Izayii 22 - LAWA A BOO SONBORE 2011

Zeruzalɛmu a gɔn-waa manɛ

¹ "Sii nyaa ǹ nyankɔrɔ basa" a boo gii: Zeruzalɛmu minin lɛn, a n siɛ lɔn ka tumaa a dii kalan la?

² Zeruzalɛmu, a n siɛ lɔn bìn diɛ á boe kiwi lɛ-n kɛnɛn, mànan wuu n boe, kiwi lɛ n zɔ́n la? Zia nə n geren lɛn bii wa, ǹ bie ǹ nə́ ǹ dɛ ziabaa ǹ bǎã-n wa.

³ N sɔraasi nyɛɛnaandɛnaa tumaa baa si kun, kiɛ-bɔlen nə́ ǹ baa kòso nɛn lɛa ǹ nə́ ǹ kiɛ zũ wa. Zɔ́ɔn nə da min mɛn tumaa yaa, ǹ nə́ ǹ tumaa baa kòso nɛn lɛa kun, ǹ baa sii gɔ́ɔ̃ nɛ.

⁴ Bɛ lɛ taman yii, man pii ka nɛ: «Ka ma toa walan ma dinsɔɔ̃, ka ma toa walan ma wuu pɛ kɔsɛkɔsɛ. Maa zaman bɔ̀n baa, sɛnɛ, ka nyan pɛ mà ka n ma foo wɛɛ wa.

⁵ A giala, pelo, Dɛnaa Lawa Pàãyiidɛnaa na á koe dia wɔ la, bɔ̀n nɛ, ka yiri lɔlɔkɔn nɛ.» "Sii-nyaa ǹ nyankɔrɔ basa nɛ", kungɔn gole mɛnaa, gú diɛ lɛ n boe woe kelen la.

⁶ San laanka kiɛn man Elamu gána a zia kurun gɔn. Ziabaa ǹ wotoron laanka ǹ da baa-a wolen manə ǹ tan, ka sùidɛnan nɛ. Kiiri sɔraasin manə ǹ goóron yɔrɔ boe.

⁷ Zeruzalɛmu, n nyankɔrɔ basan kɛn tumaa piɛ̃maa-n ka n zɔ́ɔn ziabaa ǹ wotoron ne. Ǹ sùidɛnan kɛn yɔrɔ bɔmaa nɛ, maǹ doa nɛ n kiɛnlɛn lɛ-a.

⁸ Zudaa gána a tamaa-n doo wa. Bɛa pinaa lɛ nɛ, daã gɔ́ɔ̃ nɛ ǹ kion mɛn bɛ́ ka á kaa ziabaa ǹ mànan koɛ a nɛ ka n ká n yiin doa bɛ la.

⁹ Kungɔn mɛn bɛ́ "Davida a kiwi" lɛ lɛnpɛnɛ, ka bɛa yuin kɛn yɛ, ǹ nə́ goã mɔnaa nɛ, ka mu tamaa tán nɛ a mu dɔǹ kɛ nɛ,

¹⁰ ka n ká Zeruzalɛmu a kionən nimi, ka kionən wuru màn mɛn bɛ́ toɛ, ka màn da kiwi tamaa ǹ kungɔn kɛ pàã li.

¹¹ Ká mu tamaa ǹ bǎã zɛnaa, kungɔn màn paa lɛ bii ni, mu tamaa ǹ bǎã zizi lɛ a mu taman yii. Sɛnɛ, siin lɛn bɛ́ boe min mɛn li, ka n yɔrɔ dia bɛa dɛnaa lɛ la wa. A nə ǹ yɔrɔ boe haalɛ bibi, sɛnɛ, ka ǹ baa sii lɛa wa.

¹² Bɛa pinaa kɛ nɛ, Dɛnaa Lawa Pàãyiidɛnaa na á goã li mà ka wuu pɛ, ka n lɛ dɛ, ka n mìi kɔɔ̃, ka gɛ̀ koa ǹ mɔnaan wɔ.

¹³ Sɛnɛ, ka n ka goã nyɛnyɛɛ laanka foo kɔɔ̃nbaa la. Minin man diin dii, ǹ sèren dɛ. Maǹ siĩ soɛ̃, ǹ duvɛ̃ mi. Ka n pii: «Wɔ n màn bii wɔ màn mi a giala, biɛ̃ wɔ n die giɛ̃!»

¹⁴ Sɛnɛ, Dɛnaa Lawa Pàãyiidɛnaa boo durii kɛ pɛ ma nɛ: «Ma nə n liɛ, ma a sii baraa kɛ toɛ ka-n duduu kaa yiikoonaabaa gɔ́ɔ̃-n wa.» Dɛnaa Lawa Pàãyiidɛnaa na á pɛ kɛnɛn.

Sebumaa a gɔn waa manɛ

¹⁵ Dɛnaa Lawa Pàãyiidɛnaa pɛ ma nɛ: – Wo Sebumaa li, asɛ mɛn bɛ́ kii a sumu mìi la, n pɛ nɛ:

¹⁶ «Wàa mɛn nə kànaa n wɔ lɛa? N dɔɔ̃n kɔ́n tá kànaa? A n siɛ lɔn kəni n tá yala foɛ̃ kànaa. Ń sɛlɛ kelen mìin ni. Ń susu ǹ bǎã fɔ̃ gɛ̀fu kɛ nɛ n wɔ lɛa.

¹⁷ Á ke Dɛnaa Lawa á re n zuĩ sɔsɔɔ. Á re n kuĩ kaka,

¹⁸ a tɔn wo n birikəə̃ tán ka guruguru bɛ́ lɔn gána gole kɔn nɛ. Nsɛ mɛn bɛ́ sìi diɛ n mìinaa a kion ganaa, n tá re giɛ̃ walan, ka n ziabaa ǹ wotoro sonboren kɛn nɛ!

¹⁹ Dɛnaa pɛ: Ma á re n lui ma n bɔ n dí lɛ la, ma n loo ma n bɔ n giã ǹ bǎã nɛ.

²⁰ Bɛa pinaa, ma á re lɛ diɛ maa dí-nyali Ilkia a nɛgiĩ Eliyakimu la.

²¹ Ma á re n mɔnaan we a ganaa, ma n maabɛlɛ kɛ da a binbin ni. Ma á re n pàã kɛ koe la. Á re Zeruzalɛmu min tumaa a díi biɛ, ka Zudaa gána wɔn nɛ.

²² Ma á re Davida a kion a goo nɛ koe la. Bɛ̀ á bũ, min kɔn ba boe la a tã wa, bɛ̀ á tã, min kɔn ba boe la a bũ wa.

²³ Man die a gòã we tán parsiini, ka yirəə bɛ́ lɔn. Á re gugurubaa koe a díi a sumu la.»

²⁴ A sumu minin mɛnɛn wɔlɔ bɛ́ kunu ka ǹ mɛnɛn wɔlɔ bɛ́ sɔsɔɔ, ǹ tumaa n die n parɛɛ a ganaa, ka n bɛ́ bɔnaa loɛ yirəə ganaa lɔn.

²⁵ Bɛa pinaa kɛ nɛ yirəə lɛ á re yiɛ, Dɛnaa Lawa Pàãyiidɛnaa a da ǹ boo ne. A da yaa, a na á n wɔ tán bǎã kaka nɛ. Á re yiɛ a mɛnaa. Guĩ mɛn tumaa bɛ́ a ganaa, á re bɛ tumaa sàabiɛ kəni a giala Dɛnaa Lawa na á boo da.