Ɛsidrasi 4 - LAWA A BOO SONBORE 2011

Dɛnaa Lawa a kion a dí golee kɔ

¹ Zudaa tɔrɔn laanka Bɛnzamɛn tɔrɔn zɔ́ɔn bɛ́, ǹ nə́ ma, mà bɔ bɛ̀rɛbaa ǹ bǎã wolen lɛn tá a gialaa guguru kɔ ǹ kion doe koe Izirayeli a Lawa, Dɛnaa Lawa la,

² ǹ nə́ n zɔ̃ ǹ nə́ dɔ Zorobabeli laanka a kɛdɛnan li, ǹ nə́ pɛ ǹ nɛ kɛnɛn: «Wɔsɛn man giɛ li wɔ kion lɛ dɔ kun ka nɛ. Sonbore, wɔsɛn man giɛ Lawa li, ka dinin Lawa lɛ, ka ka dɔn bɛ́ giɛ li lɔn. A kũ Asiirii gána a kii Asaradɔn a biikoo ganaa, kɛ lɛ á daa ka wɔsɛn nɛ kànaa, wɔsɛn man wúlu-mànan koe ka dinin Lawa lɛ la.»

³ Sɛnɛ, Zorobabeli ni, Zozoe ne, ka Izirayeli a kɛdɛnan lɛn gialakunun ni, bɛn nə́ pɛ ǹ nɛ kɛnɛn: «A kɔnbɔ, ka laanka wɔsɛn nə kion dɔ kun wɔa Lawa wɔ lɛa wa. Wɔ dininsɔɔ̃nɔn doamaa nɛ wɔ kion dɔ Izirayeli a Lawa, Dɛnaa Lawa lɛ wɔ lɛa, ka Pɛrsi gána a kii Siirusu pɛ wɔsɛn man lɔn.»

⁴ Bɛ kio, gána lɛ a minin lɛn nə́ Zudaa tɔrɔn lɛn gù dɛ, ǹ nə́ nyɛ́ɛ da ǹ ganaa, màn mɛn bɛ́ toɛ, ǹ golee ka Lawa a kion lɛ a dɔ nɛ.

⁵ Ka bɛ dɔ nɛ, ǹ nə́ yiri kɔ minin la wolen lɛ pii, ǹ nə́ ǹ kaa Zudaa tɔrɔn lɛn ganaa, màn mɛn bɛ́ toɛ, ǹ nə ǹ dí lɛ ziziɛ̃. Bɛ na á goã miɛ̃ Pɛrsi gána a kii Siirusu a biikoo tumaa gɔ́ɔ̃ nɛ, á daa dɔ Pɛrsi gána a kii Dariusu a kiibaa biikoo ganaa.

Zɔ́ɔn man Zuifun zɛrɛ biɛ

⁶ Zɛrzɛsi a kiibaa waáraa, a kiibaa lɛ a giala kɔ li, minin mɛnɛn bɛ́ giã-n Zudaa laanka Zeruzalɛmu ni, zɔ́ɔn lɛn nə́ sɛ́wɔ kiɛ̃ ǹ nə́ zɛ̀rɛ koa ǹ ganaa.

⁷ Artagizɛrɛsɛɛsi a kiibaa biikoo li, Bisilamu ni, Mitredaati ni, Taveeli ni, ka ǹ dinin miãn kɔsɔn nɛ, ǹ nə́ sɛ́wɔ kiɛ̃, ǹ nə́ dia Pɛrsi gána a kii Artagizɛrɛsɛɛsi la. Maǹ nə́ sɛ́wɔ lɛ kiɛ̃ ka Aramu sɛ́wɔ nɛn nɛ, ka Aramu bɔlɔ dɔ nɛ.

⁸ Kii kiodɛnaa Rewumu laanka sɛ́wɔ-kiɛ̃li Simusayii sɛ́wɔ mɛn kiɛ̃ Zeruzalɛmu wɔ paǹ li, ǹ nə́ dia kii Artagizɛrɛsɛɛsi la. Min mɛnɛn nə bɛa sɛ́wɔ lɛ kiɛ̃, ǹ nə́ ke:

⁹ Kii kiodɛnaa Rewumu ni, sɛ́wɔ-kiɛ̃li Simusayii ni, ǹ miã gialakunun ni, Dɛn kiwi minin ni, Afarsataaki kiwi minin ni, Tarpɛli kiwi minin ni, Afarasi kiwi minin ni, Uruku kiwi minin ni, *Baabilonii gána minin ni, Suuzi kiwi minin ni, Deya kiwi minin ni, Elamu kiwi minin ni,

¹⁰ ka tɔrɔ gialakunun kɛn nɛ, Asinaapaara yii guguru-a gole kɛ nə́ ǹ goa á woo ǹ kaa Samarii gána a kiwin kɛn nɛ, ka bǎã kɔsɔn dɔn nɛ, Efrati tà kɛ a lɛ̀nyɛɛn gɔn la, mà ǹ giã walan.

¹¹ Ǹ sɛ́wɔ mɛn lɛ dia la, a boo á ke: «Kii Artagizɛrɛsɛɛsi, ǹ dí-nyalin kɛn Efrati tà a lɛ̀nyɛɛn gɔn la, bɛn man kɛ koe n la.

¹² Wɔ doamaa nɛ, wɔ a boo da n nɛ kii. Zuifun mɛnɛn nə n toa n li, ǹ nə́ daa dɔ wɔ bii Zeruzalɛmu, ǹ tá a gialaa kiwi piã-wɔle, kakaarɛ lɛ doe, ǹ ná a kungɔnun zɛnɛɛ ka a giala wɔ ǹ bǎã nɛ.

¹³ Kii, wɔ n pii n ni, bɛ̀ kiwi lɛ nə́ n dɔ, a kungɔnun nə́ n zɛnaa ǹ nə́ nya, a minin ba re nyin giɔ̀mɔ sarɛɛ doo wa, ǹ ba re wusuru sarɛɛ doo wa, ǹ ba re wusuru sarɛɛ zii tɔ wɔ ǹ wɔ lɛa doo wa, bɛ n nɔmiɛ̃ a màn pɔrɔ kii gɔn màn ganaa.

¹⁴ Bɛ lɛ n ke, wɔa wɔ bɛ́ nə n wɔ gɔ́ɔ̃ nɛ, wɔ bɛ́ wɔ ba li, wáa minin nə yaa wɔ n ganaa wa, wɔ n boon kɛn lɛn diɛ n la,

¹⁵ màn mɛn bɛ́ toɛ, ǹ sii gɔsɛ ǹ ga a woo ǹ bǎã li, n din digolon boo zizin sɛ́wɔ kɛ nɛ. Bɛa sɛ́wɔ lɛ nɛ, n tá re yii, mà kiwi kɛ lɛ n kiwi piã-wɔle lɛa, kiin laanka gána a bǎãn sii ziziɛ̃. A kũ biikoo sɔsɔɔ ganaa, maǹ gòãn dii ǹ siin zɛnɛɛ a nɛ. Bɛ lɛ nɛ ǹ nə́ bɛa kiwi kɛ lɛ yu, ǹ nə́ ziziɛ̃.

¹⁶ Wɔ n pii n ni kii, bɛ̀ kiwi kɛ wusoo á n dɔ, a kungɔnun nə́ n zɛnaa ǹ nə́ nya, bɛ lɛ din nə die toɛ n nə́ n ba re bǎã yii Efrati tà kɛ a lɛ̀nyɛɛn gɔn la doo wa.»

Kii nə́ ǹ lɛ si

¹⁷ Kii lɛ tɔ́n sɛ́wɔ kɛ dia a binyəə lɛa: «Kii kiodɛnaa Rewumu, sɛ́wɔ-kiɛ̃li Simusayii, ka ǹ miã gialakunun mɛnɛn bɛ́ giã-n Samarii kiwi, ka Efrati tà a lɛ̀nyɛɛn gɔn la a bǎã gialakun ni, ka fòo.

¹⁸ Ka sɛ́wɔ mɛn dia ma la, ǹ nə́ kɔ a boo lɛ ǹ nə́ pɛ foaãnɛ ma yɔrɔ-a.

¹⁹ Má pɛ máa ǹ sii lɛ gɔsɛ ǹ ga a woo ǹ bǎã li. Ǹ nə́ yɛ, mà a kũ biikoo sɔsɔɔ ganaa, mà kiwi kɛ lɛ n yui kiin gialaa, mà a dí n ka gòãn-dii ni.

²⁰ Kiin nə́ yɛ Zeruzalɛmu, pàã nə́ ǹ lon, ǹ nə́ lɛ̀nyɛɛn gɔn la a bǎã kɛ tumaa da ǹ pàã giulun, maǹ nə́ goã nyin giɔ̀mɔ sarɛɛ, wusuru ni, ka zii tɔ wɔ ǹ wusuru ni.

²¹ Sisia, ka pɛ mà ǹ bɛa minin kɛn lɛn dí lɛ kurəə, kiwi lɛ baran toa a n dɔ doo wa, yǎa ma din zii koe.

²² Ka yiri bɔ ka dinin li, ka baran sii kɛ lɛ da ka gɔn dɔ̀ɔ̃-a wa, màn mɛn bɛ́ toɛ, màn baran mɛ sii lɛ a basaãbaa li, a kiin lɛn wɔ ziziɛ̃ wa.»

²³ Ǹ bɛ́ ǹ nə́ kii Artagizɛrɛsɛɛsi a sɛ́wɔ lɛ pɛ Rewumu yɔrɔ-a, ka sɛ́wɔ-kiɛ̃li Simusayii ni, ka ǹ miãn lɛn nɛ, ǹ nə́ n nanaa, ǹ nə́ woo Zuifun lɛn li Zeruzalɛmu, ǹ nə́ pàã nyaa ǹ nɛ, ǹ nə́ ǹ kurəə dí lɛ a nyɛɛ ganaa ka pàã nɛ.

²⁴ Bɛ na á n baa Lawa a kion lɛ a dí a golee lɛa Zeruzalɛmu. Bɛa dí a golee lɛ belebɔ, yǎa á woo dɔ Pɛrsi gána a kii Dariusu a kiibaa lɛ̀ paabaa ǹ wɔ ganaa.