, n nɔ̀n da ka ǹ zuũ laanka nɛnyaan lɛ nɛ. Lɔ lɛ Geazi lɛ si mà bǐɛ̃ tan.

²⁷ Lɔ lɛ bɛ́ á woo dɔ Lawa a min lɛ li, kele lɛ la, á Lawa a min lɛ gòãn kũ. Geazi nə́ n zɔ̃ á dɔ, mà a n lɔ lɛ nyɛnɛɛ zuĩ, sɛnɛ, Yiliizee pɛ nɛ mà a toa walan, a giala mà a n yɔrɔ kɔsiɛ gɔ́ɔ̃ nɛ. Mà Dɛnaa Lawa na á duru asɛ la, a pɛ asɛ-n wa.

²⁸ Lɔ lɛ nə́ n toa: «Má nɛ nyankɔ maa dɛnaagiĩ Yiliizee la ya? Táa má goã má pɛ n nɛ, máa n baran soɛ bɔ ma-n wa.»

²⁹ Yiliizee pɛ Geazi ni: «Yoo n nə n binbin kũ, n maa bàlà lɛ saa n gɔn, n woo! Bɛ̀ ń nə n da min lɛ, n baran fòo da ǹ dɛnaa-n wa. Bɛ̀ min fòo da n nɛ, n baran ǹ dɛnaa lɛ si wa. N die n maa bàlà lɛ da nɛnyaan lɛ yɔrɔ la.»

³⁰ Nɛginin lɛ a náa tɔ́n pɛ, n dɔ bɛ́ nə n tan, Dɛnaa Lawa Yiikoonaa lɛ tɔ nɛ, ma ba n boe n li wa. Yiliizee tɔ́n yoo á kɔ lɔ lɛ lɛ.

³¹ Geazi sɛ goã á woo ǹ nyɛɛnɛ, á bàlà lɛ da nɛnyaan lɛ yɔrɔ la, sɛnɛ, boo kɔn bɔ wa, yiikoonaabaa ǹ sii a kɔnboe kɔn yɛ wa. Geazi tɔ́n wusoo á daa n da Yiliizee lɛ, á bɔ boo lɛ nɛ á da nɛ mà nɛginin lɛ yii kaa wa.

³² Yiliizee bɛ́ á dɔ kion lɛ nɛ, bɛ̀ nɛginin lɛ á ke á gã sonbore, a lɛ n boe-n tán Yiliizee a piì la.

³³ Yiliizee wɔ á kiɛnlɛ kũ á tã a din lɛ, nɛginin lɛ li, á Dɛnaa Lawa nyankɔ.

³⁴ Bɛ kio, Yiliizee waa nɛnyaan lɛ la, á n lɛ wɔ a lɛ lɛ, á n yiin kɔ nɛnyaan lɛ wɔn lɛ, á n gɔnɔn dɔn kaa nɛnyaan lɛ wɔn la. Yiliizee goã kuməə-n nɛnyaan lɛ la, yǎa nɛnyaan lɛ gɔ̀nɔn tɔ́n daa á wɔ̃.

³⁵ Yiliizee yoo lon á goã n gòãn boe kɔn kion lɛ nɛ, bɛ kio, á wusoo á woo n lɛ bɔ tán nɛnyaan lɛ la. Nɛginin lɛ tɔ́n haatisəə da gunyin sɔbaa, á n yii bũ.

³⁶ Yiliizee lɛ dia Geazi la, á pɛ: «Lɛ dia Sunɛmu lɔ kɛ lɛ la.» Geazi lɛ dia lɔ lɛ la. Á daa Yiliizee li, Yiliizee pɛ nɛ: «N nɛ lɛ si.»

³⁷ Lɔ lɛ woo na á kaa tán Yiliizee giulun, á n musin kurumaa tán, á tɔn a nɛginin lɛ kũ, á soo.

³⁸ Yiliizee wusoo á daa Gilgaali. Bɛa biikoo li, bɛ̀ bòo n gána lɛ nɛ. Ǹ kɔn pinaa, a Lawa a boo gii-dali zaman lɛ toa giã-n tán Yiliizee nyɛɛnɛ, Yiliizee pɛ a dí-nyali ni: «Dɔn gole da tɛ lan, n kiri mu bɔ màn kɔn-a, Lawa a boo gii-dali zaman lɛ wɔ lɛa.»

³⁹ Ǹ min goon soo á woo lalaa mà a n dù goɛ. Á n mìi na don *rezɛ̃ da ganaa, á màn tɔrɔ kɔn goa a tɔ n kolokɛnti, a ná a mɔnaa pã nɛ. A bɛ́ á n bɔyaa ǹ mɛn waáraa, á kukuru á kaa kiri mu dɔn lɛ nɛ. Min kɔn goã doɛ̃ dinin a bɛ́ màn mɛn lɛa wa.

⁴⁰ Ǹ nə́ daa màn-bii lɛ kɔ minin lɛn la. Sɛnɛ ǹ na a nɛ̀n da lɔn gɔrɔ, ǹ nə́ n lɛ dɛ ǹ nə́ pɛ: «Lawa a min, dɔn lɛ gɔ́ɔ̃ n sèwo lɛa.» Bɛ lɛ nɛ, ǹ boo la ǹ nə́ màn lɛ bii wa.

⁴¹ Lawa a min lɛ pɛ: «Ka da ka wùsu ni.» Á wùsu lɛ pɛsɛ̃ dɔn lɛ gɔ́ɔ̃ nɛ, á pɛ: «Ka kɔ minin lɛn la, ǹ bii.» Màn baraa kɔn goã dɔn lɛ gɔ́ɔ̃-n doo wa.

⁴² Ǹ kɔn pinaa, giĩ goon bɔ Baalisalisaa kiwi, á daa *ɔrzi buuru mìi fuə kɔ Lawa a boo gii-dali Yiliizee la. A da buuru mɛn lɛ kɔ la, maǹ nə́ da ka ɔrzi dii ni. Á *belee burun dɔ kɔ la boroo ne. Yiliizee nə́ n toa a dí-nyali ganaa mà a gii minin lɛn manɛ ǹ sɔ̃.

⁴³ Yiliizee a dí-nyali lɛ tɔ́n na a lɛ si: «Man siɛ lɔn, ma tɔn kɛ gii min paabiɛ nɛ?» Yǎa Yiliizee nə n toa doo: «A gii minin lɛn manɛ, ǹ sɔ̃. Dɛnaa Lawa mà maǹ die soɛ̃, a giala goã.»

⁴⁴ Dí-nyali lɛ dɔ gii minin lɛn manɛ, ǹ nə́ sɔ̃ a giala goã ka Dɛnaa Lawa goã á da lɔn lɛn.