Zɔbu 34 - LAWA A BOO SONBORE 2011

Elihu n Zɔbu a sii la baã liere koe doo

¹ Elihu tɔ́n woo nyɛɛnɛ á pɛ:

² «Doɛ̃ wolen lɛn, ka n too kɔ maa boo li, kasɛn mɛnɛn bɛ́ sii doɛ̃, ka n too kɔ ma lon.

³ A giala, too n boo a kɔɔ̃nbaa doɛ̃, ka lɛwɔn dɔ á ke màn-bii a kɔɔ̃nbaa doɛ̃ lɔn.

⁴ Sii mɛn bɛ́ pepere, ka daa wɔ dinin nə bɛ bɔ. Sii mɛn bɛ́ siĩni, ka daa wɔ dinin nə bɛ dɔ̃ kɔn lon.

⁵ Zɔbu lɛ na á pɛ mà asɛ sii la wa. Sɛnɛ, mà Lawa nə n piɛ̃, mà a ba sonbore koe asɛ la wa.

⁶ Mà sonbore dɔ na asɛ lon, sɛnɛ mà maǹ asɛ biɛ soɛ-bɔle lɛa. Mà là-paparɛɛ kɛ n ka a daa a na asɛ dɛ, sɛnɛ, mà asɛ sii baraa dɔ zɛnaa wa.

⁷ Zɔbu din miã tan le? Minin da yaa lɛa n woe la ka mu ni.

⁸ A n koɛ kun ka sii baraa-zɛnaalin ni, a n tɔ we kun ka min baraan nɛ.

⁹ A giala a na á pɛ, mà là goon ba a ganaa min kɔɔ̃n kɔ Lawa ganaa wa.

Lawa á pepere

¹⁰ Kasɛn mɛnɛn bɛ́ sii giala miɛ, ka n too kɔ ma lon. Lawa á baraa sonbore? Pàãyiidɛnaa lɛ á kɔkɔrɔ sonbore? Taasiɛ bɔbɔnɛɛ!

¹¹ A giala, a n minbuiin nɛ sarɛɛ, a kɔnpɛ ka a zɛnaa ǹ sii ni. A n didie sarɛɛ, a kɔnpɛ ka a tɔ wɔ ǹ gɔn nɛ.

¹² Haayii, sonbore, Lawa a baraabaa zɛnɛɛ wa. Pàãyiidɛnaa a kiri kɔkɔrɔ we wa.

¹³ Min kɔsɔ na á Lawa koa tán kɛ lɛ mìi la ya? Min kɔsɔ na á koa, mà a kanaa kɛ tumaa a sii yɔrɔ bɔ?

¹⁴ Bɛ̀ Lawa nə n taasɛ ka a dinsɔɔ̃ a sii ni, bɛ̀ a na a yiikoonaa baa ǹ piɛ̃ kɛ sii soekɔn a din li,

¹⁵ bɛ̀ min tumaa a fɔfoã n nyɛɛ bǎã goon, bɛ̀ minbuiin nɛ n wusii a tii baa.

¹⁶ Haya Zɔbu, yiri bɛ́ n lon, n too kɔ kɛ li, n too kɔ maa boon kɛn li.

¹⁷ Man Lawa zɛ̀rɛ biɛ? A din lɛ n gole, á n pepere. Peperebaa bɛ́ a kɔɔ̃n min mɛn ganaa wa bɛ á boe la a nyɛɛnaan bɔ?

¹⁸ Lawa dinsɔɔ̃ n boe la a kiin laanka gánadɛnan zɛ̀rɛ baa, ǹ mɛnɛn bɛ́ fɔ̃madinbaãlɛ wolen lɛa, ǹ nə́ baraa dɔn.

¹⁹ Lawa dinsɔɔ̃ na a bɔnbii-a we wa. A pàãma soɛ koe doobaa-n wa, a giala, a din gɔn na á ǹ tumaa zɛnaa.

²⁰ Bɛa goledɛnan kɛn lɛn, maǹ giɛ̃ bǎã goon ne, làan nɛ. Zaman nə yiɛ, maǹ papaɛ̃ ǹ nə n bɔ bii-a, maǹ pàãdɛnaa boe ǹ daa, gɔn ná a miɛ̃ a ganaa wa.

²¹ A giala, Lawa n giɛ minbuiin nɛ a tɔ wɔ ǹ gɔn ganaa, a gòã saa gogoonmaa yii, Lawa nə n yiri koɛ li.

²² Wɔlɔ tì biribiri banban, sii baraa-zɛnaalin nə́ boe la ǹ nə duru a-n wa.

²³ Lawa laadoo ba a ganaa a ga minbuiin nɛ ganaa gunyin paa, a tɔn bíi a wo kiri wɔ a ganaa wa.

²⁴ Sii-gɔsiɛ din ba a-n wa, a n pàãdɛnan kiɛ, a min kɔsɔn goa a ǹ kaa ǹ bǎã nɛ.

²⁵ A giala, a tá ǹ nya ǹ dín doɛ̃. Tèlò goon gɔ́ɔ̃ dɔ nɛ, a nə ǹ kiɛ, a ǹ yɔyɔrɛ.

²⁶ A nə ǹ dii ka ǹ bɛ́ sii baraa-zɛnaali dii lɔn, zaman yɔrɔ-a.

²⁷ A giala, ǹ nə́ n piã ka Lawa nɛ, ǹ ba li ǹ na a sii kɔn din dɔ̃ wa.

²⁸ Maǹ nə́ zɛnaa miɛ̃, yǎa doobaa nə́ n lɛ dɛ Lawa ganaa. Lawa dɔ bɛ́ nɔmaa-wɔle a lɛ-dɛ miɛ.

²⁹ Sɛnɛ, bɛ̀ Lawa ba li a sii zɛnaa wa, die n die a zɛ̀rɛ biɛ? Bɛ̀ á n duru, die n boe la a yɛ? A bɛ́ giɛ tɔrɔn walan lɔn, a n giɛ min gogoonmaa dɔ walan miɛ̃.

³⁰ A giala, a ba li min baraa goã kiibaa la wa, màn mɛn bɛ́ toɛ, a baran kan baa zaman lɛ ganaa wa.

Elihu mà Zɔbu n sii baraa-zɛnaali lɛa

³¹ Min tá boe la a pɛ Lawa nɛ mà asɛ a sii baraa zɛnɛɛ doo wa?

³² Mà asɛ bɛ́ a tɔn màn mɛn dɔ̃ wa, mà Lawa din bɛ nyaa asɛ nɛ. Mà bɛ̀ asɛ sii baraa zɛnaa lɛlɛ, mà asɛ a tii a ganaa doo wa.

³³ Nsɛ a taasiɛ nɛ, mà Lawa doamaa nɛ a bɛa dɛnaa kũ lɔn? N bɛ́ n ba nɛn wa... n din bɛ́ n boo lɛ kuri, masɛ bɛ́ ma bie wa, n bɛ́ màn mɛn doɛ̃, bɛ lɛ pɛ kəni.

³⁴ Min mɛnɛn bɛ́ sii giala miɛ, min mɛnɛn bɛ́ sii doɛ̃, bɛ̀ bɛn man nə boo kɛ ma, maǹ die pii kun ka masɛ-n kɛnɛn:

³⁵ Zɔbu n boo diɛ, sɛnɛ a ba sii doɛ̃ wa. A boo din tumaa baãnaabaa ǹ boo.

³⁶ Zɔbu a yii-koe-yɛ kɛ wo miɛ̃, a giala a n ma lɛ sii ka min baraan wɔ bɛ́ lɔn.

³⁷ A giala a n màn diɛ a sii baraa li ka a gòãn dii kɛ nɛ, a n yaa we Lawa ganaa wɔ bii, a n boo giala mɔnɛɛ Lawa ganaa.»