Sii yɔrɔ-bɔlen 8 - LAWA A BOO SONBORE 2011

Sii mɛn busu Efrayimu tɔrɔn ganaa

¹ Efrayimu tɔrɔn lɛn nə́ pɛ Zediɔ̃ nɛ: «N bɛ́ woe zia biɛ Madiã minin lɛn ganaa n nə́ n ba wɔsɛn bíi wa, bɛa zɛnaa wɔsɛn nɛ miɛ̃ kɛ giala n ka wàa nɛ?» Ǹ nə́ bɛa zia da a ganaa taãn-taãnɛ.

² Zediɔ̃ tɔ́n pɛ ǹ nɛ kɛnɛn: «Masɛ n má boo la má sii mɛn zɛnaa ka kaa wɔ kɛ bɛ́ lɔn? Efrayimu minin nə sii mɛn zɛnaa, ta a na a tɛ wa, a là á gole á la wɔsɛn tanlɛ Abiezɛɛrɛ tɔrɔn kɛn wɔ nɛ.

³ Madiã kiwi a nyɛɛnaandɛnan kɛn lɛn, Orɛbu laanka Zɛbu ni, Lawa na á ǹ wɔ ka dinin gɔn. Masɛ n má boo la má sii mɛn zɛnaa ka kaa wɔ kɛ bɛ́ lɔn?» Zediɔ̃ bɛ́ á bɛa boo lɛ da ǹ nɛ, ǹ foo tɔ́n basã a wɔ paǹ li.

Zediɔ̃ zia mɛn baa Zurdɛ̃ a lɛ̀giala gɔn la

⁴ Zediɔ̃ dɔ Zurdɛ̃ tà lɛ-a, á kuru kun ka min biɛ sɔɔ kɛ lɛ nɛ, ǹ nə́ goã kun ni. A laanɛ ǹ nə́ nɔmaa, maǹ nə́ goã tɔn nə ǹ zɔ́ɔn lɛn kio.

⁵ Zediɔ̃ pɛ Sukɔti minin manɛ: «Masɛ a zia-baalin kɛn lɛn koe ma lɛ, ma ǹ ka nyankoe máa ka mɔ̀mɔ kɔn kɔ bɛn la, a giala, ǹ nə́ nɔmaa. Man Madiã kii Zebaa laanka Salmunaa kio lui.»

⁶ Sukɔti a nyɛɛnaandɛnan nə́ tɔ́n pɛ nɛ kɛnɛn: Wɔsɛn man màn-bii koe n zia-baalin lɛn la lɔn? N gɔn dɔ Zebaa lɛ laanka Salmunaa lɛ ganaa bɔrɔ ya?

⁷ Zediɔ̃ nə́ ǹ lɛ si á pɛ: «Bɛ̀ Dɛnaa Lawa Zebaa laanka Salmunaa wɔ ma gɔn ǹ mɛn pinaa, ma á re kasɛn kɛn duwii ka nyɛn nɛ, ka koronkoron nyɛndɛnaa kɛ nɛ boe don.»

⁸ Á kiɛ̃ walan, á woo Penuweli kiwi. Á boo da bɛn dɔn kiwi minin man miɛ̃. Penuweli kiwi minin dɔn ná a lɛ si ka Sukɔti minin bɛ́ ǹ nə́ goã ǹ ná a lɛ si lɔn.

⁹ Zediɔ̃ tɔ́n pɛ Penuweli kiwi minin dɔn manɛ: «Bɛ̀ masɛ nə́ n bɔyaa ka là nyantoro ne, ma á re kaa kiwi a sanabolo kɛ nyɛnɛɛ ma kaa.»

¹⁰ Zebaa laanka Salmunaa na á goã Karkɔɔrɔ kiwi kun ka ǹ zia-baalin ni. Maǹ nə́ goã min duu fulusooro kɛ miã. Lɛ̀giala gána minin lɛn zia-baalin tumaa a gialakun yii n ka bɛ nɛ. A giala, ǹ nə́ goã ǹ nə́ zia-baalin lɛn min duu paabiɛ ka fuə (120 000) dɛ, ǹ mɛnɛn bɛ́ boe zia baa la.

¹¹ Min mɛnɛn bɛ́ giɛ̃ mɔnaa kion, Zediɔ̃ bɛn zii kɛ saa, Nobaa laanka Yogboa a lɛ̀giala gɔn la. Á zia-baalin lɛn dɛ, a da yǎa ǹ dɔn yiri a sii kɔn li wa.

¹² Zebaa laanka Salmunaa nə́ n gòã da baa nɛ. Sɛnɛ, Zediɔ̃ nə́ ǹ loo, á dɔ ǹ ganaa, á ǹ kũ. Á zia-baalin lɛn tumaa kaa baa ganaa.

¹³ Zoasi a nɛgiĩ Zediɔ̃ bɛ́ boe zia la die piɛ, a na á Erɛsi kele zii saa.

¹⁴ Á Sukɔtin nɛ ten goon kũ á nɔ̀n da la. Bɛ́ Sukɔti a nyɛɛnaandɛnan laanka a min golen tɔ kiɛ̃ á kɔ la: Giĩ pɔsɔbaawensɔbaa.

¹⁵ Bɛ kio, á n bɔyaa á daa Sukɔti minin lɛn li, á pɛ ǹ nɛ: – Ka sɔ mɛn kɔ masɛ ganaa Zebaa laanka Salmunaa taman yii ka pɛ: «N minin kɛn lɛn, ǹ nə́ goã nɔmaa nɛ, wɔsɛn man màn-bii koe bɛn la lɔn, n gɔn dɔ Zebaa laanka Salmunaa lɛ ganaa bɔrɔ ya?» Zebaa laanka Salmunaa lɛ á ke.

¹⁶ Á kiwi lɛ a min golen kũ, nyɛn mɛn bɛ́ boe don, bɛ laanka koronkoron nyɛndɛnaa nɛ, á bɛn goa á sii nyaa Sukɔti minin lɛn yii ni.

¹⁷ Sanabolo mɛn bɛ́ Penuweli kiwi lɛn nɛ, á bɛ dɔ nyanaa á kaa, á kiwi minin lɛn dɛ.

¹⁸ Bɛ kio, Zediɔ̃ nɔ̀n da Zebaa laanka Salmunaa la: «Ka giĩn mɛnɛn dɛ Tabɔɔrɔ kele la, maǹ nə́ goã lɔn?» Ǹ ná a lɛ si mà maǹ nə́ bɔ a din li, mà ǹ gogoonmaa na á goã ka kii a nɛ bɛ́ lɔn.

¹⁹ Zediɔ̃ tɔ́n pɛ ǹ nɛ mà asɛ din dan nɛn manɛ. Mà Dɛnaa Lawa Yiikoonaa lɛ tɔ nɛ, mà bɛ̀ maǹ nə́ ǹ yii toa koo, mà bɛ̀ asɛ a re ǹ dɔn dii wa.

²⁰ Bɛ kio, á pɛ a nɛgiĩ goledɛnaa Yetɛɛrɛ nɛ mà yoo a ǹ dɛ. Sɛnɛ, bɛ bɛ́ ke tɔn nɛ ten lɛa, a yii wɔ á ná a gɔya sa woɛ̃ wa. A giala nyɛ́ɛ na á goã a ganaa, a nɛnyaanbaa lɛ taman yii.

²¹ Zebaa laanka Salmunaa tɔ́n pɛ Zediɔ̃ nɛ: «N dinmaa yoo n wɔ dɛ. A giala, bɛ̀ min tá giĩ lɛa, maǹ doɛ̃ a nya ǹ dí li.» Zediɔ̃ yoo á Zebaa laanka Salmunaa dɛ. Nyaǹ mànan mɛnɛn bɛ́ ǹ nyɔɔmaan bɔlɔ ganaa, á bɛn waa.

Zediɔ̃ a sii giala nyɔmiɛ̃

²² Bɛ kio, Izirayeli minin lɛn nə́ pɛ Zediɔ̃ nɛ: «N dinmaa giã wɔsɛn mìi la kii lɛa, bɛ kio, n nɛ, bɛ kio doo, n nɔ̀ɔn. A giala, n din ni n wɔsɛn si Madiã minin lɛn la.»

²³ Zediɔ̃ nə́ ǹ lɛ si: «Ma a re giɛ̃ ka mìi la kii lɛa wa, maa a nɛ dɔ a re giɛ̃ ka mìi la wa. Dɛnaa Lawa á re giɛ̃ ka mìi la.»

²⁴ Zediɔ̃ wusoo á pɛ ǹ nɛ: «Man die sii goon nyankoe ka lon: Ka bɔ zia la ka sana kaaranan mɛnɛn nɛ, didie bɛ kɔn kɔ masɛ la.» Sonbore, sana kaaranan man nə́ goã Madiã minin lɛn too ne, a giala, maǹ nə́ goã nyɔɔsɔ᷉ gána minin lɛa.

²⁵ Ǹ nə́ Zediɔ̃ lɛ si kɛnɛn: «Wɔ́ lɛ kɔ. Wɔ á re ǹ koe n la.» Ǹ nə́ mɔnaa gole bɔ ǹ nə́ nyɔmaa tán. Ǹ bɔ ka sana kaaranan mɛnɛn nɛ zia la, didie ná a wɔ bɔ á zũ la.

²⁶ Zediɔ̃ nɔ̀n da ka sana kaaranan mɛnɛn nɛ, ǹ gugurubaa dɔ kilo fuə. Ǹ nyaǹ bɔ ǹ mànan kɛn, ǹ too gɔ́ɔ̃ nɛ ǹ wɔn nɛ, Madiã kiin kɛn nə goã dɔnkɛ tã giməə mɛn we, ka mànan mɛnɛn nə goã ǹ nyɔɔmaan wìi ganaa, bɛ kɔn gòɛ̃ ba a-n wa.

²⁷ Zediɔ̃ bɛa sana lɛ saa, á màn nyín zɛnaa nɛ, á koa a kiwi Ofra. Sɛnɛ, Izirayeli min tumaa na á goã woe bɛa dí nya ǹ mɔnaa kɛ lɛ guguru koe, ǹ nə́ kɔrɔbaa zɛnɛɛ. A din lɛ dɔ na á Zediɔ̃ laanka a kion minin da sii ni.

²⁸ A saa bɛ lɛ ganaa lɔn, Madiã minin wɔ na á goã Izirayeli minin wɔ gɔ́ɔ̃ nɛ. Ǹ boo la, ǹ nə́ n mìi saa lon doo wa. Gána lɛ goã susui la lɛ̀ pusi gɔ́ɔ̃ nɛ, Zediɔ̃ a biikoo li.

²⁹ Zoasi a nɛgiĩ Zediɔ̃ wusoo á woo giã a piɛ.

³⁰ Zediɔ̃ na á nɛgiĩ pɔsɔbaa yɛ. A din a nɛ-yiin man ka bɛn nɛ, a giala, lɔ gigiã goã a lon.

³¹ A bɛ́ á goã kun ka lɔ kɔsɔ mɛn nɛ, bɛ na á goã giã-n Sisɛmu kiwi. Bɛ dɔ́ nɛgiĩ goon yɛ la, ǹ ná a tɔ kɔ, Abimelɛki.

³² Zoasi a nɛgiĩ Zediɔ̃ zizi kɔ yii-nyɛɛ gɔ́ɔ̃ nɛ, á tɔ́n gã. Ǹ nə ǹ di Zoasi gere bĩ yala mɛn nɛ, maǹ ná a dɔ gere bĩ walan Ofra kiwi, Abiezɛɛrɛ a tanlɛ minin kiwi.

³³ Zediɔ̃ a gɛ̀ kio, Izirayeli minin lɛn nə́ wusoo ǹ ná a giala kɔ ǹ nə́ kɔrɔbaa zɛnaa kun ka *Baali dìn kɛn nɛ. Dì lɛ a mɛn bɛ́ ǹ tá bíi Baali-Beriti ǹ nə́ bɛ saa, ǹ nə́ baa ǹ lawa lɛa.

³⁴ Izirayeli minin nə n yiri kɔ Dɛnaa Lawa li doo wa. A din Lawa lɛ dɔ na á goã á ǹ si ǹ zɔ́ɔn lɛn tumaa la, ǹ mɛnɛn nə goã ǹ lɛnpɛnɛ.

³⁵ Zediɔ̃ lɛ, ǹ nə́ bíi Yerubaali, a bǐɛ̃ mɛn tumaa zɛnaa Izirayeli minin manɛ, bɛn nə sii kɔn din zɛnaa a kion minin manɛ, ǹ nə́ ǹ bǐɛ̃-doɛ̃ nyaa-n wa.