Zaã a sɛ́wɔ 15 - LAWA A BOO SONBORE 2011

Yezu n kɔnboe ka da laanka a gùrù ni

¹ Masɛ n *rezɛ̃ da nɛ-kɔle taãn-taãn lɛa, maa Díi n wuru lɛ a dɛnaa lɛa.

² Bɛ̀ da gùrù mɛn tá masɛ ganaa, a ná a nɛ koe wa, a n bɛ kuri; bɛ̀ ǹ mɛn tá nɛ koe, a n bɛ karan zɛnɛ a bǐɛ̃ kɔ, màn mɛn bɛ́ toɛ, màn wusoo a mɛ a nɛ kɔ li doo.

³ Ma boon mɛnɛn pɛ ka nɛ, bɛn lɛn dinin nə́ ka bǐɛ̃ kɔ gɔrɔ dɔn.

⁴ Ka goã doa-n kɔn ka masɛ nɛ, ka masɛ bɛ́ doa-n kɔn-a ka-n lɔn. Bɛ̀ da gùrù a doa nɛ ǹ dan ganaa wa, a boe la a nɛ kɔ a dinsɔɔ̃ wa. Ka dɔn man miɛ̃, bɛ̀ ka a doa-n kɔn ka masɛ-n wa, ka a boe la ka sii kɔ́n zɛnaa wa.

⁵ Masɛ n goon ka da kɔ́n nɛ, kasɛn man a gùrùn lɛa. Bɛ̀ min mɛn tá doa-n kɔn ka masɛ nɛ, masɛ dɔ́ n doa-n kɔn ka ǹ dɛnaa nɛ, bɛa dɛnaa á die sii gigiã zɛnɛɛ, a giala, ka a boe la ka sii kɔ́n zɛnaa, bɛ̀ masɛ sii ná a ba a-n wa.

⁶ Bɛ̀ min mɛn ba doa-n kɔn ka masɛ-n wa, bɛa dɛnaa nə n zuĩ kanaa ka da gùrù bɛ́ lɔn, a laa. Bɛ kio, maǹ bɛa da gùrù geren lɛn goɛ ǹ nə ǹ kaa tɛ-n ǹ kũ.

⁷ Bɛ̀ ka tá doa-n kɔn ka masɛ nɛ, bɛ̀ maa boon kɛn dɔn tá ka foo ne, ka bɛ́ màn mɛn li, ka a nyankɔ, ka á re yii.

⁸ Bɛ̀ ka á sii gigiã zɛnɛɛ, ka n nyɛɛ mà ka n masɛ a kialandɛnan lɛa, bɛ lɛ n maa Díi tɔ guguru koe.

⁹ Maa Díi masɛ narɛ lɔn ke, masɛ n má ka dɔn narɛ miɛ̃. Ka giã masɛ a kɔn-narɛɛ kɛ lɛ gɔ́ɔ̃ nɛ!

¹⁰ Bɛ̀ min mɛn tá masɛ a boo sii, bɛa dɛnaa á re goɛ̃ masɛ a kɔn-narɛɛ gɔ́ɔ̃ nɛ, ka masɛ bɛ́ má maa Díi a boo si lɔn, má n giã nɛ a kɔn-narɛɛ gɔ́ɔ̃ nɛ.

¹¹ Man má bɛ pɛ ka nɛ, màn mɛn bɛ́ toɛ, nyɛnyɛɛ mɛn bɛ́ masɛ lon, bɛ goã ka dɔn lon, kaa nyɛnyɛɛ lɛ pã.

¹² Maa dí-pɛ n ka kɛ nɛ: Ka kɔn narɛ ka masɛ bɛ́ má ka dɔn narɛ lɔn.

¹³ Min na a din nyin kɔ a giaáran lɛa, kɔn-narɛɛ kɔ́n kiɛ̃ bɛ la wa.

¹⁴ Ma dí mɛn pɛ ka nɛ, bɛ̀ ka tá bɛ nyɛɛ, ka n masɛ a giaáran lɛa.

¹⁵ Ma ba ka bíi máa maa dí-nyalin doo wa, a giala, dí-nyali ba a dɛnaagiĩ a nya ǹ dí doɛ̃ wa. Má ka bíi giaáran, a giala, ma màn mɛn tumaa ma maa Díi li, má a tumaa nyaa ka nɛ.

¹⁶ Kasɛn bie ka masɛ bɔ wa, masɛ n má kasɛn bɔ, má ka dia máa ka woo, ka dí nya, kaa dí lɛ a là goã. Bɛ lɛ n toɛ, bɛ̀ ka màn woo màn nyankɔ masɛ a Díi lon ka masɛ tɔ nɛ, á re bɛ koe ka la.

¹⁷ Ma bɛ́ màn mɛn laɛ ka ganaa, ka kɔn narɛ.

Yezu a kialandɛnan bɛ́ re baa zɔ́ɔbaa mɛn yii

¹⁸ Bɛ̀ kanaa minin tá ka biɛ zɔ́ɔ, ka dɔ̃ mà maǹ nə́ masɛ baa zɔ́ɔ ka nyɛɛnɛ.

¹⁹ Bɛ̀ ka n kanaa kɛ wɔn lɛa kɛnɛn, bɛ̀ kanaa tá ka narɛ a din wɔn lɛa. Sɛnɛ, ka bie kanaa kɛ wɔn lɛa wa, masɛ din ni má ka na má ka bɔ kanaa ganaa; bɛ lɛ na á toa, kanaa minin tá ka biɛ zɔ́ɔ.

²⁰ Ma boo mɛn pɛ ka nɛ, ka n yiri koa a nɛ: «Bɛ̀rɛ a gole á la a dɛnaagiĩ-n wa.» Bɛ̀ ǹ nə́ fuu nyaa masɛ nɛ, maǹ die fuu nyɛɛ ka dɔn man miɛ̃; bɛ̀ maǹ maa boo sii, bɛ̀ ǹ tá re ka dɔn wɔ sii miɛ̃.

²¹ Maǹ die bɛ din tumaa zɛnɛɛ ka nɛ masɛ tɔ taman yii, a giala, min mɛn masɛ dia, ǹ ba bɛa dɛnaa doɛ̃ wa.

²² Bɛ̀ ma bie má daa lɛlɛ má boo da ǹ nɛ wa, bɛ̀ sii baraa ba ǹ mìi-n wa. Sɛnɛ, sisia, ǹ sii baraa kɛa sabara banban.

²³ Min mɛn bɛ́ masɛ biɛ zɔ́ɔ, bɛa dɛnaa n masɛ a Díi dɔ biɛ zɔ́ɔ.

²⁴ Siin mɛnɛn bɛ́ min kɔ́n din ná a tɔn nə ǹ miã zɛnaa duduu wa, bɛ̀ ma bie má bɛn zɛnaa ǹ bii kɛnɛn wa, bɛ̀ sii baraa ba ǹ mìi-n wa. Sɛnɛ, sisia, a laanɛ ǹ nə́ bɛa siin lɛn yɛ, maǹ wusii n tiɛ̃ la ǹ tá masɛ laanka maa Díi biɛ zɔ́ɔ.

²⁵ Boo mɛn nə n kiɛ̃ ǹ landa sɛ́wɔ nɛ, a na á kaa bɛ lɛ: «Ǹ nə́ ma baa zɔ́ɔ kooro.»

²⁶ Ma bɛ́ re n toɛ maa Díi li, ma Dɔmalɛ Wole mɛn dia ka la, Yiri Fu sonbore-pɛle kɛ lɛ boe maa Díi li, bɛ̀ bɛ lɛ daa ǹ mɛn waáraa, á die siére biɛ masɛ a lɛa.

²⁷ Ka dɔn tá re siére biɛ masɛ a lɛa, a giala, ka á kun ka masɛ nɛ, haalɛ maa siin lɛn giala kɔ waáraa.