Bɔ bɛ̀rɛbaa nɛ 5 - LAWA A BOO SONBORE 2011

Muizu laanka Aarɔn a wo Faarahɔn li

¹ Bɛ kio, Muizu laanka Aarɔn daa pɛ *Faarahɔn nɛ: – Dɛnaa lɛ, Izirayeli nɛnyaanan Lawa lɛa, bɛ n kɛ pii: «Toa maa zaman soo, ǹ zii tɔ wɔ don bii, ǹ zɔ́n zɛnaa masɛ a lɛa.»

² Faarahɔn pɛ: «Dɛnaa lɛ n die lɛa, ma tɔn nə n too kɔ a boo ganaa, ma toa Izirayeli nɛnyaanan nə woo? Ma a Dɛnaa doɛ̃ wa, ma a toɛ Izirayeli nɛnyaanan nə woo wa.»

³ Ǹ nə́ pɛ-n kɛnɛn: «Ebrəən Lawa lɛ na á n din nyaa wɔsɛn manɛ, wɔ doamaa nɛ wɔ lɛawaa sɔɔ zii tɔ wɔ don bii, wɔ *wúlu màn bɔ wɔ kɔ wɔa Dɛnaa Lawa la. Bɛ bie wa a tɔn toa piɛ̃ busu, hinlaa zia da bɔ̀n da wɔ ganaa kooro.»

⁴ Ezipti gána a kii lɛ pɛ ǹ nɛ: «Muizu laanka Aarɔn, wàa na á baa ka n giɛ li, ka zaman lɛ bɔ ǹ dí ni? Ka wusoo ka wo kaa dí nya!

⁵ Ebrəən lɛn bɛ́ ǹ nə́ mɔnaa kanna, ka n giɛ li, ka ǹ dí kɛ a nyɛɛ sàabaa kənlə!»

Faarahɔn màn da Izirayeli nɛnyaanan dí li

⁶ Bɛa pinaa lɛ nɛ, Faarahɔn pɛ dí mìilandɛnan kɛn manɛ, Ezipti minin lɛa, ka zaman-lɛduə̃lin kɛn nɛ, Izirayeli minin lɛa:

⁷ «Ka baran buu kɔ zaman lɛ la doo, ka lɛlɛ bɛ́ lɔn, ǹ toopaa bɔ-n wa. Ka ǹ toa ǹ dinin nə wo buu goa.

⁸ Ǹ da ǹ mìi-n dɔn, ǹ bɛ́ toopaa lɛ mɛn boe lɛlɛ, ǹ bɛ lɛ bɔ, ǹ baran toa ǹ màn bɔ lɛ wa. Yoo-baalin manɛ, bɛ lɛ nɛ ǹ tá n lɛ dii, mà maǹ woe wúlu màn boe koe Lawa la.

⁹ Nɔmaa n siĩni a minin kɛn bɔ taãn-taãnɛ, ǹ dí nya bɛ̀ ǹ nə́ ǹ ba n yiri koɛ soɛ boo-n wa.»

¹⁰ Dí mìilandɛnan laanka zaman-lɛduə̃lin lɛn nə́ soo, ǹ nə́ pɛ zaman lɛ-n kɛnɛn: «Faarahɔn pɛ, mà asɛ a buu koe ka la doo wa.

¹¹ Mà ka dinin nə ga bɛ̀ ka tá buu yii maa, ka wo goa. Sɛnɛ, mà màn kɔ́n dɔ nə n bɔ kaa dí lɛ wa dɛ.»

¹² Zaman lɛ nə́ n pɛsɛ̃ Ezipti gána paǹ tumaa ganaa, ǹ nə́ ǹ tii ma ǹ buu lɛ goɛ.

¹³ Dí mìilandɛnan lɛn man nə́ goã ǹ yii woɛ̃ mà ǹ nə ǹ dí nyɔmɔɔ! Lɛ mɛn nə n pɛ, mà ǹ bɛ yɛ baraabaraa, ka buu kɔ ǹ la biikoo wɔ lɛ bɛ́ lɔn.

¹⁴ Faarahɔn a dí mìilandɛnan lɛn nə zaman-lɛduə̃lin mɛnɛn bɔ, ǹ nə́ ǹ koa Izirayeli nyɛnaanan mìi la, ǹ nə́ bɛn dɛ, mà wàa na á baa, ǹ gunun dí laanka pelo wɔ a toopaa lɛ dɔ lɛlɛ wɔ li wa?

¹⁵ Izirayeli nɛnyaanan-lɛduə̃lin lɛn nə́ daa ǹ busii pɛ Faarahɔn nɛ kɛnɛn: «Pàãma, wàa na á baa n tá kɛ zɛnɛɛ wɔsɛn manɛ?

¹⁶ Ka a buu koe wɔ la doo wa, ka n pii dɔn mà wɔ toopaa bɔ. Á ke, maǹ wɔ dii dɔn. Sonbore ba n gána minin lɛn lon wa.»

¹⁷ Kii lɛ pɛ ǹ nɛ kɛnɛn: «Ka n yoo-baalin lɛa taãn-taãnɛ! Bɛ lɛ nɛ ka á pii mà ka n woe wúlu màn boe koe Lawa la.

¹⁸ Kanna kəni, ka wo dí nya. Ǹ ba re buu koe ka la wa, sɛnɛ, ka n die lɛlɛ a toopaa lɛ lɛ dɔ boe.»

¹⁹ Izirayeli nɛnyaanan-lɛduə̃lin lɛn nə́ dɔ̃, mà sii lɛ kɔsɛ ǹsɛn ganaa, a giala, maǹ nə́ pɛ ǹ nɛ mà ǹ baran màn bɔ ǹ toopaa lɛ lɛ wa, mà lɛ mɛn nə n pɛ ǹ nɛ, mà ǹ bɛ lɛ bɔ baraabaraa.

²⁰ Ǹ bɛ́ ǹ nə́ soo Faarahɔn li, ǹ nə́ daa Muizu laanka Aarɔn li fufuu, ǹ nə́ daa bɛn yaa n yii diɛ ǹ la.

²¹ Ǹ nə́ pɛ ǹ nɛ kɛnɛn: «Dɛnaa din ga kɛ ganaa, a kiri kuru ka la. Ka dinin lɛa nɛ, wɔsɛn tìĩ bɔ Faarahɔn laanka a dí-nyalin nyin ni. Ka n ka gɔya wɔ ǹ gɔn, mà ǹ wɔ dɛ nɛ.»

²² Muizu wusoo á woo Dɛnaa li á pɛ: «Dɛnaa, wàa na á baa n zaman kɛ da fuu ni? Wàa na á baa ń ma dia dí kɛ ganaa?

²³ Ma bɛ́ má daa Faarahɔn li, má boo da nɛ n din tɔ nɛ, á màn da zaman kɛ a nɔmaa li, n nə ǹ bɔ bɛa sii kɛ lɛ dɔ-n duduu wa.»