Zɔbu 3 - LAWA A BOO SONBORE 2011

Zɔbu lɛn baraa bíi a din a yɛ ǹ lɛawaa li

¹ Bɛ kio, Zɔbu tɔ́n nə n lɛ bũ, á lɛn baraa da a din a yɛ pinaa li.

² Zɔbu a da ǹ boo lɛ á ke:

³ «Ma din a yɛ pinaa ke, toa bɛ̀ Lawa na á bɛ papaã. Ma dan maa nɔ̀ si tèlò mɛn nɛ, toa bɛ̀ a na á bɛ dɔ papaã.

⁴ Toa bɛa lɛawaa kɛ lɛ goã tì, n baran n toa lon n nimi n da kun ka lɛawaan nɛ wa. N nyan toa a lɛ̀ ǹ miã waa doo wa.

⁵ Toa wɔlɔ tì biribiri si a n kɔ lɛ, toa labara tì waa la, toa wɔlɔ tì gole nyɛ́ɛ da a ganaa.

⁶ Bɛa tèlò kɛ lɛ, toa wɔlɔ tì si a baa a wɔ lɛa. A baran n da kun ka lɛ̀ a lɛawaan nɛ doo wa, a baran mɛ kun ka mui a lɛawaan nɛ doo wa.

⁷ Sonbore, n nyan toa là goon din yɛ bɛa tèlò kɛ ganaa wa, n nyan toa foo kɔɔ̃nbaa ǹ lɛ-dɛ kɔ́n bɔ a-n wa.

⁸ Min mɛnɛn bɛ́ lɛn baraa bíi doɛ̃, min mɛnɛn bɛ́ *Leviatan kɛa bíi ǹ gɔn doɛ̃, bɛn die ǹ lɛawaa kɛ zaãbaa.

⁹ Wɔlɔ tì biribiri die a kɔ a wasamiɛ̃n a leeren lɛ. A n yii da lɛ̀ a waa la a fɔ̃, a nyan wasa a bɔ yɛ ka a yii-n wa.

¹⁰ A giala, bɛa tèlò kɛ lɛ maa nɔ̀ sàabaa wa, a nɔmaa saa á bɔ ma nyɛɛn wa.

Zɔbu mà gɛ̀ á soɛ là-paparɛɛ kɛ miã nɛ

¹¹ Wàa na á baa, ma gã ma dan gɔ́ɔ̃-n wa? Wàa na á baa, ma gã maa yɛ pinaa wa?

¹² Wàa na á baa, gòãn nə́ yɛ ǹ nə́ ma gũ? Wàa na á baa, nyɔ yɛ má mi?

¹³ Bɛ̀ man má gã lɛlɛ, bɛ̀ ma bɛ́ là nyantoro la kanna. Bɛ̀ man nyuù we kanna, n susui,

¹⁴ kun ka kanaa kɛa kiin laanka a min dadaran nɛ, bɛn mɛnɛn bɛ́ ǹ dinin yala foɛ̃ sɔnbɔraan bɛ̀ ǹ koa.

¹⁵ Bɛ̀ a na á n baa miɛ̃, bɛ̀ man die goɛ̃ kun ka gánadɛnan nɛ, sana bɛ́ ǹ mɛnɛn lon, wɔrɔ dɔ nə́ ǹ kion piɛ̃.

¹⁶ Bɛ̀ a bie á n baa kɛnɛn wa, bɛ̀ man die goɛ̃ ka nɛ mɛn bɛ́ a dɔ wa, a gere soo ǹ dan gɔ́ɔ̃ nɛ, bɛ̀ man die goɛ̃ ka nɛnyaan bɛ́ lɔn, nɛ mɛn yii bɛ́ a tɔn kanaa yɛ wa.

¹⁷ Min baraan ba ǹ baraabaa zɛnɛɛ walan wa. Min mɛnɛn nə nɔmaa, bɛn manə n susui walan.

¹⁸ Kòso nɛn tumaa n là nyantoro yii. Min mɛnɛn nə goã boe ǹ yii ni, ǹ ba bɛn lɛ miɛ̃ doo wa.

¹⁹ Nɛnyaanan nɛ, min dadaran nɛ, ǹ tumaa n walan. Bɛ̀rɛ ba n gùrù naɛ a mìinaa-n doo wa.

²⁰ Wàa na á baa, Lawa á nɔmaa-wɔle yii toɛ koo? Wàa na á baa, Lawa á wɔlɔ fúlu koe foo ziziɛ̃ wole la?

²¹ Bɛn mɛnɛn bɛ́ n yii diɛ gɛ̀ la a ná a die wa. Maǹ giɛ gɛ̀ li á la gɔn màn sonbore ne.

²² Bɛ̀ man yala-n dinin, bɛ̀ man die n nyɛnyɛɛ foo kɔɔ̃nbaa gole gɔn.

²³ Ma yii a tá koobaa là n ka wàa nɛ? Lawa n ma gɛwaa ma paǹ yii-a, ma yii a bɔ ǹ lɛ-a wa.

²⁴ A giala, ginii maa màn-bii baa, maa lɛ-baa ba nyɛɛ wa, ka mu n baa sii tán.

²⁵ Sii mɛn goã nyɛ́ɛ diɛ ma ganaa, bɛ́ ma yɛ. Ma goã nyɛ́ɛ biɛ sii mɛn nɛ, bɛ́ dɔ ma-a.

²⁶ Là nyantoro ba ma lon wa, yii-nyɛɛ banban, susui banban, yǎa nɔmaa.»