Bɔ bɛ̀rɛbaa nɛ 9 - LAWA A BOO SONBORE 2011

(5) Tɔɔn busu baraa

¹ Dɛnaa pɛ Muizu-n doo: – Wo wɔ *Faarahɔn li, n pɛ nɛ: «Dɛnaa lɛ, Ebrəən Lawa lɛa, a n pii: Toa maa zaman lɛ soo, a wo dí nya masɛ nɛ.

² Bɛ̀ n tá tɔn nə n piɛ̃ ka maa zaman lɛ a toa walan boo ne, bɛ̀ n tá tɔn nə n gɔn parɛɛ ǹ ganaa,

³ masɛ Dɛnaa á re n tɔɔn dii, n sùin ni, n dundunun ni, n nyɔɔmaan nɛ, n diin ni, n sèren ne ka n bòen ne. Man die zɛnɛɛ ka tɔɔn busu babaraa nɛ.

⁴ Masɛ Dɛnaa á re bɔkɔnlɛ we Izirayeli nɛnyaanan tɔɔn laanka Ezipti gána minin wɔn bii ni. Màn ba re giɛ̃ Izirayeli nɛnyaanan wɔn bii wa.»

⁵ Dɛnaa din biikoo bɔ á koa á pɛ: «Biɛ̃ Dɛnaa á re bɛ zɛnɛɛ gána lɛ nɛ.»

⁶ A lɛawaa sonbore, Dɛnaa sii lɛ zɛnaa miɛ̃. Ezipti gána minin tɔɔn tumaa gã, sɛnɛ, tɔɔ goon toto din gã Izirayeli nɛnyaanan wɔn bii wa.

⁷ Faarahɔn minin dia ǹ nə́ woo ga, Izirayeli nɛnyanan tɔɔ goon din gã wa. Sɛnɛ, Faarahɔn too goã a kakabaa gɔ́ɔ̃ nɛ, a toa zaman lɛ soo á woo wa.

(6) Boreen bɔ minin ganaa boo

⁸ Dɛnaa pɛ Muizu laanka Aarɔn nɛ: «Ka kùsì tiriki wùsu gɔn yii paa bɔ, Muizu die a zũ lon Faarahɔn yɔrɔ-a.

⁹ Bɛa wùsu kɛ lɛ bɛ́ re n diɛ wɔlɔ la Ezipti gána paǹ yii-n ke, a n die boreen boe minbuiinin laanka tɔɔn ganaa, ǹ tá re n lɛ boe ǹ baayɛrɛn baa.»

¹⁰ Ǹ nə́ kùsì tiriki wùsu lɛ bɔ, ǹ nə́ golee Faarahɔn yɔrɔ-a, Muizu zũ lon. Á boreen bɔ minbuiinin laanka tɔɔn ganaa, ǹ nə́ puru ǹ nə́ baayɛrɛn baa.

¹¹ Boreen lɛn lɛa, kɔ́lɔnbaalin kɛn nə boo la, ǹ nə́ golee masɛ Muizu yɔrɔ-a wa, a giala, boreen man nə́ goã ǹ dininmaan laanka gána minin lɛn tumaa ganaa.

¹² Sɛnɛ, Dɛnaa toa Faarahɔn too kaka kɔ, a n too kɔ ma laanka Aarɔn lon wa, ka Dɛnaa din bɛ́ á goã á pɛ masɛ Muizu-n lɔn.

(7) La gii a daa

¹³ Dɛnaa pɛ Muizu-n kɛnɛn doo: – Yoo baayɛlɛ yiisoo, n wo Faarahɔn yɔrɔ-a, n pɛ nɛ: Dɛnaa lɛ, Ebrəən Lawa lɛa, bɛ n pii: «Toa maa zaman lɛ soo a wo dí nya ma nɛ.

¹⁴ A giala, kanna kəni, man die maa dɔlɔ siin lɛn tumaa yɔrɔ diɛ n dinmaa dɔ la, ka n kiodɛnan nɛ, ka n gána minin ni, màn mɛn bɛ́ toɛ, n dɔ̃ mà min kɔ́n ba tán la, á n zoɛ̃ kɔn ka masɛ Lawa-n wa.

¹⁵ Bɛ̀ man má toa ma gɔn yoo, bɛ̀ má n dɛ ka piɛ̃ busu baraa kɛ nɛ, n din ni ka n gána minin ni, bɛ̀ ka a kanaa doo wa.

¹⁶ Sɛnɛ, n toa walan mìi á ke: Man pàã nyaa n nɛ, màn mɛn bɛ́ toɛ, ǹ ma tɔ laakalaa kanaa paǹ tumaa nɛ.

¹⁷ N nə n tɔn nə n laɛ, n piɛ̃ ka maa zaman lɛ a soo a woo ne.

¹⁸ Biɛ̃ kɛnɛn yirəə, man die la gii baraa kiɛ ka gɔn kɔ́n nɛ, a kũ Ezipti gána lɛ a giala kɔ ganaa a da pelo yaa, bɛ miã tɔn nə n zɛnaa wa.

¹⁹ Kanna kəni, minin dia ǹ wo n tɔɔn kaa duru ǹ bǎã nɛ, ka n don gɔ́ɔ̃ ǹ mànan tumaa nɛ. Minbuiinin laanka tɔɔn mɛnɛn bɛ́ re goɛ̃ don, ǹ nə́ n ba re goɛ̃ da piɛ wolen lɛa wa, la gii n die kiɛ bɛn la, ǹ gã.»

²⁰ Faarahɔn din a kiodɛnan lɛn bii, ǹ mɛn nyɛ́ɛ baa Dɛnaa a boo lɛ nɛ, bɛ ná a dí-nyalin laanka a tɔɔn kaa kionən ne.

²¹ Ǹ mɛn bɛ́ a Dɛnaa a boo lɛ si parsii boo lɛa wa, bɛ na a dí-nyalin laanka a tɔɔn kaa kion wa.

²² Dɛnaa pɛ Muizu-n kəni: «N gɔn saa lon, màn mɛn bɛ́ toɛ, la gii kaa màn tumaa la Ezipti gána kɛ nɛ, a minbuiinin ni, a tɔɔn nɛ ka a màn-kɔsiɛ din tumaa nɛ.»

²³ A ná a bàlà lɛ saa lon, yǎa Dɛnaa zii kɔ la a ginii laanka la gii la. La a paraa daa yǎa tán, Dɛnaa la gii kaa Ezipti gána la.

²⁴ La gii n kiɛ, la a paraa n we li, a baraa kɔ ka yɔrɔ mɛn nɛ, Ezipti gána tɔn na a miã yɛ wa, a kũ a gánabaa giala kɔ ganaa.

²⁵ Ezipti gána lɛ paǹ tumaa nɛ, la gii lɛ don mànan tumaa dɛ, minbuiinin ni ka tɔɔn nɛ, la gii lɛ tán màn-kɔsiɛ tumaa dɛ, ka dan tumaa nɛ.

²⁶ La gii lɛ na a kaa Gosɛnɛ bǎã dinsɔɔ̃-n wa, Izirayeli nɛnyaanan man nə́ goã walan.

²⁷ Faarahɔn minin dia lɛ diɛ Muizu laanka Aarɔn la, á pɛ ǹ nɛ: «Kanna kəni, má sii baraa zɛnaa. Dɛnaa Lawa din nə pepere. Ma laanka maa gána minin man zɛ̀rɛdɛnan lɛa.

²⁸ Ka Dɛnaa lɛ nyankɔ. La a paraa lɛ laanka la gii lɛ la yii ni. Ma á re toɛ ka woo, ka a re beleboe kànaa doo wa.»

²⁹ Muizu pɛ nɛ: «Bɛ̀ ma soo kiwi lɛ lɛ-a lɔn gɔrɔ, ma á re n gɔnɔn goɛ lon, ma gòã-kũ da Dɛnaa ganaa. La a paraa lɛ á re golee, la gii a re kiɛ doo wa, màn mɛn bɛ́ toɛ, n dɔ̃ mà tán kɛ lɛ n Dɛnaa wɔ lɛa.

³⁰ Sɛnɛ, ma á doɛ̃, máa n laanka n kiodɛnan nɛ, máa ka tɔn nyɛ́ɛ baa Dɛnaa Lawa-n bɔrɔ wa.»

³¹ Buu laanka mìi goã màn-kɔsiɛ mɛn tumaa ganaa bɛa biikoo lɛ li, bɛ tumaa ziziɛ̃.

³² Màn-kɔsiɛn mɛnɛn bɛ́ nyɔɔbiɛ, bɛn nə́ ziziɛ̃ wa.

³³ Muizu soo á n bɔ Faarahɔn li, á n bɔ kiwi lɛ dɔ gɔ́ɔ̃ nɛ, á n gɔnɔn goa lon, á gòã-kũ da Dɛnaa ganaa. La a paraa laanka la gii lɛ golee. La lɛ dɔ kaa doo wa.

³⁴ Faarahɔn bɛ́ á yɛ mà la lɛ golee, ka la a paraa nɛ ka la gii kɛ dɔ nɛ, a laanka a kiodɛnan nə́ n too kaka kɔ doo, á wusoo á baraa zɛnaa.

³⁵ Faarahɔn too lɛ goã kaka miɛ̃, a toa Izirayeli nɛnyaanan lɛn nə soo ǹ nə́ woo wa, ka Dɛnaa din bɛ́ á goã, á pɛ Muizu-n lɔn.