Kiin1 21 - LAWA A BOO SONBORE 2011

Naabɔti a wuru si

¹ Sii mɛn nə n zɛnaa bɛa siin kɛn lɛn kio, bɛ á ke: Zizereyɛli min goon ne, a tɔ n Naabɔti. *Rezɛ̃ da wuru goã a lon kunu Samarii gána a kii Akaabu a piɛ li, Zizereyɛli kiwi.

² Ǹ kɔn pinaa, Akaabu pɛ Naabɔti ni: «N rezɛ̃ da wuru lɛ kɔ ma la ma baa dù we kaa ǹ bǎã lɛa, a giala, a ba sɔsɔɔ maa piɛ ganaa wa. Ma á re rezɛ̃ da wuru kɔsɔ koe a dòo. Bɛ á siĩni á la kɛ nɛ. Hinlaa bɛ̀ n tá li, ma á boe la ma wɔrɔ kɔ n la, a giɔ̀mɔ lɛa.»

³ Naabɔti tɔ́n pɛ Akaabu ni mà asɛ nə n digolon kíɛ̃ saa a kɔ la? Mà Dɛnaa Lawa die a na asɛ kanbaa bɛ ganaa.

⁴ Zizereyɛli min Naabɔti bɛ́ á pɛ mà asɛ ba ǹ digolon kíɛ̃ koe Akaabu la wa, Akaabu woo piɛ ka foo ziziɛ̃ laanka foo yoo ne. A bɛ́ á dɔ piɛ, á waa tán á n yɔrɔ bɔyaa á dia kɛ gɔ̀nɔn la, a màn kɔn bii wa.

⁵ Akaabu a lɔ Zezabɛli daa yaa tán á nɔ̀n da la mà wáa na á baa a foo ziziɛ̃ kɛnɛn, a ná a ba màn bii wa?

⁶ Akaabu ná a lɛ si: «A giala, man má pɛ Zizereyɛli kiwi min Naabɔti ni máa a na a rezɛ̃ da wuru kɔ ma la wɔrɔ ganaa, hinlaa, máa bɛ̀ a tá li, máa rezɛ̃ da wuru kɔsɔ koe la. Á bɛ́ re màn mɛn pii ma nɛ, mà asɛ ba a rezɛ̃ da wuru lɛ koe wa.»

⁷ A lɔ Zezabɛli tɔ́n pɛ nɛ: «Izirayeli gána a kii lɛ bie n din ni wa ya? Yoo n màn bii, n toa n foo kɔɔ̃n kɔ, masɛ din tá re Zizereyɛli kiwi min Naabɔti a rezɛ̃ da wuru lɛ koe n la.»

⁸ Bɛ kio, Zezabɛli sɛ́wɔn kiɛ̃ ka Akaabu tɔ nɛ. Á kii a gòon ganaa ǹ kaaran bǎã da ǹ la, á ǹ dia Naabɔti a kiwi a min golen laanka a kənən la.

⁹ Zezabɛli na á kiɛ̃ bɛa sɛ́wɔn lɛ-n kɛnɛn: «Ka lɛawaa bɔ ka n lɛ sɔɔ. Ka zaman lɛ sɔkɔn, ka Naabɔti da tán ka nyɛɛnɛ.

¹⁰ Ka min paa kaa tán a yɔrɔ-a, min mɛnɛn nə́ ke min kɔrɔn lɛa. Bɛa min kɔrɔn kɛn lɛn die ǹ nə n koa nɛ, ǹ pɛ mà a na á Lawa laanka kii piɛ̃ bɔ. Bɛ kio, ka kũ ka soo ne, ka dɛdɛ ka kɔlɔn nɛ, a gã.»

¹¹ Zizereyɛli kiwi a min golen lɛn laanka a kənən lɛn dɔn nə́ zɛnaa, á kɔnpɛ ka Zezabɛli a boo lɛ nɛ, á kiɛ̃ sɛ́wɔn lɛn nɛ, á ǹ dia ǹ la.

¹² Ǹ nə́ lɛawaa bɔ ǹ nə́ n lɛ sɔɔ, ǹ nə́ Naabɔti da tán zaman lɛ nyɛɛnɛ.

¹³ Min paa kɔn daa giã tán Naabɔti yɔrɔ-a, min kɔrɔn manɛ. Bɛa min kɔrɔ paa lɛ yoo, ǹ tá n koɛ ka Naabɔti ni zaman lɛ yɔrɔ-a, ǹ nə́ pii: «Naabɔti na á Lawa laanka kii piɛ̃ bɔ.» Bɛ kio, ǹ nə́ tɔ́n Naabɔti kũ, ǹ nə́ soo-n kiwi lɛ nɛ, ǹ nə́ dɛdɛ ka kɔlɔn nɛ, á gã.

¹⁴ Ǹ nə́ min dia woe pii Zezabɛli ni, mà ǹ nə́ Naabɔti dɛdɛ ka kɔlɔn nɛ, á gã.

¹⁵ Zezabɛli bɛ́ á ma, mà ǹ nə́ Naabɔti dɛdɛ ka kɔlɔn nɛ, á gã, á tɔ́n pɛ Akaabu ni: «Naabɔti bɛ́ á goã ǹ piɛ̃ mà a ba rezɛ̃ da wuru mɛn koe n la wɔrɔ ganaa wa, yoo n bɛ si n baa n wɔ lɛa sisia, a giala, Naabɔti lɛ yii ba koo doo wa, á gã.»

¹⁶ Akaabu bɛ́ á ma mà Naabɔti gã, á yoo á woo Zizereyɛli kiwi min Naabɔti lɛ a rezɛ̃ da wuru lɛ nɛ, màn mɛn bɛ́ toɛ, a si a baa a wɔ lɛa.

Yilii n Akaabu a sumu a dɔlɔ boo diɛ

¹⁷ Dɛnaa Lawa boo da ka Tisibii min Yilii ni:

¹⁸ – Izirayeli gána a kii Akaabu lɛ, Saamari kiwi, yoo n wo a li, a tá Naabɔti a rezɛ̃ da wuru-n. A na á woo bɛa wuru lɛ nɛ, a n die sii biɛ a din wɔ lɛa.

¹⁹ N die n pɛ nɛ: Dɛnaa Lawa mà n gɛ̀ dɛ ń nya, a nə n gɔ́ɔ̃ dɔ nɛ, n na a màn kũ n si n baa n wɔ lɛa? Bɛ lɛ nɛ, n die n pɛ-n kɛnɛn: «Ginin nə goã ǹ nə́ Naabɔti mà piã tán bǎã mɛn nɛ, a din bǎã lɛ nɛ, ǹ tá re n dɔ wɔ kɛ lɛ piɛ̃ a nɛ.»

²⁰ Akaabu bɛ́ á Yilii yɛ, á pɛ nɛ: «Ee maa zɔ́ɔ, ń ma wɔlɔ yɛ kəni.» Yilii tɔ́n na a lɛ si: Má n wɔlɔ yɛ, a giala n nə́ n din kɔ dí baraa nya la, Dɛnaa Lawa yɔrɔ-a.

²¹ Bɛ lɛ nɛ Dɛnaa Lawa pɛ: «Man die koe boe n ganaa, man die n nafoɛ̃ ma n bɔ bii-a. Man die n bɛ̀rɛn dii ka min mɛnɛn bɛ́ ǹ ba bɛ̀rɛn lɛa wa, ma ǹ bɔ n sumu-n.

²² Man die n sumu lɛ biɛ ka Nebaati a nɛgiĩ Zeroboamu wɔ bɛ́ lɔn, man die biɛ ka Ayia a nɛgiĩ Bayesaa dɔ wɔ bɛ́ lɔn. A giala, n wɔ ma gasɛ nɛ, ń Izirayeli minin kaa sii baraa zɛnaa ganaa.»

²³ Dɛnaa Lawa boo da Zezabɛli dɔ wɔ paǹ li, á pɛ: «Ginin tá re n gere soɛ̃ Zizereyɛli kiwi.

²⁴ Akaabu a kion minin mɛnɛn yii bɛ́ re giɛ̃ kiwi, ginin tá re ǹ gere soɛ̃. A kion minin mɛnɛn yii bɛ́ re giɛ̃ don, bàanan tá re ǹ gere mui.»

²⁵ Min kɔn din yɛ, á n din kɔ dí baraa nya la, Dɛnaa Lawa yɔrɔ-a, ka Akaabu bɛ́ lɔn wa. A giala, a lɔ Zezabɛli lɛ na á goã sɔmɛ diɛ a zɛnaa ganaa.

²⁶ Akaabu dí bɔbɔnɛɛ nya, á dìn guguru kɔ ka Amɔɔrɔ tɔrɔn kɛn bɛ́ lɔn Dɛnaa Lawa goã á ǹ loo Izirayeli minin nyɛɛnɛ, ǹ nə́ giã ǹ bǎã nɛ.

Akaabu ná a sã dɔ̃

²⁷ Akaabu bɛ́ á bɛa boon lɛn ma, á na a mɔnaan kũ á tɔtoɛ̃, á gɛ̀ koa ǹ mɔnaa wɔ a din-a, á n lɛ sɔɔ. A na á goã wɛɛ tán ka bɛa gɛ̀ koa ǹ mɔnaa lɛ nɛ a ganaa. A na á goã tɔ dɔ we ne sɛlɛlɛ nɛ.

²⁸ Bɛ kio, Dɛnaa Lawa boo da ka Tisibii min Yilii ni, á pɛ nɛ:

²⁹ «Ń Akaabu a din gisĩ ǹ gɔn kɛ yɛ ma yɔrɔ-a? A bɛ́, á n din gisĩ ma yɔrɔ-a, bɛ lɛ n ke ma ba re koe boe a ganaa, a yiikoonaabaa gɔ́ɔ̃-n wa. A nɛgiĩ a yiikoonaabaa gɔ́ɔ̃ nɛ, man die koe boe a kion lɛ ganaa.»