Izayii 21 - LAWA A BOO SONBORE 2011

Baabilonii a nya

¹ Diə gole mɛn bɛ́ kunu yìsi mu ganaa, bɛa boo gii: Zɔ́ɔ n boe diə gole ne. Gána mɛn bɛ́ nyɛ́ɛ diɛ, a n boe walan. A n ka piɛ̃ gole bɛ́ lɔn, boe Negɛvu gána nɛ.

² Dɛnaa Lawa n kaãbaa sii nyɛɛ ma nɛ: Giaára zizi nə́ n bɔyaa á tenten baa, ziziɛ̃ wole n ziziɛ̃ we woe-n nyɛɛnɛ. Elamu minin, ka yoo ǹ gialaa! Mɛdi gána minin, ka ǹ kiwi lɛ lɛnpɛnɛ! Man die ginii kɛ tumaa lɛ kuri.

³ Bɛ lɛ nɛ, ma kii á busi, ma nɔmaa maa nɛ, ka lɔ bɛ́ lɔn nɔɔrɔ koe. Là paparɛɛ la ma yii ni ma too a màn kɔn miɛ wa, nyɛ́ɛ la ma yii ni ma yii a màn kɔn yii wa.

⁴ Ma yiri yoo, nyɛ́ɛ n ma gɔ̀nɔn bìn diɛ. Ma nə n yii diɛ wasamiɛ̃n la, ma boo la man susu, sɛnɛ, tèlò-n, nyɛ́ɛbaa n ma ganaa.

⁵ Màn-bii nə́ n zɛnaa, nyaǹ mɔnaan nə́ n naa tán, minin man màn bii, ǹ nə́ màn mii. Bǎã goon ne, min nə́ n lɛ dɛ: «Sɔraasi nyɛɛnaandɛnan lɛn, ka yoo. Ka kaa ziabaa ǹ mànan yɔrɔ bɔ!»

⁶ Dɛnaa na á kɛ pɛ ma nɛ: Woo, n wɔlɔ-lɛduə̃li koa. Bɛ̀ á màn mɛn yɛ, á re bɛ pii.

⁷ Bɛ̀ á sùi màn paa yɛ ziabaa ǹ wotoro goon baɛ̃, bɛ̀ á sùidɛnan yɛ dundunun la, hinlaa nyɔɔmaan la, a doamaa nɛ a yiri bɔ, a yiri bɔ parsiini.

⁸ Bǎã-lɛduə̃li lɛ paraa ka yàra bɛ́ lɔn: Mìinaa, man giã-n bǎã lɛduə̃ ǹ bǎã lɛ nɛ, lɛawaa tumaa gɔ́ɔ̃ nɛ, man bǎã lɛduə̃ ǹ bǎã lɛ nɛ ka tèlò tumaa nɛ.

⁹ Ka ga, min nə́ ke yii die: A n giã-n ziabaa ǹ wotoro la, sùi màn paa n baɛ̃. A nə n lɛ dii á n pii: «*Baabilonii mɛnaa! Baabilonii mɛnaa! A dì nyínin kɛn, bɛn nə́ yɔyɔrɛ tán!»

¹⁰ Maa zaman, ǹ nə nsɛ mɛn duwəə ka n bɛ́ *belee duwii lɔn, ma doroo mɛn yɛ boe Dɛnaa Lawa Pàãyidɛnaa, Izirayeli a Lawa li, bɛ n ka kɛ nɛ. Bɛ n kibərə lɛa, man pii n ni.

Edɔmu minin gɔn waa manɛ

¹¹ Duumaa a boo gii. Lɛ-dɛ n boe Seyiri a n pii: «Wɔlɔ-lɛduə̃li, ma n wàa boo diɛ tèlò paǹ li?» «Wɔlɔ-lɛduə̃li, ma n wàa boo diɛ tèlò paǹ li?»

¹² Wɔlɔ-lɛduə̃li lɛ ná a lɛ si, á pɛ: «Lɛ̀ n wɛɛ, sɛnɛ tèlò n tɔn a tan. Bɛ̀ ka á li ka wusoo ka da nɔ̀n da, ka wusoo ka da biikoo kɔsɔ li doo!»

Larabun gána a gɔn waa manɛ

¹³ Larabun gána a boo gii: Dedan a diə gole zii tɔ-wɔlen lɛn, ka á re lɛ̀ wɛɛ Larabun gána-n don.

¹⁴ Kasɛn mɛnɛn dɔn bɛ́ giã-n Temaa kiwi, mu boro bɛ́ min mɛnɛn ganaa, ka wo mu kɔ bɛn la, ka màn-bii kɔ baa-silin kɛn la.

¹⁵ Minin manɛ, ǹ nə́ baa si zia nyɛɛnɛ, gɔya sa lɛ-bɔlen ne, sa dii wolen kɛn nɛ, zia a wɔ̃ taman yii.

¹⁶ A giala Dɛnaa boo mɛn pɛ ma nɛ á ke: «Kànaa ka lɛ̀ goon ka te, Kedaara a yii gugurubaa kɛ tumaa á re nyɛɛ.

¹⁷ A kiɛ-bɔlen zanbian mɛnɛn bɛ́ re goɛ̃ Kedaara a nɛnyaanan bii, ǹ ba re tɛ koe wa.» Dɛnaa Lawa, Izirayeli a Lawa boo mɛn pɛ, bɛ n ka kɛ nɛ.