Bɔ bɛ̀rɛbaa nɛ 2 - LAWA A BOO SONBORE 2011

Muizu a yɛ boo

¹ Levii tɔrɔ min goon ne, á lɔ saa a din tɔrɔ minin bii.

² Lɔ lɛ daa á nɔ̀ si, á nɛ yɛ, nɛginin lɛa. Lɔ lɛ yɛ mà a nɛ lɛ á siĩni, á duru mui sɔɔ gɔ́ɔ̃ nɛ.

³ A bɛ́ a ba boe la á toɛ durii-n doo, a kiɛ̃ bɛa biikoo kɛ la wa, á ga tiɛ̀rɛɛn li nɛ lɛ wɔ lɛa, zɛnaa-n ka bùruu ni, á gón laanka gɔn wùsu lɔlɔkɔn, á lɔ a ganaa. Á nɛ lɛ da a nɛ, á woo da tán buu ni, tà lɛ lɛkoro ganaa.

⁴ Nɛ lɛ gololɔ giã tiãlɛa, á ga nɛ lɛ walan, sii mɛn bɛ́ re yii, a bɛ dɔ̃.

⁵ Á daa yaa, bɛ̀ *Faarahɔn a nɛlɔ na á daa n zoo tà lɛ lɛ-a, bɛ á zɛnɛɛ bɛ̀ a dí-nyalin man tɔ we tà mu lɛ para li. Kii a nɛlɔ lɛ bɛ́ á tiɛ̀rɛɛn lɛ yɛ buu lɛ nɛ, a ná a dí-nyali goon dia, mà a wo saa.

⁶ A ná a lɛ bũ, á ga nɛnyaan lɛ ganaa. Nɛginin ni, a n wuu pii. Nɛ lɛ makara kũ. A din pɛ mà Ebrəən nɛnyaan goon ne.

⁷ Nɛnyaan lɛ gololɔ daa, á pɛ Faarahɔn a nɛlɔ lɛ nɛ kɛnɛn: «Ń tá li ma wo ga nɛ-tooli li *Ebrəə lɔn bii ma da nɛ, bɛ nyɔ kɔ nɛ lɛ la?»

⁸ Kii a nɛlɔ lɛ pɛ nɛ mà a woo.

⁹ Nɛnɛn lɛ woo lɛ dia nɛ lɛ dan la. Kii a nɛlɔ lɛ pɛ-n kɛnɛn: «Wo ka nɛ kɛ nɛ, n nyɔ kɔ la n too, ma dinmaa n die n sarɛɛ.» Lɔ lɛ nɛ lɛ si á too.

¹⁰ Nɛ lɛ bɛ́ á gole kɔ, á wusoo á woo kɔ kii a nɛlɔ lɛ la. A na á n baa a gɔn ka a din a nɛgiĩ bɛ́ lɔn, a ná a tɔ kɔ Muizu, (bɛ giala mà "bɔ mu li"), a giala a din mà asɛ na á bɔ mu li.

Muizu a baa si a wo Madiã gána nɛ

¹¹ Muizu bɛ́ á gole kɔ, biikoo kɔ́n dɔ, á soo á woo ǹ dɔɔ̃n Izirayeli minin li, á ǹ nɔmaa ǹ dí babaraan kɛn yɛ. Á Ezipti gána min goon yɛ a din dɔɔ̃n Ebrəə min goon dii.

¹² A bɛ́ á n yɔrɔ bɔyaa á ga a paran tumaa li, á dɔ̃ mà min banban, á Ezipti gána min lɛ dɛ, a ná a gere duru nyɔɔsɔ̃ giulun.

¹³ A lɛawaa, á soo doo, á woo a din dɔɔ̃nɔn lɛn min paa yaa, Ebrəə minin lɛa, zia diɛ. Á pɛ zɛ̀rɛdɛnaa lɛ nɛ mà wàa na á baa a tá ǹ miã kɔsɔ dii?

¹⁴ Giĩ lɛ mà a ganaa: «Die na á n koa kii laanka kiri-wɔle lɛa wɔsɛn mìi la? Ma n giɛ li n masɛ dɔ dɛ, ka n bɛ́ ń Ezipti min kɛ dɛ lɔn?» Nyɛ́ɛ Muizu kũ, á pɛ kɛnɛn: «Haya, maa sii lɛ bɔ kanaa kəni!»

¹⁵ Faarahɔn bɛa sii kɛ lɛ ma, á goã li a Muizu dɛ. Sɛnɛ, Muizu soo á n bɔ Faarahɔn a bǎã nɛ, á woo giã Madiã gána nɛ, á golee tù goon genli.

¹⁶ Madiã gána a wúlu-bɔlen kiã a nɛlɔn man nə́ goã sɔbaa. Ǹ nə́ daa mu si tù lɛ-a, ǹ nə́ kiɛ goon ne ǹ díi a tɔɔn wɔ lɛa.

¹⁷ Sɛnɛ, tɔɔn-lɛduə̃lin nə́ daa ǹ loo. Muizu tɔ́n yoo á daa ǹ gu ganaa, á mu kɔ ǹ tɔɔn la.

¹⁸ Nɛlɔn lɛn nə́ wusoo, ǹ nə́ daa ǹ díi Zetro kɛ li, a tɔ n Reweli dɔn. Á nɔ̀n da ǹ la: «Wàa na á baa ka wusoo, ka daa lɛliɛ nɛ kɛnɛn pelo?»

¹⁹ Ǹ nə́ pɛ ǹ díi lɛ nɛ mà Ezipti gána min goon na á ǹsɛn si tɔɔn-lɛduə̃lin lɛn la pelo, mà a din na á mu si, á kɔ ǹsɛn la dinin, á kɛ kaa ǹsɛn tɔɔn lon.

²⁰ Zetro pɛ a nɛlɔn lɛn manɛ kɛnɛn: «Sɛnɛ, bɛa dɛnaa lɛ á maa? Ka ǹ ka toa maa? Ka lɛ dia la, a da màn bii.»

²¹ Muizu lɛ kɔ á giã bɛa giĩ kɛ lɛ li. A ná a nɛlɔ lɛ goon kɔ la lɔ lɛa, a tɔ n Sipora.

²² Á nɛginin goon yɛ, Muizu ná a tɔ kɔ Gɛrsɔn, bɛ giala mà "gùli", a giala mà asɛ na á gùli baa bǎã kɔsɔ nɛ.

Lawa bɛ́ á Muizu bɔ lɔn mà a Izirayeli bɔ bɛ̀rɛbaa nɛ

²³ A bɛ́ á belebɔ bɛ kio, Ezipti gána a kii lɛ gã. Izirayeli nɛnyaanan lɛn bɛ́ nɔmaa gɔ́ɔ̃ nɛ, ǹ nə́ gini, ǹ nə́ n lɛ dɛ. Bɛa bɛ̀rɛbaa lɛ gɔ́ɔ̃ nɛ, ǹ nyankɔ dii á dɔ Lawa ganaa.

²⁴ Lawa nə́ ǹ ginii lɛ ma. Lawa yiri gisĩ ka lɛ kɔ kɔn la kɛ nɛ, a din doa kɔn ka Abrahamu ni, ka Izaaki laanka Zakɔba nɛ.

²⁵ Lawa yii Izirayeli nɛnyaanan lɛn yɛ, á ǹ sii lɛ dɔ̃.