Izayii 34 - LAWA A BOO SONBORE 2011

Edɔmu a kiri wɔma-a

¹ Tɔrɔn lɛn, ka n mɔrɔ ka n too kɔ. Zaman, ka n too kɔ sɔnbɔraanɛ! Tán laanka a gɔ́ɔ̃gɔ́ɔ̃ ǹ mànan, ka n too kɔ! Kanaa laanka màn mɛn tumaa bɛ́ boe a nɛ, ka n too kɔ!

² Dɛnaa Lawa foo n yoo-n tɔrɔn tumaa li. A foo n yoo ne ǹ zia kurun tumaa li. A n li a ǹ tumaa bɔ̀n baa ka lenlen. A n woe ǹ ne bɔlɔ kuru ǹ bǎã nɛ.

³ Ǹ geren man tán bǎã yii ni, ǹ gìĩ n boe bǎã yii ni. Ǹ mà n baa sii kelen la ka mu zii bɛ́ lɔn.

⁴ Leere kurun kɛn man pɔpɔsɛ kiɛ. Lon nə n muni ka sɛ́wɔ bɛ́ lɔn. Lon màn tɛ-pɛle dadaran kɛn man mɛnɛɛ, ka luu gere bɛ́ boe lon mɛnɛɛ lɔn hinlaa ka da nɛ mərə bɛ́ niɛ̃ mɛnɛɛ lɔn.

⁵ Dɛnaa Lawa a gɔya sa á ke yii lon. Á ke gisĩ Edɔmu minin la, a tɔrɔ mɛn lɛ bɔ á koa ziziɛ̃ taman yii.

⁶ Dɛnaa Lawa a gɔya sa n mà lɛa, a n nyɔɔ lɛa, sère ten laanka butumun mà lɛa, sère gɔ̀lɔ̀ dɔ̀ɔ̃ koron nyɔɔ lɛa. Bosraa kiwi gole kɛ nɛ, Dɛnaa Lawa *wúlu màn yɔrɔ bɔ: Basaã gole-n Edɔmu gána wɔ lɛa.

⁷ Zùn tá re mɛnɛɛ kunun ǹ ni, dii gɔ̀lɔ̀n laanka diin nə mɛnaa kun. Mà á re baa sii tán, siĩ nyɔɔ tán si á n kɔ lɛ.

⁸ A giala Dɛnaa Lawa a dɔlɔ bɔ pinaa nɛ Edɔmu minin ganaa. *Siɔn a zia gii-dale a gɛ̀ dòo bɔ ǹ lɛ̀ nɛ.

⁹ Edɔmu a tà gòãn kɛn tá re gudɔrɔn tà biɛ. A tán kooro kɛ n die n bɔyɛɛ a kiribi tɛdɛnaa baa. Gána lɛ n die n biɛ ka gudɔrɔn bɛ́ lɔn, tɛ yoo a ganaa,

¹⁰ penleen laanka tèlò ne a re nimi wa. A n die goɛ̃ ka tɛmaa bɛ́ lɔn dii lon duduu. Bɛa gána lɛ n die diə gole biɛ yǎa duduu. Min kɔn ba re boe walan doo wa.

¹¹ Kɔlɔn laanka bàanan tá re giɛ̃ a nɛ. Á re kɔlɔ kuunun laanka zankoon giã ǹ bǎã biɛ. Dɛnaa Lawa á re gána lɛ bɔ̀n biɛ. A n die goɛ̃ ka wɔlɔ kooro á ke á goã lɔn, bɛ̀ tán ná a tɔn nə n zɛnaa wa.

¹² Min golen ba re yii ǹ kii bɔ ǹ koa wa. Kiãn tumaa á re papaɛ̃.

¹³ Nyan tewonən tá re piɛ̃ kion sonboren ne. Buu nyandɛnan laanka koronkoron tá re n koe ǹ kiwi tamaa ǹ kungɔnɔn lɛ. Á re tolokan laanka bɛndan giã ǹ bǎã biɛ.

¹⁴ Don nɔ̀ɔnɔn laanka kuruun tá re n diɛ kɔn lɛ walan. Don butumun tá re woe kɔn yiɛ walan. Màn nyín mɛn bɛ́ n bibiĩ tèlò-n, a n die bɛa giã ǹ bǎã biɛ ka a susu ǹ bǎã nɛ.

¹⁵ Kɔlɔn tá re kii doe walan, ǹ gii da, ǹ waa la, ǹ nɛn bɔ. Zèwon dɔn tá re n lɛ soekɔn walan.

¹⁶ Bɛ̀ ka n yii kɔ Dɛnaa Lawa a sɛ́wɔ kɛ nɛ, ka á re kɛa boon kɛn yii kiɛ̃ nɛ: Bɛa tɔɔn kɛn lɛn goon din fɔ̃ daa li wa. Ǹ tumaa daa sà laanka dan. A giala Dɛnaa Lawa din na á bɛa dí-pɛ kɔ ǹ la. A din yiri na á ǹ sɔkɔn.

¹⁷ A na á n pã ǹ gogoonmaa gii ganaa. Á biɛ saa, á didie a tán gii zɔ́ɔ̃. Bɛ lɛ n die ǹ wɔ biɛ yǎa duduu. A n die ǹ giã ǹ bǎã biɛ.