Izayii 7 - LAWA A BOO SONBORE 2011

Izayii n Lawa a boo diɛ kii Ahaazi ni

¹ Oziasi a nɛgiĩ Zoatamu a nɛgiĩ Ahaazi a kiibaa biikoo li Zudaa gána nɛ, Siiriin kii Resini laanka Remalia a nɛgiĩ Izirayelin kii Pekaa daa zia baa Zeruzalɛmu ganaa. Sɛnɛ, ǹ gɔ̀lɔ̀baa yɛ wa.

² Lɛ dia dɔ Davida tɔrɔ Ahaazi ganaa, ka a kiodɛnan tumaa nɛ, mà Siirii minin nə́ wɔ Efrayimu gána nɛ. Bɛa kibərə lɛ bìn da kii laanka a zaman ganaa parsiini ka piɛ̃ bɛ́ bìn diɛ da ganaa lɔn.

³ Dɛnaa Lawa tɔ́n pɛ Izayii-n kɛnɛn: – N nɛgiĩ Seyara-Zakɔba kũ, ka wo n da Ahaazi lɛ. Á kunu mu dɔn kaaraa kɛ-a mu a baa si ǹ zii ganaa, gàra-wɔlen wuru zii la.

⁴ N die n pɛ-n kɛnɛn: «Giã kiĩ ni, n nyan nyɛ́ɛ baa wa. Resini a foo yoo ka Siirii minin laanka Remalia a nɛgiĩ a foo yoo kɛ nyan nə n gɔ̀nɔn bìn da wa. Maǹ ka tɛ n gɔn lɛ màn paa á ke lɔn tɛmaa boe.

⁵ Ma á doɛ̃ máa Siirii minin laanka Remalia a nɛgiĩ ka Efrayimu tɔrɔn kɛn man taasiɛ baraa we n wɔa paǹ li ǹ nə́ pii:

⁶ Ka wɔ n ta Zudaa gána gialaa, wɔ nyɛ́ɛ da a ganaa, màn mɛn bɛ́ toɛ a n kaa kun ka wɔ nɛ, wɔ Tabeyeli a nɛgiĩ koa kii lɛa gána lɛ mìi la.»

⁷ Sɛnɛ, á ke Dɛnaa Lawa n kɛ pii: Bɛa yɔrɔ yii duduu wa, a boe wa.

⁸ A giala, Damaasi ke Siirii a kiwi gole lɛa, Resini n kiã lɛa walan. Kànaa ka lɛ pɔsɔrɔ ka sooro, Efrayimu á re yui, a re tɔrɔ biɛ doo wa.

⁹ Samarii kɛ dɔ Efrayimu tɔrɔn kiwi gole lɛa, Remalia a nɛgiĩ sɛ n kii lɛa walan. Bɛ̀ ka n foo doa Dɛnaa Lawa ganaa wa, ka a re yii-nyɛɛ yii wa.

Lawa n Emanuwɛli a yɛ boo diɛ

¹⁰ Dɛnaa Lawa wusoo á kɛ pɛ Ahaazi ni:

¹¹ «Dɛnaa Lawa, n Lawa nyankɔ mà a sii a kɔnboe nyaa n nɛ boe geren piɛ hinlaa lon gɔ̀nɔn ganaa.»

¹² Sɛnɛ, Ahaazi ná a lɛ si kɛnɛn: «Haayii, ma a re màn kɔn nyankoe wa. Ma a re n diɛ Dɛnaa Lawa gɔ́ɔ̃ li wa.»

¹³ Izayii tɔ́n pɛ kəni: «Davida tɔrɔn lɛn, ka bǐɛ̃ kɔ ka n too kɔ! Ka n kaa zaman nɔmɛɛ, bɛa doe ka yii li wa ka n zoɛ̃ li ka maa Lawa dɔ nɔmaa?

¹⁴ Bɛ lɛ nɛ, Dɛnaa din nə die sii a kɔnboe koe ka la: Á ke, nɛnɛn tá re nɔ̀ sii, a nɛgiĩ yɛ. Á re a tɔ koe Emanuwɛli, bɛ giala mà "Lawa tá kun ka wɔ nɛ".

¹⁵ Maǹ die toe ka nàari laanka zoo nyɔɔ nɛ, yǎa a sii baraa laanka sii sonbore bɔ kɔnlɛ doɛ̃.

¹⁶ Nɛnyaan lɛ laan bɛ̀ a n sii baraa laanka sii sonbore bɔkɔnlɛ doɛ̃, kii màn paan kɛn lɛn nyɛ́ɛ diɛ n ganaa, ǹ zaman tá re ǹ gánan toɛ walan.

¹⁷ Sɛnɛ, nsɛ, Dɛnaa Lawa n die koe baraa diɛ n la, n tɔrɔn nɛ, ka n kion minin ni, koe mɛn bɛ́ a miã tɔn yɛ wa, a kũ Efrayimu gána laanka Zudaa gána a na kɔn waáraa kɛ ganaa. Koe lɛ a daa ǹ gòã n die boe Asiiriin kii li.»

Asiirii minin tá re n koe gána lɛ lɛ

¹⁸ Bɛa pinaa kɛ nɛ, Dɛnaa Lawa n die pìi pii, a nyuunun bíi Niili laanka tà a tɔ kɔnlɛ ǹ bǎã kɛ nɛ, ka zoon ne boe Asiirii gána nɛ.

¹⁹ Ǹ tá re kiɛ nyankɔrɔn kɛn nɛ kɔlɔ lɛa, gɛ̀fu yalan nɛ, tewon tumaa nɛ, ka tɔɔn buu sɔ̃ ǹ bǎã tumaa nɛ.

²⁰ Bɛa pinaa kɛ nɛ, Dɛnaa n die kùn dɔnbii Efrati tà paǹ goon minin kɛn la. Bɛ n ka Asiiriin kii ni. Á re ka ka tumaa koɛ̃, ka mìi ka nɛ, ka ka lɛtoro ka dɔ din ni.

²¹ Bɛa waáraa kəni, didie n die dii dan goon toe ka bòe màn paa nɛ.

²² Ǹ nyɔ mu n die mɔnɛɛ taãn-taãnɛ, yǎa ǹ na a nàari biɛ màn-bii lɛa. Min mɛn tumaa goã gána lɛ nɛ, bɛn tá re n dinin toe ka nàari laanka zoo nyɔɔ nɛ.

²³ Bɛa pinaa kəni, wuru mɛn bɛ́ *rezɛ̃ da duu goon (1 000) ná a nɛ, a n kɔnpii wɔrɔ we duu goon ne, ǹ tá re n la boe bɛ ganaa a nyan tewon baa.

²⁴ A nyan tewonbaa lɛ a lɛa, ǹ tá re we a nɛ, sa laanka kiɛn nə́ ǹ gɔn.

²⁵ Nyan tewonən lɛn taman yii, ǹ goã wurun mɛnɛn kɔsɛ tentenen la, min kɔn ba re n gòã diɛ walan doo wa. A n die tɔɔn buu sɔ̃ ǹ bǎãn biɛ, sèren nə tɔ wɔ a nɛ.