Bɔ bɛ̀rɛbaa nɛ 4 - LAWA A BOO SONBORE 2011

Lawa nə n din pàã nyaa Muizu-n lɔn

¹ Muizu ná a lɛ si: «Sɛnɛ, á ke! Izirayeli nɛnyaanan lɛn ba re golee ma li wa, ǹ ba re n too koe ma lon wa. Ǹ tá re pii, mà Dɛnaa nə n din nyaa masɛ-n wa.»

² Dɛnaa pɛ-n kɛnɛn: «Wàa nə n gɔn?» A ná a lɛ si mà bàlà nɛ.

³ «A zũ tán.» Á zũ tán. Bàlà lɛ miɛ̃ baa, Muizu baa si a nyɛɛnɛ.

⁴ Dɛnaa pɛ Muizu ni: «N gɔn saa n kũ a mui ganaa.» Muizu nə́ n gɔn saa á kũ. Miɛ̃ lɛ wusoo á bàlà baa a gɔn.

⁵ Dɛnaa pɛ-n kɛnɛn: «A zɛnaa miɛ̃, n nyaa ǹ nɛ, mà má n din nyaa n nɛ, ma din Dɛnaa lɛ, ǹ digolon Lawa lɛa, Abrahamu ni, Izaaki ni ka Zakɔba nɛ, màn mɛn bɛ́ toɛ, ǹ golee n li.»

⁶ Dɛnaa pɛ nɛ doo: «N gɔn da n foo bii kəni.» Á n gɔn da a foo bii, á wusoo á bɔ. Gɔ̀nɔn ki busu babaraa ná a gɔn lɛ kũ, á fu kɔ ka piepie.

⁷ Dɛnaa pɛ nɛ: «Wusoo doo n nə n gɔn da n foo bii.» Á wusoo á da walan, á tɔ́n bɔ. A gɔn lɛ wusoo á bǐɛ̃ kɔ.

⁸ Dɛnaa pɛ-n kɛnɛn: «Haya! Bɛ̀ ǹ lɛ kɔ, ǹ nə́ n too kɔ n lon, sii-nyaa bibinaa kɛ a lɛa wa, ǹ tá re n too koe n lon a paabaa ǹ wɔ kɛ a lɛa.

⁹ Bɛ̀ ǹ golee bɛa sii nyaa ǹ sii paa kɛ lɛ li, ǹ nə́ n too kɔ n lon wa, n die n tà lɛ a mu si n kaa tán. N mu mɛn si tà lɛ nɛ ń kaa tán, bɛ á re mà biɛ.»

Lawa Aarɔn bɔ Muizu a koamala wole lɛa lɔn

¹⁰ Muizu pɛ Dɛnaa nɛ: «Dɛnaa, ma nə n nyankoe, masɛ a boe boo la wa. Bɛ bie á n giala kɔ gunun wa, giĩ bie wa, a kũ n din a boo da masɛ-n ganaa, ma tɔn nə n bɔyaa wa. Ma lɛ á guguru.»

¹¹ Dɛnaa pɛ-n kɛnɛn: «Die na á lɛ kɔ minbuiin nɛ la? Die n minbuiin nɛ lɛ tiɛ̃, a nà a too tã? Die n toɛ a yii á wɔlɔ yii, die na a yii tiɛ̃? Ma din Dɛnaa Lawa bie wa?

¹² Kanna kəni, woo, ma din tá kun n lɛ nɛ, n doamaa bɛ́ nɛ n boo mɛn da, ma á re n darɛɛ bɛ ganaa.»

¹³ Muizu pɛ: «Dɛnaa, ma nə n nyankoe, min kɔsɔ mɛn bɛ́ kɔɔ̃nɛ n ganaa, bɛa dɛnaa dia a wo boo kɛ lɛ pɛ.»

¹⁴ Lawa foo yoo Muizu li á pɛ nɛ: «N dɔɔ̃ngiĩ Aarɔn banban wa ya, Levii tɔrɔ min kɛ lɛ? Ma á doɛ̃, ma bɛ á boe boo la. Á ke, á soo dinin á die n diɛ n lɛ. Bɛ̀ a yii nə n yɛ, a foo á re kɔɔ̃n koe.

¹⁵ Boon lɛn pɛ nɛ, n nə ǹ wɔ a lɛ-n. Ma dinmaa tá kun n lɛ nɛ, kun ka a dɔ wɔ nɛ. Ka doamaa bɛ́ ka màn mɛn zɛnaa, ma á re bɛ nyɛɛ ka nɛ.

¹⁶ Aarɔn sɛ á re boo diɛ zaman lɛ nɛ n bǎã nɛ, á n die goɛ̃ n boo gii-dali lɛa, nsɛ goã ka a Lawa bɛ́ lɔn.

¹⁷ Bàlà kɛ lɛ sɛ saa n gɔn, n tá re sii nyaa ǹ siin zɛnɛɛ ka bɛ nɛ.»

Muizu wusoo á wo a tɔrɔ minin li

¹⁸ Muizu wusoo, á woo ǹ daãgiĩ Zetro li, á pɛ-n kɛnɛn: «Ma á siĩni ma wusoo, ma wo ma din tɔrɔ minin kɛn li Ezipti gána nɛ, ma ga bɛ̀ ǹ yii á tɔn koo.»

¹⁹ Zetro pɛ nɛ: «Wo ka là nyantoro ne!» Dɛnaa pɛ Muizu ni Madiã gána lɛ nɛ: «Wusoo n wo Ezipti gána nɛ, a giala, min mɛnɛn tumaa bɛ́ giɛ n li ǹ nə n nyin bɔ, bɛn nə́ gã.»

²⁰ Muizu ná a lɔ kũ ka a nɛnyaanan nɛ, á ǹ kaa dundun la, á wusoo á woo Ezipti gána nɛ. Á Lawa a bàlà lɛ saa a gɔn.

²¹ Dɛnaa pɛ Muizu-n doo: – Á ke, n bɛ́ wusii woe kanna ma pàã kɔ n la máa n kaãbaa ǹ siin mɛnɛn tumaa zɛnaa, n die n bɛn zɛnaa *Faarahɔn yɔrɔ-a. Sɛnɛ, ma din tá re a too kaka koe, a re toɛ zaman lɛ woo wa.

²² N die n pɛ Faarahɔn nɛ: Dɛnaa n boo diɛ kɛnɛn: «Maa nɛgiĩ bibinaa n ka Izirayeli ni.

²³ Man pii n ni: Toa maa nɛgiĩ woo, a dí nya ma nɛ. Bɛ̀ n nə́ n piã n toa á woo wa, haya, man die n din a nɛgiĩ bibinaa dii a gã.»

²⁴ Ǹ bɛ́ zii lɛ tɔ we, ǹ golee ǹ bǎã kɔ́n nɛ, Dɛnaa daa mà a n Muizu dii á giɛ̃.

²⁵ Sipora yoo á kɔlɔ lɛ-bɔle saa, a ná a nɛgiĩ lɛ gɔrɔ lɛwɔn kuru ni, á lɔ a dɔ wɔ ganaa, á pɛ-n kɛnɛn: «A n ma zuũ lɛa ma gɔn,»

²⁶ bɛ giala, mà kurii kɛ a lɛa nɛ, Lawa ná a nyin toa.

²⁷ Dɛnaa pɛ Aarɔn nɛ: «Wo don bii, n nə n da Muizu lɛ.» Á woo, á n da lɛ Lawa a kele kɛ la, á n sɔɔ a nɛ.

²⁸ Dɛnaa boon mɛnɛn tumaa kɔ Muizu la, mà a ǹ pɛ, a sii nyaa ǹ siin mɛnɛn tumaa nyaa nɛ, mà a ǹ zɛnaa, á ǹ laakalaa Aarɔn nɛ.

²⁹ Muizu laanka Aarɔn woo Izirayeli nɛnyaanan min golen tumaa lɛ sɔkɔn.

³⁰ Dɛnaa boon mɛnɛn tumaa kɔ Muizu la, a sii nyaa ǹ siin mɛnɛn dɔn nyaa nɛ, Aarɔn boon lɛn pɛ, Muizu dɔ́ siin lɛn zɛnaa zaman lɛ yɔrɔ-a.

³¹ Zaman lɛ golee ǹ li. Ǹ ná a giala ma, mà Dɛnaa na á Izirayeli nɛnyaanan lɛn nɔmaa ǹ gɔn lɛ yɛ, mà a na á daa, á n die ǹ sii sii la. Ǹ nə́ kaa tán, ǹ nə́ Lawa guguru kɔ.